مضيت ع القايمة ولا لأ يا عريس ؟

أحمد صلاح

تلاقى يوم كتب كتابك وانت عريس وفرحان بعروستك وتلاقى فجأه طلعالك ورقه كده من اهل عروستك ويقولك خد أمضى ياعريس .. امضى ؟!! امضى على ايه ياعمى .. لا دى القايمه ياحبيبى ماتقلقشى .. وهنا بتبقى اللحظه التاريخيه اللى من الصعب اى عريس بينساها فى حياته وبسبب القايمه دى

كتير جوازات مكملتشى للاسف .. بس هو الموضوع مختلف من بلد لبلد .. يعنى فيه ناس من يوم الاتفاق اللى قبل الخطوبه بيعرفوا فيه العريس ان بيكون فيه قايمه وبتكون بمبلغ كذا وبتتكتب فيها ايه ... وفى اهالى مش بتكتب قايمه خالص .. يعنى الموضوع مختلف من مكان لمكان بس فى اغلب البلاد

دلوقتى هتلاقى القايمه دى منتشره بحكم ان اهل العروسه بيعتبروها انها ضمان لحقها دا فى حاله الطلاق لقدر الله

تعالى اعرفك بالقايمه دى لو انت داخل على جواز قريب

15.JPG

القايمه وبالتفصيل بتكون ورقه مكتوب عليها من فوق " قائمة منقولات زوجية " وفى الاغلب اهل العروسه بيخلوا محامى يكتبها عشان بتكون زى عقد كدا وبيمضى عليها شهور

وبيكون مكتوب فى الاول

انه فى يوم كذا .. الموافق كذا .. قائمة منقولات خاصه للسيده كذا .. ( اللى هيا العروسه ) والمسلمة على سبيل الامانه للسيد كذا .. ( اللى هو العريس )

يعنى من الاخر بتقول ان لو حصل اى انفصال ان العروسه ليها الحق بأنها تاخد الحاجات الموجوده فى القايمه دى

وفى الاخر بيكون فيه اقرار والعريس بيمضى وبيكتب رقم بطاقته وبيتعهد انه استلم الحاجات دى

لو حصل الانفصال بيكون العريس مطلوب منه قيمه القايمه او يرجع للعروسه الحاجات دى

محتويات القايمه

c5fd992364b3-original.jpeg

بيتكتب فيها كل حاجه جابها العريس والعروسه ( شوفت الافترى هههه ) يعنى مش بس حاجات العروسه بس.. زى

الشبكه – العفش بالكامل – الاجهزة الكهربائية – محتويات المطبخ .. الخ

وبيكون فى الاغلب فيه تفاوض مابين الاهلين على الحاجات المكتوبة دى

وفى الاخر عايز اقول ان مش القايمه هيا اللى هتضمن حق العروسه اهم حاجه الاختيار السليم .. وياترى انت رأيك ايه وناوى تمضى على القايمه وتعديها ؟ ولو كنت متجوز .. انت مضيت على القايمه ولا لا ؟؟


شارك هذا المقال: