تويوتا ياريس 2017 .. تجربة قيادة مختلفة !

كيرلُس إدوارد
شارك هذا المقال:

بطبيعة شغلي في شركة لتجارة السيارات في يوم من الايام رحت استلم عربية من احد موزعين تويوتا, ماكنتش لسه عارف انهي موديل بالظبط, لما دخلت الShowroom عرفت انها تويوتا ياريس 2017! و كانت مفاجأة بصراحة :)

التويوتا ياريس واحدة من العربيات الي مبتركزش معاها اوي في مصر لانها مش منتشرة و كمان فئة ال Subcompact دي مش منتشرة جداً في مصر عكس ال Compact Sedan المهم انا مسوقتش عربيات كتير من الهاتش دي علشان اقدر اقارنها بيهم كويس غير المازدا 2 و الهيونداي i10.

الغريب في الياريس اول ما تشوفها ان تصميم المقصورة الداخلي بتاعها – الinterior - جذاب للعين اكتر من التصميم الخارجي. تصميمها الخارجي جميل جداً و خطوط التصميم واضحة جداً و ايروديناميكية و الشبكة الامامية بتديك احساس Sporty شوية لكن كا شكل عام انا مش شايفها Sporty خالص!

2017-Toyota-Yaris-front-1.jpg

الياريس الي استلمتها كان لونها ابيض – و ده لوني المفضل في السيارات – و المقصورة الداخلية فرش اسود و احمر! و ده كان اكتر جزء ممتع في العربية, ال Interior تحفة جداً و بتختلف كتير عن الياريس السيدان و عن اختها الاكبر الكورولا و ده لأن الياريس الهاتش باك بتتميز بتصميم فرنسي.

التصميم جميل جداً و مريح للعين و بيديك احساس رياضي جداً و بيتميز بلونين الاسود و الاحمر و عجلة القيادة و الازرار و البكر و التكييف مطعمين بالنيكل كروم.

الازرار الوصول ليها سهل و كل زرار في مكانه ما عدا ازرار التحكم في السيارة نفسها بعيدة شوية و اعتقد دي مش مشكلة لانك يفضل تكون واقف مبتتحركش بالعربية و انت بتغير الاعدادات دي!

التكييف مقدرتش اجربه اوي بسبب اننا في الشتاء لكن اهم مميزاته نظام ال Dual Zone, اماكن فتحات التكييف نفسها مظبوطة و بتوزع الهواء للعربية كلها.

2017-Toyota-Yaris-interior.jpg


عجلة القيادة كهربائية Electric Steering Wheel و تصميمها رياضي و من الجلد, و تقدر تتحكم في الموسيقي و الرد علي التليفون. او اكتر حاجة مميزة بدلات تغيير السرعات Shift Paddles

الكراسي مريحة و فيها دعامات لتثبيت السائق و اللون الاسود و الخياطة الاحمر مميزة, الفئة الي استلمتها ماكنش فيها كونسول في الوسط لكن في مسند للايد في كرسي السائق نفسه

unnamed-2-.jpg

المحرك

موتور اليارس 4 اسطوانات 1.3 لتر بيقدم 99 حصان و عزم 125 نيوتن.متر و هو مناسب لحجم العربية الصغير مع صندوق سرعات Gearbox اوتوماتيك 6 سرعات و أوضاع مختلفة للقيادة Sport و Eco و استهلاكه في البنزين مش كتير بالاضافة لخزان الوقود سعة 42 لتر.

unnamed-1-.jpg

انظمة الأمان و التجهيزات الاختيارية

الياريس بتنزل Standard بوسائد هوائية للسائق الامامي و الراكب الامامي فقط, و نظام فرامل ABS و توزيع الكتروني للفرامل EBD و برنامج توازن الكتروني ESP و نظام ايموبلايز ضد السرقة و من التجهيزات الاختيارية مثبت سرعة و نظام تنبيه ضد السرقة و مرايات كهربائية و فوانيس ضباب و قفل مركزي للأبواب و مدخل AUX و USB و عجلة قيادة من الجلد.

unnamed-4-.jpg

تجربة القيادة

قبل ما استلم السيارة علي طول انا كنت بقالي فترة قبلها بسوق تويوتا فورتشنر و توسان و عربيات SUV فا الياريس بالنسبة لي كانت راحة نفسية, معروف الشوارع في مصر عاملة ازاي و الشوارع الزحمة بيبقي صعب تتحرك بعربية كبيرة, الياريس مفيهاش المشكلة دي تماماً ابعادها سهلة جداً و بسيطة و تقدر تدخل اي حتة و انت واثق انها هتعدي :)
الDriving Experience نفسها ممتعة بسبب تصميم العربية الجميل و عجلة القيادة الممتعة الSteering كويس و مظبوط بس مقدرتش اجربه اوي لان معظم الطريق كان مستقيم, المساحات للسائق و الراكب الامامي واسعة عكس الانطباع الي تاخده عن العربية من برا.

العربية اول ما بدأت اسوقها كنت قافل ال Sport Mode فا كان كل هدفها توفر بنزين و بتقوم بتشغيل الوضع الاقتصادي مع ظهور علامة الEco في لوحة العدادات Dashboard و التسارع كان بطئ طبعاً في غرض انها توفر بنزين و لفات الموتور ماكنتش بتعدي 2 طول ما انت مش دايس جامد علي دواسة البنزين, فا بالتالي السواقة سلسلة و مبتستهلكش بنزين كتير.

unnamed.jpg

الوضع اختلف تماماً لما شغلت الSport Mode لاحظت الاستجابة السريعة لدواسة البنزين و ارتفاع لفات الموتور و التسارع اسرع بكتير خصوصاً الطلعة من الثبات مقدرتش احسبها بالظبط كام ثانية من 0 ل 100 كيلومتر و اقصي سرعة مش متأكد منها لاني مقدرتش ازود عن 130 بسبب الطريق.

kkkkk.jpg

من اكبر عيوب العربية دي هو سعرها! الفئة الي استلمتها كانت في حدود 280,000 جنيه و ده هيخلي العربية منشوفهاش كتير في شوارعنا لأن المستهلكين المصريين بيفضلوا العربيات السيدان اكتر في حين توافر بدائل تانية سيدان و ارخص بفارق كبير.