من تالتة شمال، بيهزوا جبال

شريف زكي

في الفترة اللي إحنا فيها دي تحديدًا، مهم جدًا نفهم يعني إيه ألتراس وإنهم جزء أساسي من الكورة كلعبة وإنهم كيان موجود ومعترف به في كل دول العالم

" الألتراس ":

" الألتراس " مش جماعة اتفقوا على أخلاقيات ومبادئ معينة ومضوا " كونتراتو " وال " هجس " اللي بيتقال ده . " الألتراس " هم جماعة من الناس بخلفيات فكرية، وأعمار، ومعتقدات دينية مختلفة اتفقوا على حاجة واحدة بس هي تشجيع الفريق وأى حاجة تانية بـتتحط على جنب طول ما هما بـيشجعوا . هما عنهم اعتقاد ان لازم يشجعوا الفريق على طول الخط ويبقوا لهم دور إيجابى ويعملوا حاجة للنادى اللى بـيحبوه .

بداية ظهور " الألتراس " كانت فى الثلاثينيات فى أمريكا الجنوبية ولكنه انتشر فى الستينيات فى إيطاليا ويوغسلافيا وفرنسا . وكل " ألتراس " بتوع الفرق وقتها كانت بـتتبع منهج سياسى لأن الوقت ده كانت الناس خارجة من حروب عالمية وكان فيه حرب باردة فكانت الأندية لها ميول سياسية .

أشهر " الألتراس " فى العالم :

" سانت بولى " St. Pauli

نادى على قده فى ألمانيا إنما " الألتراس " بتوعه معروفين على مستوى أوروبا وده يمكن لأنه عنده أكبر نسبة بنات من ضمن الألتراس وعلشان له موقف مساند لقضايا اجتماعية زى التحرش الجنسى والعنصرية فى الجنس واللون .

St-Pauli.jpeg

مصدر الصورة : https://goo.gl/ZVThpp

" أبويل نيقوسيا " Apoel

فريق قبرصى جماهيره دايما بـتشجع لابسة برتقالى وماسكين أعلام اليونان علشان معتقدين إن الجزيرة اللى هم منها لازم تبقى تابعة لليونان .

Apoel.jpeg

مصدر الصورة : https://goo.gl/zLKxTX

" أياكس " Ajax

هو منبع النجوم لأنه أكتر فريق فى أوروبا قادر يطلع شباب ناشئين أقوياء، بس جماهيره مشهورة فى أوروبا بالصهاينة لأنهم بـيرفعوا علم إسرائيل دايما أثناء التشجيع رغم إن فيه منهم ولا عندهم فكرة إيه إسرائيل أصلا، بس تمسكهم بشكل العلم اللى جمعهم بـيعيشهم فى جو المنظومة الواحدة .

ajax.jpg

مصدر الصورة : https://goo.gl/LLJHBe

" إنتر ميلان " Inter Milan

عموما كل " الألتراس " نوادى إيطاليا شداد وبـيشتغلوا على طول وأكتر بلد بـتولع فيها " شماريخ " ، إنما " التراس " نادى " انتر " يعتبروا الأشهر فى إيطاليا وخصوصا لأنهم بـيتبنوا الفكر اليسارى، ومشهورين بضخامة حجم الأعلام اللى بـيعملوها والتشجيع اللى ما بـيهداش طول الـ 90 دقيقة .

Inter-Milan.jpeg

مصدر الصورة : https://goo.gl/UMjqmC

" ريد ستار بلغراد " و " دينامو زغرب "

Dinamo Zagreb و Red Star Belgrade

" ريد ستار بلغراد " هو فريق صربى أما " دينامو زغرب " فهو فريق كرواتى، الفريقين عندهم كراهية قديمة لبعض، وصربيا وكرواتيا كانوا أصلا بلد واحدة اسمها يوغسلافيا إنما سنة 1990 بعد ماتش بين الفريقين، الجماهير ولعت الدنيا وقامت حرب بعدها بين البلدين ودى اللى على أساسها البلد اتقسمت .

Red-Star-belgrade.jpeg

مصدر الصورة : https://goo.gl/owvokx

" هايدوك سبليت " (Hajduk Split)

الفريق التانى فى كرواتيا بعد " دينامو زغرب " ( زى الأهلى والزمالك عندنا كده ) ، " الألتراس " بتوع الفريق ده اسمهم " التورسيدا " (torcida).

hajduk-splut.jpeg

مصدر الصورة : https://goo.gl/HY1loi

" أوليمبك مارسيليا " (Olympique Marseillais)

أى حد بـيتابع الكورة لازم يبقى عارف جماهير " مارسيليا " دول عاملين ازاى من أول النار اللى بـتولع خلال التشجيع لحد حجم الأعلام وصوت تصفير الاستهجان والاستاد اللى مصمم بطريقة معينة تخلى الملعب كله يترج من أقل صوت .

" مارسيليا " مش أقوى فرقة فى فرنسا ولا عندها نجوم عالميين بس عندهم أقوى مشجعين " التراس " فى العالم ... ويا ويله اللى يفكر يروح يلاعبهم فى استاد " فيلودروم "!

الجدير بالذكر إن " الألتراس " فى العالم كله بـيتكرم من النادى اللى بـيشجعه ومن البلد كمان، إنما احنا عندنا هنا بـيموتوا وبس .

olypmiqye-marseillais.jpg

مصدر الصورة : https://goo.gl/3qndyn


شارك هذا المقال: