Quality Time .. رجعوني لأبو كشاف!

عمرو موسى

معظمنا عنده مشكلة في تنظيم الوقت ومش بيعرف يخلص كل اللي مطلوب منه في اليوم، و وتيجي علي أخر اليوم وتسأل نفسك هو الوقت راح فين؟ بس عمرك فكرت بتستخدم موبايلك كام ساعة في اليوم أو قد إيه من اليوم بيضيع وانت باصص في موبايلك؟ هي دي فكرة Quality Time ببساطة، برنامج بيديك كل يوم إحصائية انت فتحت Lock الموبايل كام مرة، واستخدمت الموبايل قد إيه، وعدد ساعات استخدامك لكل برنامج .

 

كمان البرنامج فيه ميزة حلوة جداً اسمها Take a Break اللي من خلالها تقدر تحط Limit لبعض البرامج وماتقدرش تفتحها غير بعد مدة معينة ولو فتحتها الموبايل كله بيتعملوا Limit لفترة معينة، من الاخر يعني هيعلمك الأدب .

 

كان عندي فضول إني أجرب البرنامج وأشوف احصائيات يومي علي الموبايل Samsung Galaxy S4 هتبقى عاملة إزاي .. كنت عارف إني هلاقي أرقام تصدمني بس مش للدرجة دي !

 

في خلال يوم جامعي في وسط الأسبوع أستخدمت الموبايل لمدة 5 ساعات و 36 دقيقة، فتحت الـ Lock وقفلته 523 مرة، معظم استخدامي كان لـ WhatsApp Twitter و Facebook وده غير استخدامي   للـ iPad والكمبيوتر كمان، ولأني مش الشخص اللي بيبقى قاعد مع صحابه وسايبهم و ماسك الموبايل، الرقم خضّني . يعني أكيد الخمس ساعات دول كان ممكن أعمل فيهم حاجات كتيرة مفيدة حتي لو هنام .

 

تجربة   Quality Time خليتني أحن لأول موبايل جبته، 1100 بكشاف .. أكيد لو كان لسّه معايا دلوقتي ماكنتش هضيّع من يومي 5 ساعات باصص فيه .. ياريت أقدر أرجع لأبو كشاف تاني !

 

جربوا البرنامج وشوفوا قد إيه هتتخضوا من الوقت اللي بتقضوه لازقين وشكم في شاشة .

 

ملحوظة : البرنامج للأسف مش متاح لمستخدمي ال iPhone في الوقت الحالي .


شارك هذا المقال: