تجنب قرف الزحمة في ٦ خطوات

فريق راجل. دوت كوم

خلاص، الزحمة بقت أمر واقع. وكل مدى بتزيد مش بتقل. والمتشابه إن كلنا بنتعصب وبنتوتر من الزحمة ونفضل قاعدين نشيل ونحط في نفسنا بلا فايدة، ولذلك هنقول لك كام حاجة يعدّوا التسعين ساعة دول بسلام:

أعمل مكالماتك

حوّش تليفوناتك الضرورية كلها للوقت اللي هتبقى فيه في العربية…ولما تخلص المكالمات الضرورية، ابتدى أعمل مكالمات إجتماعية؛ ناس مقصّر معاها..عيد ميلاد…حد أتجوز..كده.

المزيــكـــا

شوف انت بتسمع مزيكا على إيه وجهزه..لو على تليفونك يبقى أشحنه وماتنساش الهيدفونز..لو على سي دي، يبقى نقّي لك كده كام سي دي طالما المشوار طويل.

تفادى أي خناقة أو أي eye contact 

حد كسر عليك. حد بيزمر لك والشارع واقف. حد سب لك الدين. انت قافل إزازك وبتعمل تليفوناتك أو بتسمع مزيكتك، ولا كأن فيه حد جنبك في الشارع أصلًا. 

خطط للأسبوع 

رتب خطط الأسبوع. شوف المفروض تبعت إيميل لمين وأكتبه وابعته مبدئيًا، اتصل بالبواب اتفق معاه ينضف لك العربية بكرة. أحجز سينما لبليل. أعمل كل اللي تقدر عليه علشان تظبّط أسبوعك من العربية. 

سلّي نفسك 

لما تلاقي طفل في العربية اللي جنبك ولا قدامك، طلع له لسانك وحاول تضحكه. ألعب لعبة حروف وأرقام العربيات وحاول تخليهم كلمة  واحدة، افتح أبليكاشن وألعب فعلًا على ما الدنيا تفك. 

إكسترا تايم

أكتر حاجة بتوترك في الزحمة هي إنك لبست واتأخرت على ميعادك، فـ أدّي نفسك وقت زيادة (ساعة ولا ساعتين) عن المشوار علشان ما تتوترش. ولو وصلت بدري، تستنى في العربية بأعصاب هادية.


شارك هذا المقال: