إزاى تكون راجل سعيد .. بعد فركشة العلاقة ؟

فريق راجل. دوت كوم


علشان الدنيا مش زى افلام ديزنى..ومش كل قصص الحب بتتحول لـ Fairy Tale..النهارده هانديكم شوية نصايح عن ازاى تخرج من البريك اب بأقل الخساير الممكنه

index.gif


1- ماتتخدعش في أول اسبوع

أول اسبوع بعد "الانفصال" بيكون الراجل فى Mood كويس نسبيا مقارنة بالمصيبه اللى لسه حاصله..خلال الاسبوع ده الراجل بيحس انه مش متضايق..بالعكس، دا كمان ممكن يكون حاسس انه مرتاح..ولاننا كائنات غير عاطفيه زى البنات..بنبقى فاكرين اننا كده تمام وهانقدر نكمل حياتنا عادى..little that we know ان المرحله دى اسمها مرحلة التخدير..حطها ف حسابك واعرف ان اللى جاى مش سهل زى مانت متخيل

keep-calm-dont-call-or-text-her.png

2- ورقة الفصلان

بعد الفركشه فى حاجه كتير منها بينساها..العيوب اللى كانت ف البنت اللى بتحبها..عقلك تدريجيا بيبتدى ينسى العيوب وده بيهدد انك ممكن تلاقى نفسك ف يوم بترجع تكلمها تانى..علشان كده..اخترعنا طريقه تمنع نفسك بيها من انك تقع ف فخ مكالمة "انا بس عايز اطمن عليكى"
تانى يوم بعد الانفصال..هات ورقه و قلم..واكتب List بكل التفاصيل اللى كانت بتضايقك فى الـEx..سواء كلمه، حركه او تفصيله ف حياتها..واوصف بالظبط كنت بتحس بايه لما بتشوف الحاجات دى..وكل اما تحس انها وحشتك..طلع الورقه واقراها بصوت عالى..وادعيلى

re.jpg


3- اوعاك والـRebound

اول حاجه الراجل بيعملها لما الحوار بيخلص انه بيمسك التليفون ويتكلم مع اول بنت بتيجى قدامه ف الـcontact list..وده لان عقله الباطن بيحاول يهيأله انه لسه مرغوب فيه وان اللى سابها مش اخر بنت ف الكون..ودا نظريا مقبول..لكن اللى مش كويس علشانك انك ترتبط عاطفيا بواحده من البنات دى بعد البريك اب..ليه؟ سؤال جميل..علشان ببساطه عقلك بيبقى محتاج حد بس علشان يضيع معاه وقته..صدر حنين يترمى فيه علشان يديله الحنان اللى فقده لما تحولت حبيبته الى Ex-girlfriend..والاحساس ده بيكون لحظى وبيتلاشى بمرور الزمن..وهيلاقى نفسه خلال فتره زمنيه قصيره زهقان من البنت الجديده بعد ما ممكن يكون ورطها معاه عاطفيا..وده يا عزيزى اسمه الـReboun..من المحرمات دوليا..اوعى!

plan.jpg

4- حط خطه لأول 3 شهور بعد البريك اب:

لما الرجاله بتفركش بيكتشفوا ان اصبح عندهم 16 ساعه من اللا شئ ف يومهم..اه بيروحوا الشغل وبيخرجوا وبيقعدوا ع القهوه..بس بدل ماكانوا بيعملوا الحاجات دى ووشهم ف شاشة الموبايل بيـ text او حاطين سماعة الموابايل على ودنهم بيتكلموا مع اللى بيحبوهم..اصبحوا بيعملوا الحاجات دى فى صمت كئيب..وده بيدى فرصه للدماغ انها ترجع تفكر فى كل الذكريات اللى عاشوها مع الـEX..واللى بدورها بتخلى مرحلة النسيان اصعب واطول

علشان كده..لازم تعمل تغيير جذرى ف اول 3 شهور بعد البريك اب..هات الفلوس اللى كنت محوشها وسافر..ربى دقنك واعمل look جديد..ادخل كورس واتعلم حاجه كان نفسك تتعلمها من زمان..صاحب ناس من بلد تانيه ع الفيس بوك..اعمل اى حاجه علشان تبدل الفراغات المؤذيه ف حياتك بعادات جديده

pink.jpg


5- اسمع Pink Floyd

ميزة اغانى Pink Floyd انها حلوه و مش مفهومه (ع الاقل لشريحه كبيره من الناس) و مزيكتها catchy وهاتعلق معاك.دا غير ان معظمها مش رومانسى زى الاغانى العربى والاغانى الـPop الانجليزى..وده هايساعدك انك ماتفتكرش حاجه من ذكرايات اللى فات..زى اول مره مسكت ايدها..او لما كنتوا بتغنوا سوا ف العربيه لما الراديو كان بايظ..او لما كنت متعود تجيبلها hot chocolate لما الدنيا بتمطر..ولا الكتاب اللى قعدتوا تقروه سوا اول مره خرجتوا فيها..او الـ….ما علينا

المهم اسمعوا Pink Floyd..

نصيحه اخيره..تعلقك بالماضى ممكن يوصلك لمرحله مرضيه ممكن تتعالج بسببها نفسيا..اتعلم تكره علشان تفضّى مكان ف قلبك تحب حاجات جديده..امسح كل حاجه ممكن تفكرك بالموضوع..كلنا عارفين ان الكلام سهل والفعل اصعب..بس احيانا فى حياة ناس بتتدمر بعد الانفصال..وناس تانيه بتبنى حياتها من الاول وجديد
احنا كرجاله ممكن نبان اقوياء من بره..بس صحتنا النفسيه اثرها بيبان على المدى الطويل..لو لقيت نفسك محتاج مساعده..ماتتكسفش تروح لدكتور نفسى وتحكيله..احنا بشر..مش جماد


شارك هذا المقال: