10 موضوعات المصريين مبيملوش من تكرارها كل رمضان

فريق راجل. دوت كوم


فيه حاجات لو المصريين مقالوهاش لبعض واتكلموا فيها في رمضان يحسوا ان فيه حاجة ناقصاهم وبتتكرر كل سنة :

1- صايم ولا زى كل سنة ؟

sayem.jpg

السؤال اللى المفروض هو إفيه يعنى بس مبقاش حد بيضحك عليه والغريبة ان كل الناس بتتريق عليه بقالها سنين ومع ذلك لسة فيه كائنات فضائية بتقابلك اول يوم رمضان وتسألك بسماجة : صايم ولا زى كل سنة ؟

2- الكنافة بالمانجة

mango.jpg

بقت من الطقوس الرمضانية السنوية ... ولازم كل سنة الناس تشتكي لبعض من اسعارها الغالية اوى ويبتدو يحطو بوستات ازاى توفر فى الكنافة وتعملها فى البيت أحسن وبتكلفة وانضف .. ولا الكنافة بترخص ولا هم بيعملوها فى البيت ..

3- فلوس التبرعات

tabaro3.jpg

ليه مبيتبرعوش للناس المحتاجة بالفلوس الكتيرة اوى دى اللى بيعملو بيها إعلانات للتليفزيون علشان الناس تتبرع ؟ ليه ؟؟
والحقيقة محدش عارف يجاوب على السؤال ده.

4- رامز جلال بجد ولا حقيقي ؟

ramez.jpg

من وقت رامز جلال ماحترف برامج المقالب وكل سنة المصريين موارهمش غير السؤال ده ( هو بجد يعني ولا بيشتغلنا) ؟ وكل سنة بتطلع حاجات تؤكد انه اشتغالة وتصريحات من ضيوف سابقين وكمان بيطلع ضيوف تانيين يؤكدوا انهم شربو المقلب من غير اتفاق ... ده غير الاستوديو التحليلي لكل حلقة من حلقات البرنامج اثناء عرضها على السوشال ميديا .

5- اومال هنعمل ايه فى جهنم ؟

hqdefault.jpg

رمضان بقاله كام سنة بييجي فى الصيف والحر والاجواء الساخنة دى ... والناس فى الشارع مبيبقوش قادرين يمسكو نفسهم عن السؤال ده ( هنعمل ايه فى جهنم ) وكأن خلاص كلهم عارفين مصيرهم .. الموضوع ده والجملة دى بتتقال بكذا صيغة وهتسمعها كتير مرة على سبيل المواساة لبعضيكم ومرة على سبيل التحذير والعظة ومرة على سبيل الرخامة وخلاص .

6- أجور الفنانين

600.jpg

لازم بورصة الاموال تتفتح ...ويدوروا على كل نجم ونجمة ده قبض كام ودى اشتلات ملابس الشخصية بكام والمسلسل ده ديكوراته تحفه ياترى متكلفة قد ايه ..

7- الفاظ ومشاهد غير رمضانية

sara.jpg

كل اللى بيتابعوا المسلسلات لازم يعلقوا تعليقات من نوعية ( ايه الالفاظ دى ) و ( يعنى ايه رقاصة فى مسلسل يتعرض فى رمضان ) و ( المسلسل ده المفروض يتشاف بعد الفطار ) .. صناع الاعمال الفنية بيدافعوا عن نفسهم ان ده بقا العادى والطبيعي ومش بيجيبو حاجة من عندهم .

8- فواصل مسلسلية جوة الإعلانات

hqdefault-1-.jpg

طبيعي ياجماعة ده موسم للعرض التليفزيونى للمسلسلات والبرامج .. والقنوات بتدفع ملايين علشان تشتري مسلسل علشان تجيب عليه اعلانات وتكسب منه وكل الاعلانات ما كترت القناة هتستفيد فمش هينفع خالص تقلل الاعلانات علشان انت تتفرج مبسوط للاسف .. بس الحل موجود وكل القنوات بقا ليها يوتيوب رسمي ممكن تتفرج عليه وتريح دماغك ..

9- الريد فيلفت

0red-velvet-konafa.jpg

دى بقت منافسة للكنافة بالمانجة وبتهدد عرشها على موضة الحلويات الرمضانية .. بقوا بعملو كل حاجة بالريد فيلفت .. وبقا فيه التراس كنافة بالمانجة ضد التراس كنافة بالريد فيلفت ... ومين احلى ومين ارخص ومين يتحجز قبل مين ..

10- رمضان بيعدى هوا

لسه بدرى والله والله ياشهر الصيام ... الايام الطبيعية اصلاٍ رغم الملل بتعدى وبتفوت بسرعة علينا كلنا ومبقناش نحس بالوقت ... مابالك بقا بشهر رمضان اللى كله فعاليات حلوة ومسلية وجميلة طبيعيى يعدى بسرعة .. وهتلاقي المصريين دايماً يقولوا ( ايه ده ! النهاردة 10 رمضان فعلاً ده انا حاسس ان الوقفة كانت امبارح )... وسبحان الله الاحساس ده عمره مابيتغير من سنة لسنة .


شارك هذا المقال: