لو خاطب جديد وهتزور بيت خطيبتك

فريق راجل. دوت كوم


بص يا سيدى ياللى لسه داخل علاقة خطوبة جديد ، وناوى تزور خطيبتك وأهلها كالعادة لازم تبقا واخد بالك من شوية حاجات ممكن لو معملتهاش صح لا قدر الله الجوازة تبوظ :

1 – المعاد :

من الأفضل إنك تثبت معاد كل أسبوع أو كل اسبوعين ، يعنى مثلا كل جمعة أو كل سهرة خميس أو أى معاد يناسبك علشان هم ميتفاجئوش ويظبطوا نفسهم ومواعيدهم على معادك ... بلاش مفاجآت

2- المدة :

بلاش البرشطة بالساعات فى بيت خطيبتك ، يعنى مترحش العصر تروح الفجر ! حاول تظبط ان أخرك يكون 3 ساعات بالكتير من وقت وصولك علشان تبقا خفيف خفيف والناس تعرف تاخد راحتها

3- ايدك متبقاش فاضية :

على قد ماتقدر أدخل عليهم كل مرة بحاجة ، ولو ظروفك مش ولا بد أو بتحوش علشان الجواز قسم الفلوس على عدد مرات الزيارات ...يعنى لو انت عامل ميزانيه 200 جنيه مثلا فى الشهر لزيارات خطيبتك وبتروح كل اسبوع هات ف ايدك حاجه بـ 50 جنيه ، مهما كانت بسيطة بس هتفرق ( ده مبيدخلش علينا إيده فاضية )

4- نص بطن

لو معزوم على الغداء أو العشاء عندهم متدبهاش أوى ، حاول تاكل نص بطن وتقوم ، الانطباعات دى بتفضل عندهم ورغم انهم ممكن يزعلو لو مكلتش كويس بس برضو احساس انك مش شخص مفجوع هيطمنهم على بنتهم

5- ان شاء الله وألف ألف مبروك

دايماً وانت قاعد فى بيت خطيبتك مع اهلها كلمهم عن خطواتك الهايلة فى تحقيق حلم الشقة والتشطيب وترتيبات الفرح حتى لو كل ده هجص ، هم بيحبو يسمعوا الكلام ده اوى ولو مسمعتهمش ده بمزاجك هيسمعوك كلام زى السم من تحت لتحت وكله تلقيح يامعلم


شارك هذا المقال: