أسئلة تشغل بال الجمهور عن فيلم السقا ورمضان

فريق راجل. دوت كوم


كل الناس متشوقة جداً ومتحمسة جداً جداً لمشروع الفيلم اللى تم الإعلان عنه مؤخراً واللى هيجمع فى بطولته بين إتنين من اهم وأشهر الأسماء الفنية فى مصر وهم احمد السقا ومحمد رمضان .. وكل ده تحت إشراف وإخراج المخرج الكبير شريف عرفة ..
ده لو حصل فعلاً هيبقا حدث سينمائي مهم محصلش من أيام فيلم " المصلحة " اللى برضو كان أحمد السقا بيشارك بطولته مع إسم كبير ونجم شباك وهو احمد عز .. بس يمكن إختلاف طبيعة أدوار عز والسقا مخلتش الجمهور فى حيرة زى اللى واقعين فيها دلوقتى مع السقا ورمضان اللى طبيعة ادوارهم متشابهة حبتين فى الجري والضرب والاكشن واللياقة البدنية والناس بتسأل أسئلة كتير :

مين هياخد اكتر ؟

هو الأجر بيتحدد بالتاريخ ؟ ولا بالإيرادات ؟ ولا بالشعبية ؟
كل إجابة من دول بتديك اولوية لنجم من الإتنين على حساب التانى من حيث الأجر فتاريخ السقا يشفعله ولكن إيراداته وشعبيته الحالية بالمقارنة بمحمد رمضان وخاصة بين الشباب تخليه فى المركز التانى .. وبعض الناس بتقول إن حتى لو هياخدوا نفس الأجر فهو إنتصار ونجاح كبير لمحمد رمضان.

مين إسمه الاول ؟

من غير حاجة الفنانين بيتخانقوا على ترتيب إسمهم على التترات و قضايا كتير اترفعت على منتجين علشان حطوا اسم فلان قبل فلان او فلانة قبل فلانة ، ومنتجين كتير بيضطروا يكتبوا فى العقد مكان ظهور الاسم فى التتر والافيش علشان كل واحد يبقا عارف من اولها .. وإحنا هنا قدام حالة من دول .. السقا هيشوف نفسه الأكبر والأحق بالنجومية ورمضان هيتمسك بحقه كرقم 1 حالياً فى المتابعة والايرادات .. صناع فيلم المصلحة لما وقعوا فى نفس الموضوع قرروا انهم ميكتبوش اسماء على الأفيش والاكتفاء بصورتين كبار للنجمين مع بروز صورة عز شوية.

343a9d53d10b4419050bad5ef3ef0eac_123724881_147.jpg


مين اللى هيضرب ؟

الأكشن هو الطريق اللى نجح النجمين الكبار من خلاله فى دخول قلوب كل الجمهور والاتنين أبدعوا فيه كل واحد بطريقته .. والاتنين بيعتمدوا بشكل كبير على القوة البدنية والتكوين الجسمانى والعضلات وبالتالى أكيد الفيلم هيكون فيه أكشن من الناحيتين والسؤال اللى بيشغل بال الحمهور مين فيهم هيظهر أقوى ؟ مين هيكون مع الخير ومين مع الشر ؟ ولا الاتنين هيكونوا فى جانب واحد زى معظم أفلام هوليود اللى بتجمع بين بطلين واسمين كبار واوقات كمان اكتر من إسم ؟

36527_Crop.jpg
عموماً الفيلم حالياً فى مرحلة التحضير وإسمه المبدأى " الكنز " ومن البطلات المرشحات مني زكي ويسرا ... نتمنى يكمل على خير ويظهر للنور وساعتها كل الأسئلة دى هتلاقي إجابة .. بس لحد مايحصل ممكن إنت كمان تحاول تجاوب عليها .


شارك هذا المقال: