عزيزى طالب الثانوية .. البلد مش محتاجة مهندسين !

فريق راجل. دوت كوم


مستنيين نتيجة الثانوية العامة بفارغ الصبر كأهالى وطلاب ، وبتحس ان كل الناس موقفه حياتها وحياة ولادها على النتيجة دى بس خلينا نقول كام نصيحة كدة من واقع التجربة والخبرة :

maxresdefault.jpg

1 – متخبيش عليهم النتيجة وقولهم النتيجة المظبوطة علشان كدة كدة هيعرفوا .. ساعتها الصدمة هتكون أكبر

2 – وانت بتقولهم النتيجة اياً كانت استحمل رد فعلهم بالذات لو كانت وحشة علشان هم بيبقوا حاطين امل عليك .. سيبهم يطلعوا الطافة اللى جواهم ومتردش علشان الموقف ميتحولش لخناق

3- انت نفسك متزعلش خالص لو النتيجة مكنتش زى اللى ف بالك طالما ذاكرت وعملت اللى عليك خليك واثق ان تعبك هيتردلك فى وقته

_640x_f994dfc7e11af8703b9eec72e22943f79fbc3b84e8a51302f6e62219e68830ce.jpg

4 – لو بتحلم تبقا دكتور ولا تدخل هندسة ولا ألسن ولا أى كلية ومجموعك خانك .. افتكر ان فيه ناس كتير جداً دخلوا الكليات اللى بيحلمو فيها وفشلوا ، وناس كتير مدخلوش واتحرموا من حلمهم ولكن لقوا حلم تانى أحسن وحققوه

5- أى حاجه ممكن تتعلمها من الشارع والحياة والكورسات .. أى حاجة !

6 – متحقدش على زمايلك اللى جايبين اكتر منك وتقول مكلنا مكناش بنذاكر او كلنا كنا بنذاكر .. إشمعن ! .. هى لعبة الثانوية العامة كدة وكل واحد بياخد نصيبه

7 – اعتبر ان مرحلة الثانوية العامة دى كانت اكتر فترة صعبة ف حياتك وعدت خلاص ودى حاجة إيجابية صدقنى ... بس علشان تفضل حاجة إيجابية حب المكان الجديد اللى هتروحه والكلية اللى تدخلها اجتهد فيها واستمتع .. دى احلى مراحل عمرك

350464.jpg

8 - متضايقش لو قارنوك بمجموع إبن خالتك .. كده كده هيقارنوك بيه حتى لو بقيت دكتور وهو سواق توك توك !

9 – متدفعش فلوس كتير فى جامعات خاصة على الفاضي لو مش ناوى تتعلم بجد .. لأنك كده هتكون خسرت وقت ومجهود وفلوس

10 – اخرج مع اصحابك أو كلمى صحباتك فى التليفون .. واعتبرى ان يوم النتيجة ده آخره بعد اعلان النتيجة بنص ساعة ..


شارك هذا المقال: