كيف تهزم الملل بقوة الانترنت

عمرو موسى

 

كل واحد منا بيجي عليه أوقات كده بيحس إنه فاضي، حتى لو وراك 100 حاجة المفروض تقوم تعملها، شغل أو مذاكرة، بس بتبقى عايز تفصل كده شوية وتعمل حاجة جديدة، أنا عن نفسي طول ما أنا فاتح فيسبوك وتويتر كل أما أشوف لينك لمقالة أو فيديو يعجبوني بس مكنش قادر أقراه أو اتفرج عليه في ساعتها، بعمل save link، ولما ييجي وقت أحس إني فاضى فيه أبتدى أقلب في اللينكات دي وأشوف إيه اللي حابب أشوفه دلوقتي، ساعات كتير الحكاية دي بتبقى لطيفة، ممكن تبقى تجربها، ولحد أما تجرب تعمل كده أنا جبتلك 7 حاجات عشوائية ممكن تعملها على الإنترنت وانت فاضي

 

 اختبر ذكائك

 

http://www.iqtest.com/

 

ده موقع من خلاله بتقدر تجرب ال IQ Test وبتقدر تختبر فيه ذكائك، بيعتمد على قدرتك الحسابية والتركيز بشكل عام، وبيبعت لك نتيجة الإمتحان على الإيميل

 

 العب مع اكيناتور

 

http://ar.akinator.com/

 

فكرة الموقع إنه بيطلب منك تخمن شخصية مشهورة وماتقولش اسمها، وبيسألك شوية أسئلة عامة زي مثلا هل الشخصية دي راجل ولا ست؟ بتمثل أو بتغني؟ أكبر ولا أصغر من 50 سنة؟ وفي معظم الأحيان في أقل من 10 اسئلة بيكون خمن الشخصية اللي في دماغك واللي في الغالب بيبقي تخمينه صح، ممكن تقول ده هبل بس هو فعلًا دقيق جدًا، أدخل جربه وحُط أي شخصية في دماغك، من أول كاتي بيري لحد عمرو الليثي

 

 

 إتعلم إزاي تربط الكرافتة

 

http://www.tie-a-tie.net/

 

تعرف إن من أكتر الاسئلة اللي بتتسأل علي جوجل إزاي تربط الكرافتة أو How To Tie A Tie؟ علشان كده فيه عشرات المواقع كل اللي بتعمله إنها بتشرح لك بخطوات بسيطة إزاي تربط الكرافتة، وبكذا شكل وطريقة كمان

 

 موقع مالوش لازمة

 

http://www.theuselessweb.com/

 

 

الخيار ده بقي ماتلجألوش غير لما الفراغ يكون قتلك، علشان لما بتدخل علي الموقع ده بتلاقي زرار كل مرة بتدوس عليه بيوديك علي موقع مختلف ملوش لازمة فيه صوت بطة، شجر بيقع، تقعد تلعب بالماوس علشان تنزل حاجات من السحاب، وهكذا.. لو فعلا زهقان، هتتسحل جامد في الحاجات اللي زي دي

 

  

 TED

http://www.ted.com/

 

تيد هو مؤتمر عالمي بيتعمل في كذا مدينة ومكان حول العالم، بيطلع يتكلم فيه ناس مختلفة في كل مجالات الحياة وبيحكوا قصص مختلفة، فيه ناس بتحكي قصص هتتبسط وانت بتسمعها وممكن كمان تكون ملهمة ليك، كمان معظم الفيديوهات بيبقي لها ترجمة

 

 

 تقرا مقالاتي

 

http://www.ragel.com/Writer/Amr-Moussa

 

ممكن كمان لو عجبك المقالة دي تقرا باقي مقالتي، هتلاقي أكتر من 42 مقالة بتتكلم عن مجالات مختلفة زي التكنولوجيا، الرياضة، الترفيه والفن

 

 

 

 

 


شارك هذا المقال: