فيه صورة انتشرت كتير اليومين الى فاتو على الفيسبوك لمخالفة مرور بس كانت غريبة اوى المخالفة دى وكان نصها كده ..
" الأنشغال بتنضيف الانف اثناء القيادة " ايه ده معقول يعنى انته تبقى سايق فى امان الله وقاعد بتتعامل فى مناخيرك ولا ليك ولا عليك وفجأه تلاقي عليك غرامة ب 300 ريال ؟؟!! دا لو الموضوع ده اطبق عندنا فى مصر يبقى ايراد المخالفات دى هاتسد عجز الموازنة اكيييد ...

شغل بالى الموضوع وخلانى ادور على اغرب القوانين فى العالم وفعلا اتفاجئت بقوانين غريبة جدا زى ايه ؟؟

اغلى مخالفة سرعة فى العالم

وده فى فنلندا ومخالفة السرعه هناك قيمتها مش محدده وكل واحد بيدفع الغرامة دى على حسب دخله وده حصل فعلا سنة 2002 مع مدير شركة نوكيا لما كان سايق الموتسيكل بتاعه وعدى السرعة القانونية لقى الغرامة بتاعته 12.5 مليون دولار .. ودى كانت اكبر غرامه سرعه فى العالم وطبعا هوه مادفعشى المخالفة دى بس رفع قضية وخلاها 103 الف دولار وبرده كانت اكبر غرامة فى التاريخ حتى الان

ممنوع الموت فى البرلمان

قانون مضحك وعجيب يقولك ان ممنوع على نواب البرلمان البريطانى انهم يموتو فى البرلمان وده عشان هوه جزء من القصر الملكى .. ولو ده حصل يبقى مش هيكون للبرلمانى ده جنازة رسمية وهيتدفن فى مدافن عامة !!! عشان كده لو واحد صحى من النوم تعبان ولقى نفسه بيكح يخاف يروح البرلمان لحسن يموت هناك ويتبهدل 

الدرع الواقى للرصاص ممنوع على المجرمين

وده القانون المطبق فى ولاية نيو جيرسى فى امريكا ومعناه ان لو اى مجرم طلع نفذ جريمته وهوه لابس درع واقى فعقوبته هاتتضاعف بدون اى شفقه واى قانون يحمى المجرم وقت محاكمته يعتبر لاغى

ممنوع الدفع بالكوينز ( العملات المعدنية )

بيقولك فى كندا ممنوع تروح تتسوق فى محل وتدفع تمن الحاجات دى بالكوينز وان صاحب المحل ممكن يرفض الكوينز دى لو اكتر من 10 دولار .. فى ناس فى مصر لما بتروح تدفع مخالفة او اى فاتورة حكومية وبيكون مدايق منها يقول طيب والله لاروح ادفعها بالكوينز قال يعنى كده هيدايق الموظف والحكومة وفى ناس فعلا بتعملها تلاقى مخالفة سرعه بالف جنيه يقومو دافعنها كوينز وبرده هنا معندناش قانون يمنع ده وغصب عن الموظف هيقبلها

ممنوع اللبان

فى سنغافوره انضف مدينة فى العالم تقريبا مافيهاش لبان (علكة) وده بعد ما الحكومة السنغافورية لقت لبان على الارض وفى المترو بشكل كتير فاخدوا قرار بمنع بيع اللبان وغرامة اى حد يرمى لبان على الارض الف دولار

ممنوع تطفى نور العربيه

فى الدنمارك لازم وانت سايق تشغل الانوار الامامية ليل ونهار يعنى ماتطفهاش خالص ولو طفتها واعتمدت على ضوء النهار هاتدفع غرامة 100 دولار

ممنوع تنضيف الانف يوم السبت

القانون ده فى اسرائيل لان يوم السبت يوم مقدس عندهم فممنوع منعا باتا اى حد ينضف انفه طبقا للقانون

السجن للطلبة الغشاشين

ودا فى الهند اى حد يغش فى الامتحانات يعاقب بالسجن 10 سنين يعنى مش زى عندنا ( يدبس البرشام فى الورقه ويكرشك بره اللجنه  )

الحوت الميت لملكة بريطانيا

برده قانون بريطانى غريب جدا يقولك لو اى صياد لقى حوت ميت على شاطىء بريطانيا فرأس الحوت يكون للملك والذيل للملكة

ممنوع البوس

ده فى ولاية ايوا ممنوع لو انته مربى شنبك انك تبوس فى الشارع

ممنوع تتجوز بنت عمك

فى ولاية يوتا ممنوع لاى اتنين ولاد عم الجواز وده طبقا للقانون بس لو عمرهم اققل من 65 سنه انما لو اكبر من 65 سنة فده يكون قانونى

ممنوع ضرب الزوجة

ده فى ولاية اركنساس الامريكية ممنوع لاى راجل يضرب مراته اكتر من مره فى الشهر وللعلم القانون ده من اكثر من قرنين .. احنا محتاجين القانون ده عندنا فى مصر بس يكون بالعكس ممنوع للست انها تضرب الراجل اكتر من مره فى الشهر.