مهرجان القاهرة السينمائي بيدّي أمل

محمد سامي

مهرجان القاهرة الدولى السينمائى هو واحد من أهم المهرجانات السينمائية على مستوى العالم وأول مهرجان فى الشرق الاوسط. أسسه الكاتب والأديب الراحل كمال الملاخ سنة ١٩٧٦. المهرجان بيلعب دور مهم فى إنه يحافظ على أهمية ومكانة مصر فى السينما لأنها من أول دول العالم اللي دخل فيها صناعة السينما. المهرجان بيعرض أفلام من أوروبا وآسيا وأفريقيا وأمريكا؛ التنوع دة بيدى فرصة للجمهور وضيوف المهرجان إنهم يكتشفوا ويتعرفوا على تجارب فنية مختلفة

المهرجان السنة دى قرر انه يكرم الفنانة الراحلة فاتن حمامة بأكتر من شكل:

١. البوستر الرسمى للمهرجان عليه صورتها

٢. تسمية الجائزة التقدرية بأسمها.

٣. إدارة المهرجان كلفت الناقد طارق الشناوى بتأليف كتاب عن فاتن حمامة و هيتم ترجمته باللغة الانجليزية عشان الحضور الاجانب يتعرفوا عليها

٤. ادارة المهرجان، برئاسة الدكتورة ماجدة واصف، اختاروا ٧ افلام لفاتن حمامة تتعرض فى أيام المهرجان و هما صراع فى الوادى، صراع فى المينا، دعاء الكروان، نهر الحب، إمبراطورية ميم، أريد حلًا، و يوم حلو و يوم مر.

و على عكس الصعوبة اللي بتواجه إدارة المهرجان كل سنة في إنهم يلاقوا افلام مصرية تمثل مصر فى المهرجان، السنة دي السينما المصرية بتشارك بـ ٧ أفلام منها الروائى الطويل زى " الليلة الكبيرة " تأاليف احمد عبد الله واخراج سامح عبد العزيز و فيلم " من ضهر راجل " بطولة آسر ياسين و ياسمين رئيس ومن تأليف محمد امين راضى (فى أولى تجاربه فى الكتابة السينمائية) واخراج كريم السبكى. الحاجة الملفتة للنظر إن الفيلمين من انتاج السبكى. بيشارك برضه فى المهرجان أفلام لمخرجين شباب و هما فيلم "الثمن" للمخرج هشام العيسوى و فيلم "فى يوم" للمخرج كريم شعبان وفيلم " هدية من الماضى: ٢٠ سبتمبرللمخرجة كوثر يونس  و فيلم " توك توك " للمخرج رومانى سعد ودول الأفلام التسجيلية الطويلة المشاركة فى المهرجان، وبالنسبة للأفلام الروائية القصيرة، بيشارك فيلم "الزيارة" للمخرج محمد كريم. حجم المشاركة دة بيعتبر من أكبر نسب المشاركة للسينما المصرية فى المهرجان من فترة طويلة و ده فى حد ذاته مؤشر مُبشر لمستوى السينما فى الأيام الجاية.  

الجدير بالذكر إن مهرجان القاهرة الدولى السينمائى السنة دى عامل لعبة الأفلام لدعم المهرجان على فيسبوك وصاحب الفكرة هو المنتج محمد حفظى؛ كلنا كنا بنلعب لعبة أفلام واحنا صغيرين و فيه مننا اللى لسه بيلعبها وهو كبير. لو انت من محبين السينما والأفلام بشكل عام ولعبة أفلام بشكل خاص، ممكن تلعب افلام و تدعم مهرجان القاهرة الدولى السينمائى. خلينى اقول لك إزاى؛ تصور نفسك ڤيديو لمدة ٣٠ ثانية بتمثل فيه فيلم او تلعب بدون كلام و تشارك الڤيديو على فيسبوك بهاش تاج #لعبة_الافلام و #showmeyours و #ciff37. شارك فى لعبة الافلام الخاصة بالمهرجان كتير من الفنانين زى كريم فهمى و مادلين طبر وعلى الجمهور إنه يعرف اسم الفيلم و يكتبه فى comment على فيسبوك

https://www.facebook.com/CIFFEGYPT/videos/411103985763474/

الدورة الـ٣٧ لمهرجان القاهرة الدولى السينمائى هتبدأ يوم ١١ نوڤمبر و تستمر ليوم ٢٠ نوڤمبر فى دار الاوبرا المصرية. 

وده جدول بمواعيد الأفلام اللي هيتم هرضها خلال المهرجان: 

http://ciff.org.eg/en/info/schedule


شارك هذا المقال: