جايلي شغل من البيت .. أوافق ؟

فريق راجل. دوت كوم


كلنا بنضايق من المواصلات والزحمة والمرور والصحيان بدرى والنزول والتأخير والمواعيد وكشف الحضور والإنصراف والروتين والبصمة والخصومات و..و..و...  حاجات كتيييير بتخلينا نكره الشغل والنزول للشغل كل يوم وبنبقا مستنيين يوم الخميس بفارغ الصبر وبنعمله إحتفال يليق بيه... ولكن مع كل ده صدقنى إنت فى نعمة .. وعمر الشغل من البيت زى ما معظم الناس بتطمح ماهيكون حل ولا هيكون أريحلك فى حياتك على المدى البعيد وده لحاجات كتير لخصنهالك فى :


1-    العزلة والوحدة
طبعاً فى الاول هتبقا مبسوط ومرتاح ومستكنيص..بتصحي 10 إلا خمسة لو شغلك من 10 وممكن تشتغل من غير غسيل وش وترجع تنام تانى ساعاية بريك وتقوم تكمل ، وقاعد بلبس البيت ومزاجك رايق ...وده هيحصل لمدة اسبوع واتنين وشهر ويمكن اتنين لكن بعد كدة هتحس إن مفيش أى متعة فى كدة خاااالص .. واتحول الموضوع لروتين أسوأ من روتين الذهاب إلى العمل .. هتصاب بعزلة وكل ماهتنزل الشارع هتحس بغربة وإن مكانك مش هنا مكانك فى البيت 24 ساعة وده هيسببلك إكتئاب كبير لو متعودتش تلبس وتنزل تشم الهوا وتشوف الشمس.

man-597178_960_720.jpg

2-    إبداعك هيقل
طول مانت بتشتغل من البيت ومن السرير يمكن فى اغلب الأوقات عقلك عمره ماهيستجيب لأى رغبة إبداعية أو تطويرية لمستواك المهني .. لأنه ببساطة هيبقا متبرمج على الترييح والأنتخة اللى متعود عليهم من يوم ماتولدت فى الأتموسفير والأجواء البيتوتية دى وهيبقا صعب جداً تغير ده ، لحد ما إبداعك يصدى وتتحول لمجرد شخص بياخد من هنا ويحط هنا بدون أى لمسة إبداع.

3-    عنف أسري
دراسات كتير بتقول إن الشخص اللى بيختلط بأسرته أكتر من 12 ساعة فى اليوم بيبقا أكثر عرضاً لحالات العنف الأسري والمشاكل اللى بتنتج عن المشاحنات والخلافات فى وجهات النظر ... بالبلدى كدة انت أصلا لو قعدت ساعتين فى بيتكم بتتخانق وتزعق مع اللى حواليك كام مرة ؟ إحسبها بقا لو طول اليوم خلقتك فى خلقتهم... ده غير إن موضوع الإشتياق والوحشه ولهفة الرجوع للبيت والحنين للدفء الأسري والكلام ده هيتمسح بأستيكة وتتحول لكائن بلا مشاعر أسرية مع الوقت..

4-    الوقت هيهرب منك
دايماً وانت فى البيت مش هتحس بقيمة الوقت والديد لاين والحاجات اللى بتكهرب الموظفين فى أى مكان وده مش ميزة خالص بالعكس ... عدم إهتمامك وشعورك بالوقت وإن اى حاجة هتكون سهلة تخلصها في ثواني ( منا فى البيت بقا ومفيش حاجة هتعطلني ) الفكرة دى فى حد ذاتها هتعطلك بالظبط  زى نظرية ( أقرب واحد ساكن جنب المكان بييجى آخر واحد ) ..لكن وجودك وسط ناس هيحفزك ويحسسك بالوقت أكتر.

office-932926_960_720.jpg

5-    هتفضل محلك سر
عمرك شفت واحد بيشتغل من البيت بيترقي ؟ غير فى حالات نادرة ... طيب عمرك شفت حد بيشتغل من البيت جاله شغل تانى وفرصة أحسن من خلال حد إتعرف عليه عن طريق الشغل ؟
المقصود إن وجودك وسط جو الشغل والمقابلات والإجتماعات بشحمك ولحمك هيخليك تعمل علاقات شخصية كويسة جمب العلاقات المهنية والفرصة مبتجيش غير كدة إنك تلاقي مكان أحسن وبوزيشن أعلى وفلوس أكتر .. وهتقدر تطور من الكارير بتاعك .. لكن طول منت نبات ضل قاعد فى البيت فرصتك فى النمو هتقل.


شارك هذا المقال: