الشطة... أول طريق الشطافة

أحمد عادل علي
شارك هذا المقال:

فى وحوش متحبش تاكل الحاجة غير و هى مشطشطة و بيدوروا على أى حاجة تتاكل عشان يحطوا فيها شطة أو ياكلوا معاها قرنين فلفل مولعين‘ بس مش كل حاجة البق بيستحملها الجهاز الهضمى كله يقدرعليها.
    الأكل الحراق المشطشط ليه متعته مفيش كلام‘ بس ماتجيش على نفسك عشان تستمتع بأكلتين فى اليوم يعذبوك باقي حياتك و يضايقوك فى الحمام – اللى هو أصلا إسمه بيت الراحة.
 الأكل الحرّاق الكتير بيسبب مشاكل كتير للجهاز الهضمى‘ مش من مرة ولا اتنين طبعاً لكن مع الإفراط فى إستهلاكه بيؤدى للمشاكل دى:

1) اللسان الجغرافى :(Geographic Tongue)
دى حالة مش نادرة بس للأسف ناس كتير مصابين بيها مبياخدوش بالهم منها لأنها مش بتبان غير لما الواحد يطلع لسانه يبص عليه فى المراية – و أكيد دى مش عادة فى أى حد فينا – اللسان بيكون لونه أفتح  فى التلتين اللى فى المقدمة و بتكون فى شكل خطوط و دواير– بصيت فى المرايا قبل ما تكمل قراية مش كدة؟ ما علينا. اللسان الجغرافى ده بيضعف حاسة الإستطعام و ممكن تضيع لفترات طويلة، يعنى مش هتسمتع بأى أكل تانى ف ليه؟ ليه؟!


2) إلتهاب المعدة (Gastritis):
- أكيد سمعت عنه قبل كدا و ده له أعراض كتير و بياخد وقته لحد ما يوصل لمشاكل أكتر زى تآكل جدار المعدة و القٌرح. كله بيخف الحمدلله بس ليه تعانى فى حاجات بتضايق الواحد فى حياته. من أعراضه الحرقان الدائم فى المعدة و الفوارات المضادة مش أحسن حل و بعد فترة بتفقد مفعولها و بيفضل الحرقان. و من أعراضها الرغبة فى القىء و لكن من غير القدرة عليها و ده إحساس بيكدَّر بجد.


3) الإرتجاع المريئى:-
- دى مشكلة سخيفة ممكن متحسش بيها إنها أعراض لأنها بتيجى فى شكل تجشأ – تكريع – معاه سائل معوى و ده شديد الحمضية و كاوى و بيحرق المريئ و ممكن كتر حصوله يؤدى لتهتك فى المريء (Bulimia) و مشكلته إنه مضاعافاته بتبان مع السن الكبير و عشان تحافظ على نفسك لو – لا قدر الله – أصبت بيه إنك تمتنع عن أنواع أكل و شرب كتير و  أكد أولها الأكل الحراق كله.


4) البواسير و الشروخ الشرجية:-
- موضوع مش شيق ولا مريح و أكيد مع كل الشطة اللى بتاكلها أنت أكتر حد عارف إن ساعات رحلة الحمام بتكون مؤلمة. تخيل بقى لو ده أصبح الطبيعى بالنسبة لك؟ كل مرة تدخل فيها الحمام تتعرض لآلام و حروق مبرحة متتخيلش إنها كانت ممكن تحصلك و ممكن تفتكر إن ده عذاب الملكين فى الدنيا. و الألم بيكون رفيق حياة مش بيسيبك فى حالك، مبتعرفش تقعد، تقف، تنام على ضهرك و ساعات المشى الكتير بيكون مشكلة كبيرة و تحدى. طب و على إيه؟

12081075_911293048906050_975527201_n.jpg


5) تهتك مجسات الإستطعام:-
- اللسان فيه مراكز و مجسات الإستطعام و هو أكتر حاجة بتتأثر بال Capsicum اللى هو المادة اللى بتدى الشطة و الفلفل خاصية الإحساس بالحرقان. كتر تعرُّض اللسان للمادة دى بيؤدى لدمار المجسات دى و اللسان على مدار السنين ممكن يفقد القدرة على إستطعام بعض أنواع الأكل. و ليه تحرم نفسك من حاجة العمر كله؟؟


    كفاية رعب كدا و خلينى أقولك ممكن تعمل إيه عشان تستمتع بالأكل الحراق اللى أنت بتحبه من غير ما تتعرض للمشاكل دى كلها. أولاً  تعرف المصادر السيئة و المصادر الكويسة و المقبولة ليك اللى تخليك تستمتع بأكلك و فى نفس الوقت تحافظ على نفسك و صحتك.
الكاتشب الحراق (hot sauce) هو أسوأ مصادر الشطة فى الأكل لأنه مٌصنَّع و دايب فى دهون الجدار للجهاز الهضمى كله بيمتزج بيها و بتعلق فيه و أجزاء كتير من الجهاز الهضمى بتمتصها فى الأنسجة و بتفضل لفترات طويلة.


الفلفل الأسود من الحاجات اللى بتدى طعم حراق شوية و بيبان فى الأكل بسهولة، طبعا لوحوش الأكل الحراق ده هزار، بس الفلفل الأسود مفيد للدورة الدموية و الجيوب الأنفية.
الشطة السودانى و الJalapeno مفيش منهم ضرر لو أكلت منهم مرة كل 4 أو 5 أيام و يكون أفضل إنك تاكلوا فى مع خضار سلطة أو فى ساندويتش فول مايكنش فيه زيت و معصور عليه ليمون  عشان الزيت هيدوب الcapsicum و هيسهل إلتصاقه بكل حتة فى جدار الجهاز الهضمى و الحمض اللى فى الليمون بيمنع إمتزاجه بالدهون اللى فى الأكل. مش لازم تبقى وَحش أوى و تاكله خام.


قرن الفلفل الأخضر اللى بيبقى فيه حتت حمرا ميضرش لو إتاكل بنفس وصفة الشطة السودانى؛ متقطع فى وسط أكل مفيهوش زيت و عليه بردوا ليمون أو خل. ده بيبقى حلو أوى فى ساندويتش فول بس تعصر الليمون على زيت الفول كويس قبل ما تقلبه و ألف هنا.
نصيحة أخيرة متستهونش بالمشاكل دى عشان بتبان أكتر مع العمر و بتزيد ..