خمس أسباب ممكن تخليك " أحمد بدير" فى نفسك

فريق راجل. دوت كوم


الفنان أحمد بدير بدأ فى الآونة الأخيرة بقا مثار جدل كبير جداً فى مصر لعدة أسباب ، وبقا من الشخصيات المتواجدة بقوة بشكل أو بآخر على الساحة الإعلامية مش بس بفنه ولكن بحاجات تانية كتير وده مخلى معظم الناس مضايقه منه شوية .. هنقولك على حاجات ممكن تضايق الناس منك على طريقة أحمد بدير :

• خليك فى مجالك ومتفتيش
لو إنت مهندس أو دكتور أو محاسب أو اى شغلانة ملهاش علاقة بالتدريس أكيد مش هتروح تشتغل مدرس ! لأنك لو رحت تشتغل مدرس عمرك ماهتبقا فاهم أكتر من المدرسين وعمرك ماهتعمل حاجة يرضي عنها اللى بيفهموا فى الشغلانة ولا عمرك هتنجح وتوصل أصلاً.. وده للأسف اللى بيعملو معظم المصريين حالياً .. واحمد بدير فنان ليه أعمال كتير ناجحة ومحبوبة وأول ما بدأ يلبس شخصية الحكيم العارف ببواطن الامور السياسية رصيده قل .. فخليك فى مجالك ومتفتيش .

• مفيش حاجة ولا حد صح طول الوقت
لازم تبقا عارف ومتأكد إن الكون كله مجتمعش على حاجة واحدة ولا حد واحد ، وإن آراء الناس مختلفة طول الوقت وفى كل زمن ومع كل موقف ، وصدقنى لو طلعت عليك سمعة إنك مع حد طول الوقت فى الصح والغلط ومن غير حتى ماتحاول تفهم هتزعل ..
بغض النظر عن رأيه السياسي رايح فين وجاى منين ولكن الجدل الكبير اللى بتعمله تصريحات أحمد بدير إنها جاية من طاعة عمياء وإتقلبت لعند كبير لفئة معينة من الناس اللى بتمثل الرأى المخالف ليه... فحاول تسمع للناس وحط إحتمال إن كلامك ورأيك وإقتناعاتك ممكن تطلع غلط فى مرة .. آه والله.

• المبالغة مش حلوة
إوعي حد ياخد عنك فكرة إنك الشخص الــ over فى كل حاجة ... اللى هو لو كحيت وحد سألك مالك تقوله ده أنا عندى ذبحة صدرية !
الراجل ممكن يعيط عادى ومش عيب لكن فى وقت العياط وفى المواقف اللى تستحق فيها تدمع ... لكن صدقنى لو دموعك نزلت فى وقت غلط وبشكل مصتنع هتقل اوى فى نظر كل الناس ، وعمرك ماهتخدم القضية بتاعتك .. ودموع الفنان أحمد بدير نزلت كتير اوى الفترة اللى فاتت ..

• إن قلت ماتخافشي ..
لو ليك شأن ما فى شغلانتك ، ووضعك فيها كويس وليك قيمة ومركز والناس بتحترمك وبتقدرك وحصل موقف خلاك إضايقت وقلت ياجماعة بخ خلاص أنا مش هكمل .. هتلاقي كل اللى حواليك بيمنعوك وبيحاولو يقنعوك إنك تكمل لأن عندك رصيد كبير أولاً ولأن مش من أول ماهتقول ياللا ها تياللا ...والموقف هيعدى..لكن تخيل لو مع كل موقف هتعمل كدة وهتهدد بالإنساحاب والإعتزال ..حد بعد كدة هيهتم ؟ بالعكس ممكن أصلاً رصيدك كله يروح ويبقو هم اللى مش عايزين يتعاملوا معاك تانى !
أحمد بدير طول الوقت بيهدد بالإعتزال وبيحط شروط إنه يكمل فى الشغلانة ..وكل ده خلاه فى الآخر يتمنع من عرض مسرحيته " غيبوبة " فى السويس بقرار المحافظ بعد غضب جمهور السويس منه .

• خلي الناس تدور عليك
البعيد عن العين بعيد عن القلب ... ده كلام روايات وحركات حبيبة عاوزين يقضوا وقت لطيف وسعيد .. لكن فى الحياة العامة وخصوصاً لو شغلك متعلق بالناس وبالجمهور خلى ظهورك عزيز ... والناس هي اللى تسأل عنك وتدور عليك مش يفتحوا الحنفية تنزلهم ، وشوف عادل إمام وعمرو دياب مثلاً ليه النجومية بتاعتهم فظيعة وأي ظهور ليهم ولو ثانية واحدة بيعمل ضجة إزاى ..
أحمد بدير فى الشهرين تلاتة اللى فاتوا بس ظهر فى 6 برامج كضيف غير المداخلات الهاتفية المتفرقة ... قال رأيه فى مواضيع كتير اوى ولا واحد تقريباً ليه علاقته بالفن ..


شارك هذا المقال: