كنز " دهب " فى موبايلات أبل القديمة

عمرو موسى


اتنشر تقرير بيقول إن أبل قدرت تطلع دهب من أجهزة الأيفون القديمة بما يوازي 40 مليون دولار, مش كدة بس, دول كمان طلعوا بلاتينيم ونحاس بقيمة 6 مليون دولار, حصل إزاي الكلام ده؟

أعلنت أبل من فترة عن نظام ال Recycling الجديد وهوا إمكانية إن لما الأيفون بتاعك يبوظ أبل تشتريه منك ويدوك فلوس بداله عشان متروحش ترميه في الزبالة وتلوث البيئة بالنفايات الإلكترونية عشان دي بتضر البيئة بشكل كبير, طب أبل بتاخد الأيفون القديم تعمل بيه إيه؟

أبل بتاخد الأيفون القديم تفكه حتة حتة بمساعدة روبوت إسمه Liam شغلته إنه يعمل كده, وبعد كدة بتاخد المواد الخام تستخدمها في تصنيع الأيفون الجديد, ولحد دلوقتي قدرت تطلع من الموبايلات القديمة دهب بقيمة 40 مليون دولار, طب ليه بيستخدموا دهب في الموبايلات أصلا؟


الدهب معروف إن المقاومة الكهربائية بتاعته منخفضة وده مفيد عكس النحاس, كمان مبيصديش, وفيه كذا ميزة تانية خليتهم يستخدموه في تصنيع لوحات الدواير الكهربية جوا الموبايل ويرجعوا يستخدموه تاني وتالت ورابع

مش جودة أجهزة أبل بس هيا اللي مخلياها من أكبر شركات التكنولوجيا في العالم, لكن دراستها لكل خطوة وتفكيرها في المستقبل هوا اللي مخليها في المقدمة من سنين فاتت, وده بيخليها دايما سباقة بمميزات مختلفة لعملائها وطريقة تصنع أجهزتها, واللي بعد كده بفترة بيبدأ منافسيها في تقليدها

وده أكبر مثال واضح علي كدة, بيحاولوا يوفروا في تكلفة التصنيع عشان يقدروا يقدموا للعميل جهاز عالي الجودة بسعر أقل, وفي نفس الوقت بيبصوا لقدام وعاملين نظام Recycling يقدروا يستفيدوا بيه وفي نفس الوقت يحموا البيئة, خطة في منتهي الذكاء


شارك هذا المقال: