حاجات لازم تكون فى دولاب العريس !

مروان حازم

طبعا احنا داخلين على موسم جواز و كلوا هيلبس قريب .... دبل طبعا!

طيب هل جهزت نفسك يا معلم ....لا مش قصدنا على الحاجات إياها .. من حيث الناحية دى فهى جاهزة من زمان ... لكن هل جهزت هتشترى ايه عشان تحطه فى دولابك لما تتجوز يا عريس؟

طيب على العموم لو مش عارف هتجيب ايه حازوا على بعض كدة و كل واحد يطلع ورقة و قلم و يكتب ورايا.

البيجاما:

3aris1.jpg

طبعا مش محتاجة كلام اول ما هتقلع البدلة هتنط فى البجاما فا دى اول حاجة العروسة بتشوفها فا خد بالك بقى و بلاش بيجاما خالتو عفاف الستان اللميع دى, اسمع منى البيجاما دى احرقها و اعمل عليها كيلو كباب ابرك. لا انت روح للبيجامات القطن العادية بس حاجة كدة تبقى دلع يعنى ناعمة و مريحة و ململسها مريح و الوانها مريحة للعين.و هاتلك كام واحدة عادية غير المتدلعة دى عشان تلبسهم على مدار شهر العسل متطلعش القديم دلوقتى مستعجل على ايه مسيرها تشوفه و تغسله متستعجلش.

ملابس الخروج :

taqq2.jpg

طبعا انت هتحتاج كام طقم كدة تبقى راجل شيك كدة و عريس فى نفسك كدة و و تحس انك جديد فى جديد كدة بس متكترش لانك هتتنفخ لو فكرت تجدد دولابك كلوا و بعدين خلى تفكيرك اكتر على هدوم تنفعك فى شهر العسل يعنى شوف المكان الى انت رايحه جوه ايه و ظبط عليه كام طقم ينفعوك هناك لانك هتحب تجدد و مينفعش تبقى مسافر اسبوع او اتنين بطقم واحد او طقمين يعنى.

الداخلى:

3aris2.jpg

انت فاكر عشان انا بكتب فمجلة و كدة مش هقولك على دى دة دى اهم نقطة يا عريس منك ليه, طبعا فكك من الى عندك كلو ممكن تفكهم و تعملهم ملايات احسن او ارميهم, و روح كدة اشتريلك عشرة خمتاشر طقم جديد كدة و بورقهم و يكونوا شبابى كدة و شيك و بلاش حاجات سبونج بوب و البوس و القلوب و الحوارات دى عشان عيالى اوى واللهو بلاش الابيض لحسن دة كسفة لوحدها.

الجزم:

bbbbbb.jpg

مش هتحتاج غير جزمتين جداد واحدة كلاسيك وواحدة كاجوال و ممكن شبشب للبيت يكون حلو كدة عشان اكيد مش هتقعدلها بشبشب شكله وحش يعنى, و استخدم جزمك القديمة الحلوة بس الى تهالك وزعه و اكسب بيه ثواب انت عايز الثواب دة كتير الفترة دى. اما الشرابات فا كلو جديد فكك من القديم اسمع منى.

المستلزمات الخاصة:

Personal-Hygeine-Items.jpg

طبعا مش هفكرك بطقم امواس حلاقة و شاور جيل حلو و ريحته قوية و شامبو شعر حلو و مزيلين عرق و برفان جديد حلو كدة, من الاخر فى القسم دة دلع نفسك بقى انت عريس جديد و مش هتبقى عريس كل يوم يعنى.

فى حاجات بقى بتبقى اختيارى يعنى روب بيت للزيارات بتاعت حماك و حماتك الى فى اول يومين دول و زيارات الاهل بعد كدة مش كل مرة هتلبس لبس خروج يعنى و روب الحمام فى ناس مبتستخدموش فا ملوش لازمة عندهم و فيه كدة حاجات بتبقى رفايع مش كل حد بيهتم بيها فا مش لازم ذكرها اوى يعنى.

المهم بقى يا عريس تدلع نفسك و تجيب الى فى نفسك قبل ما المسؤولية تبقى اتنين و بدل ما بتشترى لواحد هتشترى لاتنين و تبتدى الصرف الى على حق فا متبخلش على نفسك فى العشاء الاخير.

grilled-seafood-platter-81225-1.jpeg


شارك هذا المقال: