٦ نصايح علشان تداري الكرش

فريق راجل. دوت كوم

عادة، بتقضّي فترة الشباب تظبّط شعرك وحتى لو مش واخد بالك من جسمك، بيبقى إلى حد كبير مظبوط إلا لو بطبيعتك بتتخن. وبعدين يجي سن ما بعد الـ٢٨ تقريبًا، شكل الجسم بيتغير ويميل للتخن، ولأنك أصلًا مش بتاخد بالك، بتفضل مش واخد بالك وبتفضل تتخن، ولو حتى ما تخنتش، الأكيد إن بيطلع لك كرش وبيختلف حجمه من شاب للتاني. لو عايز تقضي الكرش، فأدخل على سيكشن "الفورمة" عندنا، بس لو مبدئيًا عايز تدرايه، فدي نصايح في اللبس تخلى التخن والكرش إلى حد كبير ما يبانوش.

الأسود هو أختيارك الأمثل: 

الأسود عمومًا لون بيدّي شياكة، سواء تي شيرت أو قميص أو پلوڤر، فدي أمرها سهل. حاول تلبس أسود كتير أو تحديدًا لو خارج خروجة مهمة. بيلم شكل الجسم وبيخسس ومش بيبّين عيوب. 

لو حابب تلّون، خليك في الغامق: 

الأخضر الغامق. البني. الألوان اللي مش صارخة ومش هتلفت النظر للكرش.

حتى لو موضة، تجنب النقشات

تجنب النقشات الواسعة: الوردي، المنقط، الدواير، الكاروهات الكتيرة، الكاروهات العريضة، المقلم بالعرض.

الهدوم الأوسع مش بتداري: 

الهدوم الأوسع عليك بكتير بتديك انت إحساس إنها مدارية العيوب بس في الواقع هي بتدّيك حجم أكبر من حجمك الأساسي، خلى الهدوم دايمًا مقاسك، ولو أوسع للراحة، تبقى نمرة واحدة بس. 

قلل الطبقات: 

بلاش كذا طبقة علي بعض. بلاش فانلة وعليها تي شيرت وعليهم قميص تقيل وعليهم چاكيت. كل ما الطبقات تبقى أكتر، كل ما بيبان إن جسمك هو اللي كله طبقات.

اختار المحلات المناسبة: 

لو جسمك مليان جدًا، فيه سيكشن خاص في BTM مثلًا، يعني بلاش تصمم تروح لمحلات معينة معروفة وتجيب أكبر مقاس اللي ممكن يبقى آه داخل فيك بس القصات بتاعته برضه ضيقة. 


شارك هذا المقال: