رمضان صبحي ... عفيجي ولا كفتجي ؟

فريق راجل. دوت كوم
شارك هذا المقال:

رمضان صبحي .. شاب مصري عنده 18 سنة بيلعب فى النادي الأهلى فجأة بقا نجم نجوم مصر والمنتخبات كلها فى كل الأعمار ... خناقة كبيرة عليه مابين المنتخب الأول ومنتخب الشباب ... في يوم وليله بقا فارس أحلام الاهلاوية والكورة المصرية ، واحرز هدف التأهل لكأس الأمم الافريقية على نيجيريا أخيييراً بعد فشل 3 دورات ... مثير للجدل على طول .. وقفة رمضان على الكورة فى ماتشات الزمالك ... هجوم كبير من الأبيض وتهليل كبير من الأحمر

hqdefault-1-.jpg

كل الكلام ده معروف ومفيهوش جديد ... إنما اللى مش مفهوم أبداً .. تباين الآراء دى وتبديل المقاعد اول ما احترف برة مصر!
بداية الاهلاوية انقسموا جزئين لما جات سيرة إحتراف أبو التفانين ... جزء مع مستقبل اللاعب وانه يطلع يلعب وعرض كويس وفلوس كتير تفيد النادى ، وجزء مع الانتماء ويفضل فى النادي اللى خيره عليه ... وده برضو ممكن يكون طبيعي لحد مقرر الاهلى واللاعب انه يخوض تجربة الاحتراف فى ستوك سيتى الانجليزى ، ويلعب فى الدورى الاقوى والاغلي فى العالم ...

hqdefault.jpg

هنا بقا كان لازم الكل فى مصر ييقف ورا ... زيه زى صلاح والنني وكوكا وغيرهم .. لكن اللى حصل ان برضو عليه هجوم كبير ومفيش مساندة ليه مع العلم إن صلاح والنني خاضوا تجربة اخف فى بازل السويسري قبل مايتألقوا مع انديتهم الكبيرة ... وبدأ الهجوم على رمضان يتحول لتريقة وسخرية منه وغنه بيقعد على الدكة ومش بيلعب وممكن مايدخلش تشكيلة الماتش أصلاً ؟!

هل الغلط هنا غلطة رمضان إنه ساب مصر وملاعبها الغير صالحة ومسابقتها الغير منتظمة وقرر يخوض تجربة يحقق فيها حلمه ويكمل تجربة اللى سبقوه ونجحوا؟

sobhysalah.jpg


ولا هو استعجل وكان لازم يستنى مع الاهلي سنتين تلاته كمان علشان على الاقل لما يطلع الاهلاوية كمان ميهاجمهوش ؟


لو إحنا فعلاً عايزين يبقالنا إسم كبير ونروح كاس العالم زى بقيت خلق الله ... لازم نساند كل لاعب حتى لو اخطأ .. وبلاش ننجرف تحت حرب العفيجي والكفتجي ... علشان كلنا منلبسش الاسياخ فى الآخر !