بالأرقام .. القيمة المضافة رخصت أسعار العربيات !

أحمد صلاح

لو بتفكر تشترى عربية تريحك من المواصلات وقرفها او متابع اسعار العربيات وبتسأل عنها باستمرار هتلاقى انها كل يوم بسعر !! فعلا .. مش بس سعر الدولار الى كل يوم بسعر بيأثر فيها لا .. فى اليومين دول الجديد والنغمة الى بيرددها كل تجار العربيات او التوكيلات هى " ضريبة القيمة المضافة " سبب فى ارتفاع الاسعار !! طيب هل ده حقيقى وزى ماسمعنا ان ضريبة القيمة المضافة هاتزود اسعارها ؟ تعالو اشرحلكم الموضوع ببساطه خالص 

unnamed-8-.jpg


الى مايعرفش او مش فاهم ايه ضريبة القيمة المضافة دى هى ببساطه كده كل حاجه كنت بتشتريها كان بيبقى عليها ضريبة اسمها " ضريبة المبيعات " وكانت قيمتها ثابته على الحاجه الى بتشتريها دى بنسبة 10% ثابته .. ودلوقتى عايزين يعملو ضريبة القيمة المضافة دى تكون بديل لضريبة المبيعات مع اختلاف نسبه الضريبة طبعا مع اختلاف كل مرحله فى انتاج السلعة ... ماعلينا المهم دلوقتى الضريبة قريب اوى هاتطبق .

وبالنسبة للعربيات الى حضرتك هتشتريها هما مقسمنها للاتى

العربيات الـ 1600 سى سى او أقل

ودى ضريبة المبيعات كانت %15
بعد تطبيق القانون هتكون ضريبتها ( 13% ضريبة قيمة مضافة + 1% ضريبى جدول +.1 % لكل 100 ) يعنى اجمالى الضريبة من الاخر هاتكون 14.1 %
بالظبط كدا يعنى المفروض ان الضريبة هاتقل بنسبة %0.9
يعنى لو حضرتك مثلا رايح تشترى عربية فيرنا وسعرها 120 ألف المفروض سعرها يقل (1080 جنيه ) ويكون سعرها 118920 جنيه

in_ext_rbi_front_view.png

العربيات الـ 1601 سى سى لغاية الـ 2000 سى سى

ودى ضريبة المبيعات كانت %30
بعد تطبيق القانون هتكون ضريبتها ( 13% ضريبة قيمة مضافة + 15% ضريبى جدول +15 % لكل 100 وزيادة الضريبة الـ 13% على الـ 115 ) يعنى اجمالى الضريبة من الاخر هاتكون %29.95
ودى طبعا هتكون مش محسوسه اوى بس برده لازم تعرف ان الضريبة الجديدة مش هاتزود اسعارها

العربيات الاعلى من 2000 سى سى
وهنا قسموها الى جزئين العربيات المصنوعه محليا والعربيات المستوردة

العربيات اعلى من 2000 سى سى ومصنوعة محليا

ودى ضريبة المبيعات كانت %45
بعد تطبيق القانون هتكون ضريبتها ( 13% ضريبة قيمة مضافة + 15% ضريبى جدول +15 % لكل 100 وزيادة الضريبة الـ 13% على الـ 115 ) يعنى اجمالى الضريبة من الاخر هاتكون 29.95 % يعنى اسعارها هاتنخفض 15.05 % عن الضريبة القديمة
يعنى لو عربية ب 500 الف جنيه بالشكل ده المفروض تكون 425 ألف

العربيات اعلى من 2000 سى سى المستوردة

ودى ضريبة المبيعات كانت %45
بعد تطبيق القانون هتكون ضريبتها ( 13% ضريبة قيمة مضافة + 30% ضريبى جدول +30 % لكل 100 وزيادة الضريبة الـ 13% على الـ 130 ) يعنى اجمالى الضريبة من الاخر هاتكون 46.9 % يعنى اسعارها هاتزيد 1.9 % عن الضريبة القديمة
( ودى العربيات الـ الضريبة هاتزود أسعارها )

unnamed-10-.jpg

انما سيارات المعاقين ونقل الموتى هتعفى من الضريبة تماما

وبالشكل ده لازم تبقى فاهم لما تروح لصاحب الاجانس الى هاتشترى منه العربية ويقولك مثلا الحق اشترى العربية قبل ما سعرها يزيد بعد ضريبة القيمة المضافة او لو قالك ان سعرها زاد بسبب الضريبة ... اعرف انه بيشتغلك والكلام دا مش صح دا طبعا فى حاله لو مش بتشترى عربيه فوق الـ 2000 سى سى وتكون مستورده


شارك هذا المقال: