أسباب تخلي "عمرو أديب" هضبة الإعلام المصري !

فريق راجل. دوت كوم


تصدر الإعلامى عمرو أديب مواقع السوشال ميديا الفترة الأخيرة بعد عودته من جديد لتقديم برنامج توك شو بعد توقف برنامجه الشهير القاهرة اليوم من فترة على قناة اليوم التابعة لشبكة أوربيت المشفرة ، ورجع عمرو ببرنامج كل يوم على قناة on E الجديدة التابعة لمجموعة قنوات On ...
ورغم كثرة الإعلاميين إلا أن فيه أسباب كتير تخلي عمرو اديب رقم 1 ومنها :

صوته :
عمرو أديب الشخص الوحيد اللى ممكن يقعد يزعق ويعلي صوته ويتكلم بنيرف عالى جداً لمدة ساعة ونص ولا ساعتين بدون توقف ، ومع ذلك أسلوبه ونبرته بيكونوا عامل جذب شديد لكل اللى بيتابعه !

02_02_15_02_37_-.jpg

ألفاظه :

دايماً عمرو أديب سقف ألفاظه فى برامجه عالى اوى عن اى اعلامي تانى ... ورغم وجوده 20 سنة فى قناة مشفرة إلا أن طريقة إنتقاؤه للألفاظ كانت أقرب للشعب المصري البسيط جداً .. ومن أشهر كلماته ( يا حلاااوة .. فلة شمعة منورة ..إلخ ) ده غير كمان بعض المصطلحات الغير لائقة على التليفزيون اللى ممكن يقولها وكان آخرها فى أول حلقات برنامجه الجديد لما قال عن النائب عجينة إنه عايز ( يشلح ) بنات مصر !

زملكاويته :
ناس كتير من أنصار فكرة عدم الإعتراف بإنتماؤهم الكروى علشان ميخسرش حد من الجمهور ، إلا إن عمرو أديب من المدرسة الأخرى تماماً ، بيجاهر بزمالكويته دايماً وعلى طول بيعقب على نتايح الكورة خاصة اللى بتجمع الأهلى والزمالك والجمهور كله بيستنى رأيه وتعليقاته الطريفة اللى كانت نابعة من عدم توفيق الزمالك قدام الاهلى لسنين ولكن شد حيله وبدأ ياخد بتاره بعد تحسن الفريق الأبيض

ضيوفه :
عادة الضيوف بتكون مكررة فى كل البرامج ومنهم برامج عمرو اديب ، ولكن فى أوقات معينة هتلاقي عمرو جايب ضيف من نوع مختلف وفى مكان مختلف وتوقيت عظيم ... قبل كده عمل حوارات مع رجل الاعمال حسام ابو الفتوح بعد خروجه من السجن بعد قضية الدعارة الشهيرة ومع رشيد محمد رشيد بعد هروبه ومع عائلة ساويرس لما كان فيه تهم ليهم بالتهرب الضريبي وأخيراً مع حسين سالم اللى ليه قضايا كتير مع الدولة ... دايماً عمرو أديب بيصنع الفارق !

14449751_1802970586653731_4461613646907076485_n.jpg

وطبعاً وجود عمرو أديب علي قناة مشفرة زود من نجوميته وخلى الناس كلها تتسابق علشان تتابعه على الانترنت او تستني مقاطع البرنامج على يوتيوب ، ودلوقتى الفرصة بقت متاحة للجميع لمتابعته يومياً بدون تشفير ... فهل هيفضل محافظ أديب على المكانة دى ولا مش هيقدر ؟


شارك هذا المقال: