أشهر الجمل اللى بتحول البنات لبينوكيو

شيماء عادل

الحقيقة إنه الرجالة والستات كل واحد فيهم له الكدب الخاص بيه، وإللى غالبا ما بيكون مفقوس ومعروف. بس علشان تاخد حذرك كويس وتعمل إحتياطاتك وتفهم البنت إللى معاك كويس، يبقى لازم تعرف إمتى البنت بتتحول ل"بينوكيو"

الفلوس مش كل حاجة
الجملة دى من أشهر الجمل إللى ممكن تسمعها فى أول العلاقة وإللى الدنيا حواليكوا ساعتها بتتملى قلوب وفراشات وتعيش كده أجواء من الرومانسية بتاعت أحمد ومنى. بس بالرغم من إنها ممكن تكون مش بتكدب عليك ولا بتثبتك بكلمتين علشان تجر رجيلك إلا إنها هتتحول لحقيقة صادمة بعد كده، علشان الجملة دى أصلا مش منطقية من الأول..يعنى ممكن كتر الفلوس مش مهم ولا لازم تكون من أثرياء القوم، بس لازم يكون فى فلوس. فلوس للشقة وتجهيزها، فلوس للشبكة، فلوس للفرح أو شهر العسل، فلوس لخروجات الخطوبة والهدايا....وبلاش كل ده بس لازم فلوس للمراحل إللى بعد كده وهى مصاريف البيت والعيال والعزايم والمجاملات إلخ إلخ....عرفت بقى إن الفلوس مهمة ليكوا انتوا الأتنين. فنصيحة بقى لو جت قلتلك الجملة دى بنية صافية فهمها اللييلة ماشية إزاى. "أما لو كان حبكوا دا من النوع الأفلاطونى النادر..ساعتها بس هتكون الفلوس فعلا مش مهمة"

111.jpg


بحب عائلتك أووى
لما تسمع كلام زى ماما عاملة إيه؟ و دودو أختك وحشتنى أوى وبابا صحته إزايها دلوقتى... إبدأ أقلق. أساسا كلمة ماما وبابا دى أغلب الأوقات بتكون مش طبيعية وبيبقى فيها أفورة كده، ودايما بالذات فى مجتمعنا بتكون فى عداوة مسبقة بين العيلتين حتى قبل ما يشوفوا بعض، متفهمش ليه بس هو كده وكأنهم داخلين حرب. ولأنها عارفة إن السكة دى بالذات بتجيب مشاكل كتير فدايما أى بنت بتتجنب تقولك مشاعرها الحقيقية ناحية عيلتك.

2222.jpg


أنا مش بغير
طبعا دى كلها محاولات لإثبات الثقة بالنفس وإنه مش فارق معاها وإنها مش هتموت عليك بقى والحركات دى، بس دا كله ميمنعش إنها لازم تغير لااااازم حتى لو هى فعلا واثقة فى نفسها جدا وشايفة إنها أجمل وأذكى وأحلى من كل البنات إللى حواليك ، بس مجرد إحساسها إنك بصيت لواحدة تانية حتى لو كانت فيها كل العبر دا بيعمل حاجة كده جواها ملهاش تفسير ولا بتقدر تتحكم فيها أصلا. وفى كل الأحوال ومهما حاولت تبرر فأحب أبشرك بليلة سودا.

333.jpg


كنت بهزر
الجملة دى هتسمعها فى حالتين اتنين ملهمش تالت. يا إما عكت الدنيا معاك جامد وغلطت غلط فاحش مثلا فساعتها هتبقى بتحاول تدارى على غلطتها بإنها كانت بتهزر ومتقصدش وممكن توصلها كمان إنها هى إللى تتقمص بعدها فمتستغربش. يا إما كانت بتحاول تقولك حاجة مهمة مثلا وأنت مهتمتش أووى ، زى مثلا إنها كانت عايزاك ضرورى وأنت نسيت او كانت بتكلمك فى حوار مهم بالنسبة لها وأنت مركزتش فساعتها هتقلب الحوار هزار ولكن إحذر.....هتشليها فى قلبها طوووول العمر.

4444.jpg

عندى صداع
الجملة دى تقريبا هى الطريقة الأكثر شيوعا سواء للراجل أو الست للهروب. فمثلا لو كانت مش رايقة أو شايلة منك فى أى حاجة من الحاجات إللى فوق دى ولأنها كويسة ومش عايزة تتخانق معاك فهتلاقيها طلعت سلاح "أنا عندى صداع وعايزة أنام"


555.jpg

أنت صح
مفيش ست ممكن تقتنع برأى راجل لأنه دايما بيحاول يحسسها إنه هو العاقل والخبير وإللى بيفهم فى كل حاجة وهى لأ، ودا أسلوب فى حد ذاته بيستفز أى ست. فالنتيجة بتكون إن هو مش بيسألها رأيها إيه وهى مش بتقتنع برأيه وبيحصل الخناق. لكن فى أوقات ما هتلاقيها عايزة تكبر دماغها أو ملهاش نفس تتخانق وتجادل فهتنهى الحوار بالكلمة إللى هى عارفة إنها هتريحك وتخلى تحس بإنتصارك وهى "أنت صح"

200_s.gif

قول الصراحة ومش هزعل

غالبا السؤال دا بيكون فخ، فاحترس إنك تقع فيه لأن مش سهل أبدا تقوم منه. نوعية أسئلة زى هو أنا تخينة؟ هو انا شكلى مش حلو؟ لبسى إنهارده مش لايق عليا؟ ذوقى عجبك؟ الأكل حلو؟ إيه رأيك فى قصة شعرى الجديدة؟ كل الأسئلة دى لازم يكون ليها إجابة واحدة ولا تحتمل الإختيار بين إجابتين، لازم تكون إجابتك إيجابية. وعلشان تبعد عن إنك تكون منافق، لازم برده تكون دبلوماسى فى ردك وتعرف إزاى تقول إنتقادك بطريقة كويسة. وأحسن طريقة للإنتقاد حسب خبراء كتير هى طريقة "الساندوتش" يعنى تبدأ أول طبقة بكلام حلو وإيجابى وبعدين تخلى النقد دا هو الحشو إللى فى النص وتنهى الحوار بكلام حلو تانى...وصفة متجربة ومفيدة وبالهنا والشفا.

6666.jpg

 
كام جملة كده فى السريع
هشترى حاجات صغيرة وهنمشى "إعرف إنك هتقضى نص يوم"
خلاص بلف الطرحة ونازلة "هى لسه أصلا مقمتش تلبس"
إخرج مع أصحابك وإتبسط "ليلتك سودا النهاردة"
هنتفرج مع بعض على ماتشات الكورة ونلعب بلاى ستيشن "حريم السلطان أهم بكتير"
أنت عندى أحلى من توم كروز "زى بالظبط لما تقولها أنتى عندى أحلى من هيفا"


شارك هذا المقال: