نصيحة من ست : تعمل إيه لو طبيخها يقرف؟

دينا حشيش

قبل ما أكتب المقال، لازم أقولكم إني بجد حاسة بيكم. حاسة بمشكلتكم لأن للأسف أنا من الستات اللي هتكلم عليهم. الستات اللي ربنا مرزقهمش بنعمة النفس الحلو، والقدرة على ابتكار محمر ومشمر من أي مكونات في السوبر ماركت، الستات اللي بجد بيحاولوا يتفننوا بس لازم يحرقوا إديهم وحيطان المطبخ.

maxresdefault.jpg

لو إنت واحد من الرجالة الكثيرة اللي ربنا مش كاتبلهم أكله بيتي حلوه بعد يوم شغل طويل، مش لازم تتخانق وتعسف مراتك لأن ده قدر وابتلاء ولازم كرجل عملي ومؤمن تستحمل نصيبك. طيب هتعمل إيه لو طبيخها يقرف؟ هتعمل الأربع حاجات دول:

الشكوى تقل

بص أنا هاقولك حاجه، تفتكر لوإتخانقت مع إبنك علشان يرسم عربيه شبه العربية مش شبه الطرابيزة هيعرف لو هو مش موهوب؟ طيب لو زعقت لموظف علشان معرفش يحسب ٢٥٠ في ٧٠ بسرعه، تفتكر بقدرة قادر هيعرف يحسبها تاني مرة لو الحساب مش لعبته؟ أكيد لا. أهو الطبيخ كده بالضبط. يا جات من عند ربنا، يا ماجتش. المهارة في المطبخ قسمه ونصيب.

WIFI_S02_E22_3_MAG.jpg

استسلم

مهم أوى إنك متضيعش سنتين من جوازتك مقتنع إنها لو إتفرجت على برامج طبخ، أو لو مامتها وحماتها علموها الطبيخ هيحصل فرق محسوس. أخرها بدل ما الأرز ما كان بيطلع طري، ممكن تضبطه، أو الشربة المملحة تبقى بقدرة قادر تتشرب من غير ما تجزعلى أسنانك. لكن إنسى جو إنك هتلاقى صينيه مكرونه بالبشاميل أو بيكاتا مستنيك علي السفرة. حتى لو أخدت كورس طبيخ، هتتعلم أكلتين تلاته حلوين ومش هتأكلك غيرهم طول عمرك. صدقني هتستريح في حياتك أما توقعاتك تبقى واقعيه.

maxresdefault-1-.jpg

العند

طبعا لأن الرجل بطبعه مثابر وصعب على تركيبته الجينية إنه يستسلم، ممكن يعاند مع زوجته الغلبانة اللي كل يوم بترمي الغداء علشان مبيتاكلش. حضرتك سيناريو حياتك هيكون كالأتي، الست مش فاهمه ليه الأكل يقرف، هتفتكر إن لو راحت سوبر ماركت غالى وحاجته مستوردة زي سعودى أو جورميه، إن طعم الأكل هيكون أحلي.

تبدأ تصرف على بهارات عمرنا ماسمعنا عنها ولحوم غزال وجمال وفي الأخر برضه النتيجه كارثيه. كده إنت مفلس وجعان، وثقتك فيها هتخليها تتهور أكتر وتجرب تعمل ملوخيه وإنت عارف الملوخيه الراقده بتعمل إيه في العلاقات. لو عايز تتطلق دي مشكلتك بقى.

11173444_853922471366457_2000839719_n.jpg

الحلول

ليه تاكل ملوخيه صايصه ولحمه كاوتش وتبهدل قولونك وضغطك لما يبقى في بدائل. هما تلات حلول والجانك فوود والديليفري مش منهم. أول حل تجيب حد في البيت يطبخ أكل للأسبوع كله وتحطه في الفريزر. أوعدك مش هتحس بالفرق. تاني حل تقنع مامتك أو حماتك إنهم يعملولكم كام طبخه تعدوا بيها الإسبوع. تالت حل إنك تجرب صفحات فيس بوك الجديدة اللي تقدر من خلالها تطلب أكل منزلى. طبعا ده حل مكلف بس هينقذ جوازتك. مش لازم تأكل من إيد مراتك، المهم إنك تنام شبعان.

ana-me-albalad-dee.jpg

بالنيابه عن ستات العالم إحنا أسفين، بس مش بإيدنا والله. دي موهبة ربنا حرمنا منها.


شارك هذا المقال: