عربيات زيرو لسه ممكن تشتريها ببدچت معقول

هشام متولي
شارك هذا المقال:

في ظل ارتفاع الدولار اللي طالع لل 12 و 13 بخطى ثابتة العربيات ضربت جدا و لو مبتحبش تشتري مستعمل لان شوارع مصر هتخلي احسن سواق يبوظ حاجة في العربية لسبب ما و هتكتشفه بعدين .. لسه فيه عربيات في السوق المصري تحت ال 150 الف و ممتازة جدا بس مبدأياً لازم تتخلى عن التلت اربع انواع اللي مصر كلها بتدور فيهم و سيبك من مبدأ اللي تعرفه احسن من متعرفوش ده اللي مبيخلكش تعرف حاجة جديدة .
الحاجة التانية اللي لازم تعيد تفكير فيها بردوا احتقار كل ما هو صيني في وقت الصين خلاص فعلا احتمال في السنتين الجاين تبقى القوة الاقتصادية الاعظم في العالم هي حاليا بعد امريكا و الفرق بقى لا يذكر ..
و في وقت الصين بقى اكبر الشركات زي ابل و سامسونج و BMW و غيرها كتير سواء شركات تقنية او الكترونات بقت بتفضل تجمع اجهزتها في الصين لدقة و رخص العمالة فالحاجات ارخص مش علشان اوحش الحاجات ارخص لانهم كتيير
فكك بقى من الحكم علشان اللعبة اللي اشترتها و انت في تالتة اعدادي ب ٢٥ جنيه باظت في نفس السنة


١- MG3

عربية اثبتت كفاءتها في السوق المصري العربية للشركة الانجليزية العريقة MG بس حاليا بقت صيني شكلها حلو و سبور لو انت لسه صغير او حتى معاك عيلة بس صغيرة في بداية حياتك . العربية بمحرك 1.5 و 107 حصان و اتوماتيك . على نظام الحماية فالعربية فيها abs و ebd و فيها airbag امامي بس و فوانيس ضباب على سبيل الكماليات العربية شباك كهربا و فيها فتحة سقف و جنوط رياضية و طبعا aux و cd و usb العربية بالفئة دي ب 110 الف جنيه . حلو جدا !

0ee887cc-0151-48f9-a674-93767ee006ed.jpg

٢- رينو ساندرو

العربية اللي تعتبر منتشرة جدا في مصر لو بتفتكر في البيع قبل ما تشتري ( مش صح انت مش ضامن بكره )
المهم العربية 1.6 سي سي و ١١٠ حصان العربية استهلاكها للبنزين يتحط في المتوسط ب ٧.٢ لتر/ ١٠٠ كيلو
العربية فيها abs و ebd و airbag قدام و جنوط رياضية و شاشة داخلية ب aux و cd و usb و gps العربية عالية عن الارض ترحمك من المطبات اللي معمولة بالطول في مصر دي
كان سعرها معقول الاول ب ١١٦ بس ضربت مرة واحدة ل ١٤٨ الف لأعلى فئة اللي اتكلمت عنها عامة لسه سعر معقول على امكانيات العربية اللي من تجربة عربية كويسة جدا للسعر .
اختها رينو لوجان نفس كل حاجة ارخص ٣ الاف مش حوار بس مش هاتشباك فمش هتكلم عنها كتير عامة لو هتشتري لوجان هات دي على الاقل شكلها اشيك و هي اراء اراء .

sand.jpg

٣- ستروين سي اليزيه

العربية الرايقة تنفع للعائلات جدا عربية شكلها من بره كلاسيك و يدي luxury حلو و ثابتة بمحرك ١.٦ سي سي و ١١٦ حصان و اتوماتيك طبعا بردوا على سبيل الحماية فيه abs و ebd و airbag و esp مرايات كهربا و aux و cd و usb عيب العربية  شكل دخلة العربية كئيبة بالنسبة ليا و بتستهلك بنزين بمعدل ٨-٩ لتر / ١٠٠ كم لو عجبتك الدخلة عربية محترمة جدا و راسية على الطريق هي عامة مش ليك لو انت شباب يعني هي عائلي اكتر العربية ب١٥٠ الف .

ccc.jpg

٤- فيات لينا

لو مستعد تسوق مانويل الشركة الايطالية فيات لسه منزلة عربية جديدة للسوق المصري مؤخرا العربية بمحرك ١.٤ سي سي و ١١٠ حصان بردوا فيها abs و ebd و airbag و esp فيها usb و aux و cd لسه مفيش معلومات كفاية مستهلكة للبنزين و لا لا. العربية شكلها كويس كمان من جوا و من بره عيبها المانويل زي ما قولت في زحمة مصر لو انت بتحب المانويل ( اعرف ناس بيحبوا المانويل ) العربية دي احسن عربية مانويل في السوق دلوقتي كان في المعرض السيارات الاخير في مدينة نصر و شدة عين كل الحضور و كل التعلقيات كان تحسر انها مانويل بس

5c108d9f-c461-4538-9e92-32e1cff14baf.jpg

lin.jpg

فيه في نفس الرينج اتراج و صني و افيو حلوين بردوا لسعرهم بس انا مبحبهش من غير سبب و فيه هيونداي grand i10 هي حلوة بس سعرها عالي قوي على اللي تستحقه اخرها ١٠٠ الف و فيه بريليانس v3 بس فقيرة جدا من جوا مفيش aux مفيش بلوتوث مفيش usb تقريبا لازم تمشي ب cds بقى و بردوا فيه بيجو 301 دي متقربش منها لو عايز تحافظ على عمودك الفقري !