تعمل إيه لو حبيبتك بتحب شغلها ؟

دينا حشيش


زمان ستات كتير كانت بتشتغل مضطرة، ومعظم مواليد السبعينات والثمانينات كبروا في بيوت عادي فيه إن أمهم تكون ربة منزل.
دلوقتي نادرا لما تلاقي بنت ناويه أو راضيه بقعدة البيت بعد التخرج من الجامعة... الشغل والكاريير أصبحوا جزء بيكمل البنت وبتحس من غيره إنها مقصرة.
حتى الست اللي بتقول في سرها إن بعد الجواز هترييح وتعد في البيت، بتيجي بعد كدة تندم وتبقى دايما مستنية اليوم اللي ولادها يكبروا فيه علشان ترجع الشغل.

taymourwashafiqa-medium.jpg

ضيف بقة على كل اللي فات الراجل اللي في حياتها. في معظم الأحيان الرجل في بداية العلاقة بينبهر بالست اللي لها كيانها وروتينها وإهتماماتها اللي بتدور عليها، مش كل شغلها الشاغل الراجل.
لكن للأسف زي ما شغلها بهرك في الأول، في الأخر بيتحول لمشكلة.

الشغل واخد معظم وقتها وفكرها

56f05700f19f6.jpg

البنت دلوقتي حلمها أما تكبر مبقاش إنها تلاقى فارس الأحلام اللي يستتها ويوديها المول كل يوم. الست فى الزمن ده عايزة تبقى مديرة، دكتورة، مهندسة، مصممة أزياء أو وزيرة. فطبيعي إن الحلم اللي شغالة عليه عمرها كله يأخذ حيز كبير من تفكيرها.

الغلطة اللي كل الرجالة بتعملها هي إنهم ياخدوا الموضوع بطريقة شخصية، ويترجموا إهتمامها بشغلها بإنه عدم إهتمام بالراجل. ده أبعد مايكون عن الحقيقة، هي بتحبك ومهتمه بيك، بس زي ما إنت عندك جزء في حياتك بتاعك إنت بس، هى كمان طموحها أصبح واحد من الأركان الأساسية اللي

بتكون شخصيتها، من غيره هتحس بالضياع مهما كان شغلها تافة بالنسبالك. إفصل ما بين حبها لشغلها وحبها ليك طالما لكم وقت كافي تقضوه مع بعض. حط نفسك مكانها وإنسي الأفكار والستريوتايب اللي المجتمع الشرقي حطها في دماغك من وإنت صغير.

الشغل مؤثر على تربية العيال

33.jpg

معروف إن الأم العاملة بعد ما إبنها بيتم سنتين، مفيش قانون عمل بيساعد وضعها. فلو المدير غير متفهم، مفيش حاجة إسمها مرواح من شغل خاص قبل الساعة ٥ مساءا على الأقل. ده طبعا بيسبب أزمة للراجل. بس مش كل ست نازلة تشتغل بتسلى وقتها. في بيوت محتاجة دخل الأب والأم، بالذات بعد التغيير المرعب في الأسعار اللي بنشوفه كل يوم.

حاول تتقبل الوضع لو مثلا أتوبيس المدرسة نزل الأطفال عند الجدة على ما تخلصوا. ممكن الست تبدأ تدور على شغل بارت تايم وده بقة موجود كتير حاليا لأن الشركات عايزة توفر في المرتبات، أو تلاقي شعل بمواعيد عمل أنسب وطبعا تبقى الست متقبلة إن ده هييجي على حساب المرتب. أهم حاجة متقولهاش أقعدى في البيت، غير لو فعلا الموضوع قلب إنها سايبة التربية للجدود والمربيات.

شعور الراجل بالغيرة

1455794995915.gif

لازم تخلي بالك إنه للأسف ستات كتير أول ما تلاقي الراجل مش عاجبه شغلها، تقولك ده غيران ومهدد من نجاحي. سعات بيكون صح، لأن الراجل ربنا خالقة هو الموفر اللي في بداية الخلق كان ينزل يصطاد لأنه قوي البدن ويرجع بالأكل لمراته اللي قاعدة بالعيال. هو الراجل تركيبته الجينية كدة، فغصبا عن جيناتك مش قادر تتحمل فكرة إن الست بتوفر زيك لأنه قد يحسسك بالعجز.

لكن مش دايما الراجل بيكون غيران. انت عارف انها هتحبك أكتر ميت مرة لو ساندتها وشجعتها، وبتعمل كده، بس سعات للأسف توع الشغل بيبقي مش ماشي مع فكر الراجل، فلازم يتكلم، والمشكلة ان إحتمال كبير يتقال عليك غيران، فلازم وإنت بتشرح للست تبعد نفسك عن الكادر ده تماما ومتديهاش فرصه تحطك فيه. 

الضغوط النفسية على الست

2009_07_05_0000.jpg

الشغل بعد الجواز بيبقى ضغط نفسي بشع على الست اللي بتحاول ترضي جوزها، وعيالها، ومديرها، وأحلامها. حاول تبقى الجانب الإيجابي في المعادلة الصعبة اللي كل ست بتواجها. اللي عايزة أقوله إن قبل ما تكسر الست وتقولها سيبي الشغل وأقعدي ربي عيالك، خدها بالهدوء، لأن أولا، إنت أول واحد هتكرة عيشتك لو فضيتلك.

ثانيا، في الزمن اللي إحنا فيه ده، لازم تكون ظروفك المادية كويسة أوي أوى علشان تقدر على مصاريف البيت لوحدك، مرتبها علي الأقل هيشيل مصاريفها الشخصية.

ثالثا، إستوعب إن مش كل ست إشتغلت كل همها الفلوس، فيه عامل أقوى إسمه الطموح.

رابعا، أنا مبقولش إنها ترجعلك ١١ بليل وتنسى العيال وإنت تستحمل، بالعكس هي لازم تدور على شغل يناسب ظروفكوا كعيله. يعني إتقابلوا في النص لأن الست اللي إنبهرت بيها وحبيتها بسبب بشخصيتها وكاريرها هتختفي لما تقعد في البيت.


شارك هذا المقال: