صراع القوى والحريف ... مين يكسب ؟

أحمد سامي
شارك هذا المقال:

في نهاية كل سنة و مع بداية سنة جديدة , بتبدأ الخناقة بين جمهور الكورة في العالم علي الأفضل , خصوصا مع ظهور نتيجة استفتاء الفيفا و الكرة الذهبية لأختيار أفضل لاعب في العالم , واللي بيسيطر عليه ميسي و رونالدو من سنين ... ورونالدو فى سنة 2016 حصد كل الالقاب وكل الجوايز تقريبا بس هل ده يبخث حق ميسي ؟

soc_messi_rondaldo_ill_b1_1296x729.jpg

الصراع والخناقة بين جمهور الكورة علي لقب الأفضل بين ميسي و رونالدو , و اللي استمر لحوالي 10 سنين حتي الأن , مش هو الصراع الأول تاريخيا , المقارنة اللي قايمة علي فكرة مين الأحسن : اللاعب الموهوب فطريا اللي صعب توقف مراوغاته, وللا اللاعب القوي بدنيا ماكينة الأهداف, بدأ من التمانينات و التسعينات , في مرحلة تطور الكورة بالشكل اللي احنا شايفينه دلوقتي , عشان كده تعالوا نشوف مين كان ميسي و رونالدو في التمانينات و التسعينات :

ميسي و رونالدو التمانينات :

الحكاية بدأت في كاس عالم 1986 , لما مارادونا أبهر العالم كله بموهبته الفذة , لدرجة ان في ناس اعتبرته أفضل من بيليه اللي كان متربع علي عرش الموهبة تاريخيا بعد حصوله علي 3 بطولات كأس عالم , مارادونا فرض موهبته الفذة خلال البطولة , واللي فيها ساعد منتخب بلاده علي الحصول علي كاس العالم للمرة التانية في تاريخهم . خلال الفترة دي انتقل مارداونا للدوري الايطالي – جنة كرة القدم – و تحديدل لفريق نابولي .

best-goals-history-basten-m.jpg

في نفس الوقت كان في حكاية أسطورية تانية مع لاعب موهوب صاعد بسرعة الصاروخ , ماركو فان باستن , نجم الطواحين الهولندية , واللي في نفس الوقت انتقل لنادي طموحه ان يغير شكل الكورة في العالم للأبد , بأسلوب حديث و عصري , ميلان الايطالي.

في الوقت ده ميلان ونابولي كانوا أهم فرقتين في العالم , و كل أنظار العالم بتتجه ناحية الصراع بينهم , والمقارنة مستمرة بين جمهور الفريقين علي مين الأحسن, مارادونا اللي محدش يقدر يوقف مراوغاته الخيالية , و فان باستين , ماكينة الأهداف اللي مش بتقف.

1-diego-maradona-argentina-1982-1986-1990-and-1994-e1441374189414.jpg

المقارنة دي استمرت تقريبا من سنة 1986 لغاية 1992 , خلال الفترة دي : مارادونا فاز بكأس العالم 1986 و وصافة كأس العالم 1990 , بجانب حصوله علي الكرة الذهبية في 86 . أما فان باستين فا حصل علي أفضل لاعب 3 مرات , بجانب بطولة أمم أوربا , و دوري أبطال أوروبا مع الميلان 3 مرات .

0c0d142284fec223ef83e40d2d5321f2.jpg

للأسف الاتنين نهايتم مع الكرة كانت مأساوية , مارادونا تقريبا مسيرته انتهت مع كاس عالم 1994 , و فضيحة تعاطيه للمنشطات . أما فان باستين . فا نتهت حكايته في وقت مبكر , تحديدا في نهائي دوري أبطال 1993 , بي ميلان و مارسيليا , والعرقلة الشهيرة من الخلف , اللي أدت لاصابة مزمنة , في سن 27 ! بسبب الاصابة دي و لأهمية فان باستين و الخسارة الفادحة لانتهاء مسيرة واحد من أعظم لاعبي الكورة , أصبحت عقوبة العرقلة من الخلف طرد مباشر.

ميسي و رونالدو التسعينات :

في وقت الصراع بين مارادونا و فان باستين , كان في أسطورتين بنفس المواصفات تقريبا بيبدأوا صراعهم سوا , باجيو نجم اليوفنتوس و اللي انتقل من فيورينتينا بأعلي رقم في التاريخ وقتها , 15 مليون , و في الناحية التانية نجم السامبا القصير المكير , روماريو , أحد أحرف لاعيبة الكورة في عصره .

بالرغم ان الاتنين كانوا بيلعبوا في دوريات مختلفة , باجيو اليوفنتوس و ميلان في ايطاليا , روماريو في برشلونة الأسباني , لكن الصراع علي لقب الأفضل بينهم كان مشتعل , و يمكن ده لسبب الطفرة اللي عملها كرويف في برشلونة بصناعته لفريق الأحلام , و اليوفي وميلان اللي سيطروا علي بطولات ايطاليا و أوربا .

heat-Baggio-Romario.jpg

الصراع بلغ ذروته في كاس عالم 94 , وخصوصا لما ايطاليا و اجهت البرازيل في النهائي . خلال الفترة دي ,باجيو حقق لقب الافضل في العالم سنة 93 , ورومايو خطفها منه في 94 بعد اضاعة باجيو لضربة الجزاء الشهيرة و فوز البرازيل بكأس العالم.

باجيو و روماريو استمروا في الملاعب لبداية الألفية الجديدة لكن من سنة 97 , نجمهم كان بدأ يخفت بسبب بزوغ نجم ظاهرة بتجمع بين مواصفات الاربعة , ذكاء باجيو ,مهارة مارادونا , مراوغات روماريو , وحس فان باستين التهديفي... الظاهرة اللي مش هاتتكرر , رونالدو .

1998-ronaldo.jpg

في النهاية المقارنة بين القوي بدنيا الهداف زي فان باستين وكريستيانو , او الحريف زي مارادونا وميسي ... مقارنة ظالمة للاتنين و الأفضل اننا نستمتع بمهارات كل واحد فيهم ..خصوصا ميسي و رونالدو .. اللي واضح بعد اعتزالهم مش هنلاقي حد نشجعه .