نفسي أتجوز راجل محترم !

ساره وفير

نفسي ألاقي و أتجوز راجل محترم .. صريح معايا من البداية و ملفش و صاع و دار علي حل شعره قبل كدة.

يكون هادي في نفسه .. و ميطلبش مهر و شبكة و فيلا و عربية – طلباته قليلة و راضي بقليله.

ميرغيش كتير و يطلع عين أهلي من طلبات ملهاش لازمة لهاتي و ودي و خدي و روحي و اعملي.

25360570_1717961944901866_880775302_n.png


يكنس و يطبخ و يمسح و يغسل و مخلي البيت فلة و واخد باله من العيال و أكلهم و شربهم و لبسهم و مذاكرتهم و تمرينهم اللي في النادي– و ميشتكيش ولا يفتح بقه اني اساعده في شغل البيت و مذاكرة العيال.


ميبقاش زنان و يطلب كل شوية اني اصلحله الغسالة والشفاط و الكومبينيشن و الحوض اللي طفح و البانيو اللي اتسد.


ألاقيه بعد يوم طويل في شغلي مستقبلني بابتسامة رقيقة و يقولي كلمة حلوة و مجهزلي أكلة نفسي فيها عل عشا.


يقدر امكانياتي و ميطلبش مصروف بيت زيادة.

iiii.jpg


يعملي مساج قبل مانام – و يتمنالي الرضا أرضي.


ميبصش بره و يبقي عايز يخرج و يتفسح و يلبس و يعمل شعره زي بقية صحابه السناجل.


يسيبني براحتي و ميقرفنيش كل شوية بمكالمات فينك و مع مين و رايحة فين و جاية منين – ميقلبش بوزه لما أنزل اقعد عل القهوة مع صحباتي البنات أو لما أسافر سفرية لوحدي مع صحباتي أشم فيها نفسي من طلباته هو و العيال.


ميمسكش موبايلي و يقلب فيه و يبقي عايش في جحيم و شك أني أعرف عليه رجالة تانية أحلي و أصغر منه.


يبقي عارف اني أنا الشاكم الحاكم - و الأمر الناهي الوحيدة في البيت.

kkkkkkk.jpg
لما أشخط فيه و أزعقله يحط لسانه جوه بقه و يقول حاضر و نعم و تحت أمرك.


و لما نتخانق يستحمل و ييجي علي نفسه و ميلمش هدومه و يروح عند أبوه يومين تلاتة و يستناني أجي اخده (خده ربنا).. و يستحمل فكرة اني هاسيبه يتفلق عشان عارفة انه مش هيعرف يبعد عن العيال و هيرجع لوحده زي الجزمة.


امتي بقة تيجي سنة 2050 عشان نطلع عين ابوكوا
:D
#النساء_قادمون_بقوة






شارك هذا المقال: