فيديو : 7 حاجات المصريين هيعملوها بعد إنتشار لعبة Pokémon Go

فريق راجل. دوت كوم
شارك هذا المقال:


لعبة البوكيمون (Pokémon Go ) واكلة دماغ الناس فى العالم كله من اول ما أعلنوا عن إتاحتها للعب فى بعض الدول اهمها امريكا وأستراليا ، وده خلى ناس كتير بتنزلها بطرق مختلفة عن تنزيل الــ Games العادية من Google play أو الــ App store من كتر شغفهم بالموضوع ..

yyyyy.png

اللعبة عبارة عن إيه ؟

هي بتعتمد فى الأساس على الــ GPS والكاميرا بتاعت تليفونك .. هتبتدى تعمل حساب عليها بعد ماتنزلها وهيطلب منك تختار إسم للشخصية بتاعتك فى الجيم وهتبتدى السحلة يامعلم !

هيقولك اقرب بوكيمون ليك كمان شارعين وانت تفضل ماشي وراها لحد ماتلاقيها وتاخدها معاك وتجمع البوينت ، وممكن وانت ماشي كده تقابل واحد تانى بشخصية تانية ظهرتلك على الــ MAP بتاعت اللعبة جاى يسبقك وياخد البوكيمون فتدخلوا فى قتال ومواجهة جوة اللعبه واللي يكسب البوكيمون من نصيبه ، وكل مستوي علشان تعديه لازم تمشي عدد معين من الكيلومترات وتجمع عدد معين ومختلف من البوكيمونز .. الفيديو ده هيوضحلك 

تعالوا نتخيل حياة المصريين بعد إتاحة وإنتشار اللعبة فى مصر ..

1- لما تلاقي واحد بيرحب بيك وبيتعرف عليك وكله إبتسامة وأمل بدل ما هيسألك السؤال المشهور ( تسمع عن كيو نت ؟ ) هتلاقيه بيسألك ( متعرفش مكان بوكيمون قريب ؟ )

2- تخيل لو واحدة من البوكيمون موجودة فى محطة مترو رمسيس الساعة 2 الضهر ... متخيل ؟! الناس أصلاً مبتبقاش طايقة بعضها لوحدها مابالك لو دخلوا فى صراع بوكيمونى !

metro.jpg

3- ممكن وانت سايق عربيتك او ماشي فى الشارع تلاقي اللى قدامك فجأة قام حاود يمين أو شمال من غيرة أى إشارة أو حاجة ورغم إن ده بيحصل كتير وعادى ومحدش بيحترم المرور إلا أن المرة دي هيبقا فيه سبب تاني خالص ... هو ماشي ورا البوكيمون يامعلم لو هيوديه الهند ... وراااه

4- التغيير الإيجابي بقا ... أوزان المصريين ممكن تشهد نقصان رهيب فى الفترة الجاية ، اللى كان بيكسل يمشي خطوتين أو يقوم يجيب الريموت من على الترابيزة ، ممكن يمشي شوارع ويلاقي نفسه بيلف الأهرامات التلاتة وراكب فلوكة فى النيل ... وكل ده علشان خاطر البوكيمون ..

5- الناس هتبتدى تعاير بعض ... وتقيم بعض بعدد البوكيمونز أو انت فى المستوى الكام ؟ بالظبط زى حمي الــ subway اللى اكتسحت مصر بقالها سنين ..

subway-surfers-wide.jpg

6- ممكن واحد يلبس مصيبة مثلاً لو قررت اللعبة تسوحه وتوديله البوكيمون فى مكان من الجهات السيادية مثلاً .. تخيل واحد البوكيمون بتاعه على سور وزارة من الوزارات أو جوة قسم الزاوية الحمرا مثلاً ..

7- هتظهر إعلانات التليفزيون الكئيبة اللى بينصبوا بيها على الغلابة مستغلين إنتشار أى لعبة أو أبلكيشن ويبتدو يعملوا اعلانات عنها وابعتلنا رساله ب 5 جنيه ونبعتلك لينك تنزل منه ، بالظبط زى التروكولر والـ subway وغيرها

22.png        1.png

تفتكر إيه تانى ممكن  يحصل بعد إنتشار اللعبة فى مصر ؟