ماك بوك الجديد أرفع و أخف، ولكن مش عملى‫!‬

محمود طنطاوي

أعلنت أبل عن ماك بوك جديد، أرفع و أخف، وبلوحة مفاتيح وتراك باد مُعاد تصميمهم عشان ياخدوا مساحة أقل .

 

الماك بوك الجديد بشاشة 12 إنش وسماكة 13.1 مم ووزن أقل من 1 كج مقارنة ب 17.3 مم و وزن 1.36 كج للماك بوك آير اللى كان يعتبر أخف وأرفع لابتوب وقتها .

 

سعره هيبدأ من 1299 دولار و مزود بمعالج Intel Core M ثنائى النواه 1.1 جيجا هرتز، و ذاكرة 8 جيجا بايت، و ده يخليه بطئ جدًا بالنسبة لسعره، ده غير ان حتى الموديل الأعلى لا يرتقى للمستوى المطلوب وعشان كده الجهاز لا يعتبر عملى بالمرة أو بمعنى أدق هو مناسب جدًا للأشخاص اللي بيتنقلوا كتير لأنه خفيف، ولأن برضه استغنوا عن المروحة نهائيًا فهو مناسب كمان للي يحبوا هدوء الأجهزة وبيأكد لنا إنه مش عملي كفاية ولا يناسب الشغل التقيل، هو نفس فكرة الـ Netbooks اللي ظهرت من ٥ سنين واختفت وكانت فكرتها هو إن اللابتوب خفيف وصغير والغرض منه تبص على الانترنت وتشوف الإميلات وتتفرج على أفلام، مش أكتر من كده . ولكن ده لا ينفي إن إعادة تصميم ال Motherboard والبطارية خلاه ممكن يستمر معاك لمدة ١٠ ساعات متواصل .

 

الشاشة تعمل بتقنية ال Retina Display و ده تقدم رائع و فعلًا كل اللى جربوا الجهاز لاحظوا جودة الصورة، كمان السماعات جودتها اعلى والصوت أنقى وأعلى، بس قصاد ده، هنلاقي مشكلة الكاميرا اللي هي 480 p بس يعنى مش HD حتى، و ده هيأثر على اللي بيحتاجوا يستخدموا FaceTime و Skype بصفة دايمة .

 

للأسف كمان عشان أبل توصل لجهاز بالحجم الرفيع ده كان لازم تضحى بحاجات كتير وأكبر تضحية كانت بالمخارج والمداخل اللي ما فضلش منها غير مخرج الصوت و فتحة USB-C واللى بتقوم بأدوار كتيرة زى شحن البطارية والعمل كمخرج للشاشة وفتحة USB و غيرها، وده معناه إنك محتاج تشترى Adaptors عشان تستخدم فى التحويل من USB-C للجهاز ( او اكتر ) اللى عاوز توصله باللابتوب خاصة ان مخرج USB-C هو جديد كليًا ولا يوجد تقريبًا أى أجهزة تستخدمه، ولكن ميزته إنه سريع جدًا فى الشحن ونقل البيانات لأنه مبنى على تكنولوجيا USB 3.1 و لكنه ابطأ من مخرج Thunderbolt اللى ممكن يوصل سرعته لضعف سرعة ال USB 3.1 . وزى ما قلت انك هتحتاج تشترى Adaptors كتير عشان توصل اللابتوب بأجهزتك اللى بتستخدمها يوميًا، والـ Adaptors دى للأسف مش رخيصة و ده بيزود فى سعر اللابتوب اللى هو اصلًا غالي من غير مبرر حقيقى .

 

وأخيرًا، لو كنت من عشاق لوجو أبل المنوّر فى كل لابتوب فمش تلاقيه في اللابتوب ده، ضحوا بيه علشان يقللوا من سماكته وحطه بداله لوجو بيلمع بس . 


شارك هذا المقال: