Netflix مع انترنت بسرعة السلحفة

عمرو موسى

التليفزيون بشكله التقليدي في أيامه الأخيرة وبقي موضة قديمة،  بس دلوقتي خلاص بقي دايما الحل الأسرع لو عايز تتفرج علي حاجة معينة إنك تشوف نفسك في إيه وهتلاقيه علي الإنترنت، من غير ما تشوف فيه إيه علي التلفيزيون وتتفرج عليه من نصه أو تضيع معظم الوقت في الإعلانات، من كتر ما الموضوع بينتشر خصوصا بين جيل الشباب بقي فيه ناس لما بتيجي تبدأ حياتها وتتجوز مبقوش يجيبوا تليفزيون وبرضه، وقنوات كبيرة بقيت تحط برامجها علي الإنترنت زي MBC وشاهد.نت 

وده خلي واحدة من أكبر شركات الخدمات السينيمائية في العالم Netflix تعلن دخولها السوق وإتاحة خدماتها في كل دول العالم وخصوصًا الشرق الأوسط بعد أما كانت في امريكا وكندا بس، وده فتح الباب لمشاهدة أي فيلم أو مسلسل عربي أو أجنبي بشكل قانوني علي الإنترنت، بأعلي كواليتي موجودة وبسعر معقول جدًا.. حوالي 10 دولار في الشهر، يعني أرخص من أي اشتراك قناة مشفرة زي OSN أو Showtime

Netflix-home.jpg

digitaltrends.com

Netflix مش بتعرض أفلام ومسلسلات بس دي كمان بتنتج، وليها كذا حاجة كبيرة ومشهورة زي House of Cards و Narcos وحاجات تانية كتير

house-of-cards.jpg

wikimedia.org

وده هيفتح الباب لإنتاج أفلام ومسلسلات بنفس الكواليتي اللي بنشوفها في أفلام برا أو علي الأقل قريب منها، ودي فرصة هايلة للسينما المصرية تطلع من حفرة أفلام الفرح الشعبي والرقاصة والمهرجان اللي بقالنا فترة كبيرة بنعاني منها، ولما بنيجي نسأل أي مؤلف يقولك أصل مفيش إنتاج

كل ده حلو وهيفيد المشاهد في الأخر، بس يخلينا نسأل نفسنا سؤال مهم، خدمة زي دي بتعتمد بشكل رئيسي علي الإنترنت السريع لإن كواليتي الفيلم أو المسلسل عالية والمشاهد مش هيبقي دافع فلوس علشان يقعد يستني الفيلم يحمل، إزاي هيقدروا يتغلبوا علي مشكلة إن الإنترنت هنا في مصر زي الزفت؟


شارك هذا المقال: