أحمد راتب .. ست وشوش !

فريق راجل. دوت كوم
شارك هذا المقال:


مش لازم تكون البطل علشان تعلم مع الناس ... فيه فنانين كتير جداً مخدوش أدوار البطولة فى أعمال مهمة ولكن ادوارهم التانية او التالته نجحت عند الناس أكتر من اى دور بطولة ...
فيه مجموعة من الفنانين ظهورهم ولو فى مشهد واحد بس بيكونوا مميزين ولا يمكن الجمهور ينساهم

_640x_2d42fa7d5e5c896cc1d4fcc88b4aa909d74928e0d52d3e146c861877ab090476.jpg

الفنان أحمد راتب اللى رحل عن عالمنا النهاردة من النوع ده ... أدوار كتير جداً معلمه مع جمهوره رغم ان عمر اسمه متحط على أفيش أو فى بداية تتر ومن الأدوار دى

عيسوى :

من أشهر أدواره على الإطلاق في فيلم يارب ولد ... واللى قال فيه جملته الأشهر على الإطلاق ( أنا عيسوى ... فنان بوهيمي يفعل مايحلو له ) واللى اتحولت بعد كدة لجملة بيرددها كل حد عايز يبقا حر فى قراراته وحياته ...و مكنش حد يعرف يعمل دور عيسوى بالعبقرية والبساطة اللى عملها أحمد راتب

سامح عبد الشكور :
بلاها سوسو ... خد نادية !
بالجملة دى اللى قالها الراحل فؤاد المهندس فى مسرحية سك على بناتك لسامح عبد الشكور المعيد عنده فى قسم الحشرات بكلية الزراعة واللى كان عايز يجوزه اى بنت من بناته بدأ حب الجمهور لأحمد راتب ولأدواره البسيطة الجميلة على المسرح ... مين فينا محبش سامح وتعاطف معاه ؟

الكحيت :
الراجل الغلبان المتقنعر اللى طالع فيها وهو ميتحكمش على مليم فى جيبه ... ده نموذج لناس كتير جدا فى مجتمعنا قدر احمد راتب يلعبه بمنتهي الفانتازيا فى مسلسل ( ناس وناس ) ودور ( الكحيت ) اللى دايما حاطط رجل على رجل وبيتباهي بحاجات عمره ماسمع عنها غير فى التليفزيون !

السحت :
حرامي الآثار فى مسلسل ( المال والبنون ) اللى سرق الحاج سلامة فراويله وهرب ورجع بعد كدة اشترى نص الحارة واتحكم في الناس بفلوسه علشان يداوى عقدته القديمه انه كان خادم ليهم وكانوا بيتحكموا فيه ... دور مركب وصعب ومحتاج ممثل بقدرات عالية يقدر يوصل كل الاحاسيس المتناقضة دي

شلبي :
فى فيلم الارهاب والكباب لعب أحمد راتب دور الصعيدي المكافح اللى بيمسح أحذية الناس فى مجمع التحرير ... والراضي بحاله بس ناقم على حال المجتمع اللى وصله لكدة ... وشايف ان الظلم ممكن يخلى اللى زيه وزى غيره يعملوا حاجات مكنش ممكن يعملوها لو فى بلد اقل ظلماً

رستم :
فى مسرحية الزعيم كان رستم المسئول الكبير فى الدولة اللى بيحاول يدارى موت الزعيم لحد ما يلحق يظبط اموره ويدارى على الفساد اللى كان عامله هو ومجموعة من المسءولين الفاسدين ... وبيدوروا على بديل يلعب دور الزعيم ... خفة دم وتلقائية احمد راتب على المسرح فى دور رستم متتنسيش ابداً