بعد إعتزال شيرين .. أغانى مش هينساهلها أى راجل

فريق راجل. دوت كوم


فاجئتنا المطربة شيرين عبد الوهاب بإعلان خبر إعتزالها الفن بشكل نهائي بجميع أنواعه ، وده كان صدمة كبيرة لجمهور شيرين الكبير فى مصر والعالم العربي واللى تعتبر بتتربع على عرش الغناء فيه وواحدة من أهم مطربات القرن الجديد ، وبعض الناس بتشكك فى قدرة شيرين على الإستمرار فى القرار ده وإنها ممكن ترجع عنه فى أقرب وقت ، لكن لو ده حصل فعلاً فصوت شيرين لايمكن يتنسي ، وأغانيها اللى كل الناس بيرددوها هتفضل عايشة ، وتحديداً الرجالة عمرهم ماهينسوا إن شيرين هي أول واحدة خدت على عاتقها ( تأديب ) الراجل فى أغانيها لو صح التعبير ، عن طريق إختيارها لكلمات قوية دايماً بتقول إن الست ممكن تستغنى عن الراجل وتخرج من فشل العلاقة بسلام ، أو إنها تكون الطرف الأقوي ، ودى مجموعة من الأغانى اللى لا يمكن اى " راجل " ينساها لشيرين :



 " أنا بيك من غيرك ... مش فارقة "
آه يالييييل .. قنبلة شيرين اللى وصلتها بسرعة الصاروخ للشهرة والنجومية ، وكانت صدمة للجمهور المصري إن بنت تطلع بمنتهي القوة تغني لحبيبها كلمات صادمة زى دي مع لحن مفرح ومبهج ساهم فى انتشارها بشكل كبير ، وبقت شبح بيطارد اى راجل بيهدد الست إنه يسيبها فيترد عليه بمنتهي عزة النفس ( ليه فاكر إن الدنيا ف بعدك مفيهاش ولا قبلك ولا بعدك ؟ )



" متحاسبنيش...على ذنب عملته إنت "


لطمة جديدة وجهتها شيرين فى أغانيها للراجل الخاين ، واللى بيندم على الخيانة وبيبقا عاوز يرجع المية لمجاريها تانى ، ولكن بعد فوات الأوان ، فترد عليه شيرين " أنا رافضة أرجعلك بعد خيانتك ليا مفيش..متحاسبنيش على ذنب عملته إنت ياحبيبي" ، الخيانة موضوع اتناقش فى أغاني قبل كدة ولكن " متحاسبنيش " إنتشرت بسرعة الصاروخ وبقت تطارد أى راجل خاين فى أحلامه وكلمة " منك لله " بصوت وأداء شيرين بقو عنوان لعلاقات كتيرة بالشكل ده ..



" قولوله لسه عايشة وكل شئ حلو ف عينيا "


تستمر " شيرين " فى قيادة مشاعر الأنثي بمنتهي القوة حتى بعد إنتهاء العلاقة ، ورفعت شعار " لا تراجع ولا إستسلام " ومفيش حاجة إسمها قلبي هيحن بأغنيتها المشهورة " قال صعبان عليه " واللى الراجل فيها بيحاول " يجر ناعم " تانى ولكن بيتقابل برد صادم : ( قولوله لسه عايشة.. وكل شئ حلو ف عينيا ) ومش بس كدة ، دى كمان بتقطمه وبتديله كلمتين يوجعو ( قولوله قالت ذوق حساس .. قولوله بس الكلمة دى بس ) ، علشان تحط شيرين دستور جديد فى إنهاء العلاقات وتحذر أى راجل إنه يستهون بمشاعر واحدة ست ..



" وبناقص حياتى معاك "


من جبروت شيرين إنها كمان عملت دويتو مع راجل ( بهاء سلطان ) كلماته كانت قاسية جداً ، ورغم إنها أغنية من راجل وست يعنى طبيعى تكون موجهة للرجالة والستات ، لكن كل الجمهور إعتبرها أغنية شيرين والكلام على لسانها موجه لكل الرجالة !
" إنسي اللى فات خلاص ده فات .. كتر المرار ياحبيبي ضيع عمرنا ، وانا قلبي مات مبقاش يهمه بعدنا " ... كلام قوى جدا وبيزود حالة الإستبياع اللى شيرين كبرتها جوة كل بنت بتحبها وبتسمع آغانيها وبقت جملة مشهورة على لسانهم كلهم " وبناقص حياتى معاك "


" أخيراً أنا دلوقت .. هعلى صوتى عليك !"


ياسلاااام .. قال يعنى كل اللى فات كان صوتها واطي .. أخيراً اتجرأت واحدة من احلى وأهم أغاني شيرين رغم معانيها الصادمة كالعادة للرجالة ، واللى خلاها اتقابلت بهجوم شديد واتهموها بالتحريض على " خراب البيوت " علشان كمان ده ضد عادتنا الشرقيه وكفاية جملة "  وإن كان فى حاجة زمان فى سري قلتها ، جه وقتها علشان أقولها بعلو صوتي " تهديد صريح يامعلم بنشر القديم والجديد ، والغريب إن الغنوة رغم كل التحفظ على جرأتها وقت مانزلت إلا إنها نجحت وغنتشرت بشكل كبير وإتحورت كلماتها لحجات كتير كان أشهرها " أخيراً إتطلقت " و " أخيراً إتخرجت " وكانت بتتقال بنفس لحن وطريقة شيرين ...


شارك هذا المقال: