بالصور .. إزاى تحجز فندق ONLINE من غير ما يتضحك عليك

أحمد صلاح

طرق كتير ممكن تحجز من خلالها زى :

- بوست على الفيس وده غالبا هيكون من شركات سياحة وبتبقى متعاقده مع فنادق معينة واهم مميزات الطريقة دى هيا ان ( السعر بيكون كويس وعدد ايام الاقامة بتكون كتير , بيكون فى الاغلب شامل الانتقالات )

أما عيوبها تعالو اشرحهالكم فى مثال عملى زى البوست ده الى ممكن تلاقيها على الفيس كأعلان

1.png

طبعا لما تشوف اعلان زى ده وتتفرج على الصور هاتتوهم .. وتقول ياااااااه مرسى مطروح واليوم ب 250 جنيه يابلاش .. بس لو اخدت من وقتك دقيقة ودخلت على جوجل ودورت على اسم الكوباوند ومكانه عشان تشوف اراء الناس فيه .. هتلاقى الصدمة الكبيرة زى ما الناس الى فى الفيديو دا سافروا واتخدعوا فيه ..

وفيه كمان خدعة كبيرة المعلن مابيقولهاش فى الاعلان وهي ان اغلب الاعلانات دى بيكتبوا سعر الفرد فى الاوضه يعنى لو رايح انته وواحد كمان ومكتوب فى الاعلان السعر 300 يبقه انته هاتدفع 600 جنيه .. فاسأل الاول السعر ده للفرد ولا للأوضه كامله فى الليله .

- الطريقة التانية للحجز ..

مواقع الحجز الكبيرة زى ( booking.com – hotels.com – trivago.com -hotelscombined.com)

ازاى بقه تعرف تحجز بنفسك وتاخد بالك من ايه عشان ماتنخدعشى وتعرف تختار افضل عرض

2.png

واجهه اى موقع من مواقع الحجز بتكون زى الصورة دى بتكتب أسم المكان الى ناوى تروحه مثلا ( الغردقة , مرسى مطروح , العين السخنة ) وتكتب تاريخ الوصول وده تاريخ الشيك ان فى الفندق وغالبا بيكون الساعة 12 الضهر , وتاريخ المغادرة وعدد الافراد ..
( حاول تختار وانت بتبحث تاريح المغادرة بعد تاريخ الوصول بيوم عشان تعرف تكلفة اليوم بكام )

اول ماتعمل بحث هيطلعلك النتائج بالشكل التالى :

3.png

طيب هاتركزوا فى ايه فى كل فندق فى الحاجات دى :

4.png

- التقييم الى على الشمال فوق

( ده مهم جدا جدا لان التقييم ده من الناس الى راحت الفندق وبيبقه التقييم من 10 نقط ومش بس الرقم هوه الى مهم لا لا الاهم من ده انك تدخل على التقييم وتقرا بنفسك التقيمات والتعليقات ومن خلالها انته الى هاتقرر بنفسك اذا كان الفندق ده هينفعك ولا لا ) وغالبا بتبقه حاجات مهمة وانته مش

بتكون واخد بالك منها فى الاعلان ( زى مساحة البسين – قرب الشاطىء من الفندق – هل الشاطىء به صخور ام لا – جودة وتنوع الاكل – جراج لعربيتك )

وده مثال للتقييم ده

5.png

- وجبات الفندق
هل السعر المعروض ده هيكون شامل وجبات ولا لا .. شامل افطار او افطار وعشا او شامل كليا ( وده يعنى 3 وجبات ) .. يبقى لازم تبص وتاخد بالك عشان لما تقارن بين الاسعار تكون مقارنة سليمة

- عدد نجوم الفندق
ناس كتير بتهتم بعدد النجوم ده لو هيا مهتمة بأن يكون الفندق فيه ( سبا , جيم , خمور ... ) وطبعا الخمس نجوم بيكون سعره اعلى مقارنة بالاربع والثلاث نجوم
بس انا انصحك تدور على الـ 4 نجوم لان النجمة الخامسة دى ممكن ماتكونش محسوسة بالنسبالك وهتاخد سعر حلو كمان
حاجات مهمة جدا وممكن تنخدع فيها وانته بتحجز
قبل ماتتورط وتحجز خلى بالك بعض الفنادق بتكتب اسعارها بدون الضريبة وفيه بعضها السعر بيبقه شامل الضريبة

طيب دى تعرفها ازاى ؟؟
تدخل على الحجز وتشوف الفاتورة المبدئية بتاعت الدفع وهتلاقى حاجه من الاتنين ..

6.png

لو ظهرتلك الضريبة ورسوم الخدمة وضريبة المدينة بالشكل ده فاعرف انك هتدفع نفس المبلغ ... 

7.png

انما لو ظهرت الضرايب بالشكل ده ( غير مشمولة ) اعرف ان السعر ده مش شامل الضريبة يعنى مثلا فى الصورة الى فاتت دى الفندق ب 489 بعد الضريبة هتلاقى نفسك دافع هناك 601 جنيه ..

- اعرف مكان فندقك فين ؟

هتلاقى تحت الاسم العنوان وهل هوه قريب من المدينة ولا لا ...

8.png


لانك ممكن تكون حاجز مثلا فى الغردقة وتلاقى الفندق فى سفاجا .. فخلى بالك اعرف الفندق فين وهل هوه قريب من المدينة ولا لا عشان لو عايز تخرج من الفندق .. ولو تعرف تجيبة من ال gps يبقى احسن.

- انت حاجز فى شقة ولا فندق ولا شالية

9.png

ركز وشوف مكتوب تحت اسم المنتجع الى انته رايحة ايه .. حصلت مع ناس كتير .. كانت مثلا حاجزة فى بورتو العين السخنة وكانت منتظرة انها تقيم فى الفندق ولما راحت هناك طلع ان االحجز فى شقق تابعه للبورتو وتبعد عن الفندق ب 2 كيلو .
  فركز كويس وانته بتحجز عشان ماتنخدعشى وتتبسط فى أجازتك  


شارك هذا المقال: