مش بس يوتيوب.. طرق تانية بتجيب فلوس من النت

أحمد عصام


ايوه..زى ماقريت كده..الانترنت اللى كان السبب فى شلل 90% من المصريين ممكن يكَسّبك فلوس..ومش لازم تكون بنت من بتوع "كارت بـ50 يديك نص ساعه على سكايب" علشان تجيب الفلوس دى..فى طرق تانيه اظرف وشريفه نسبيا اكتر من الطريقه دى علشان تقدر تكسب بيها فلوس من الانترنت اللى تقريبا متوفر فى كل بيت فى مصر، وبمناسبة ان اجازة الصيف جايه..دول 10 حاجات ممكن تعملهم على الانترنت بدل ما الموقع الازرق ياخد وقتك كله (قصدى الفيسبوك..انت دماغك راحت فين)

1- اليوتيوب
حاجه مش كتير عارفها..لو رفعت فيديوهات وعملت نسبة مشاهده عاليه على اليوتيوب..الموقع بيدفعلك نسبه من ارباح الاعلانات على الفيديو بتاعك بتعتمد على نسبة المشاهده..ده غير طبعا لو بقيت Youtuber بيبقالك اجر شهرى بتكسبه لما بترفع فيديوهات بصفه دوريه ع اليوتيوب

2- بيع الصور
بسبب انتشار الكاميرات البروفيشونال مؤخرا فى مصر..اصبح عندنا 1 فى كل 5 مصريين بيشتغل فوتوجرافر..فهل تعلم يا عزيزى الفوتوجرافر المصرى انك ممكن تبيع الصور اللى بتصورها لمواقع زى istockphoto و shutterstock وتكسب من وراها فلوس؟

3- الـUpload
فى مواقع ابلود كتير عالميه وعربيه بتدفعلك فلوس كل اما ترفع ملفات عليها زى الجيمز والافلام وما الى ذلك والناس تعمل download للحاجات دى..امال انت فاكر ان مواقع زى myegy وarablionz شغاله لله وللوطن كده؟

4- المدونات والمواقع الشخصيه
لو عملت بلوج (مدونه) او موقع..تقدر تكسب منه فلوس عن طريق الاعلانات اللى الشركات بتعملها عليه..وكل اما المدونه/الموقع بتاعك يكون الـtraffic او الزيارات عليه كتير..كل اما ربحك يزيد من الموقع

5- بيع المنتجات
لو ليك حد مسافر وبينزل مصر كتير ممكن تعمل من وراه بيزنس تكسب بيه وتبيع حاجات ارخص من سعرها اللى فى مصر كمان..ازاى..مواقع كتير زى Clickbank وebay وSouq بتديك الفرصه انك تبيع المنتجات عليها..وممكن تعمل نفس الموضوع عن طريق صفحه على الفيسبوك..بس المشكله هنا انك تكسب ثقة المشترى..وده بياخد وقت

6- الـSurveys (استطلاعات الرأى)
فى مواقع بتدفعلك فلوس كل ما تجاوب على استطلاعات الرأى اللى عليها، منها مواقع عربيه يمكن اشهرها موقع يوجوف اللى بيديك نقط على كل Survey بتعمله..وكل اما تجمع 5000 نقطه بتاخد 50 دولار (الحاجات السهله مكسبها مش كتير)

7- الترجمه
لو انت كويس ف الانجليزى او اى لغه تانيه..فى شركات بتدفعلك فلوس على الترجمه..وبتحاسبك بالصفحه او بالمحتوى..وفى مواقع تانيه بتدفعلك فلوس على ترجمة الافلام، و هايبقى عندك فرصه انك تبقى واحد من اللى بيكتبوا (عليك اللعنه) بدل الشتيمه فى الافلام

8-الـForex (تجارة العمله)
وده موضوع ممكن يكسبك الاف الدولارات او يخسرك كل ما تملك..شركات كتيره بتديلك الفرصه انك تشتغل فى تجارة العمله، ودى حاجه عامله زى البورصه بالظبط، بس مؤشراتها اكثر ثباتا نظرا الى ان مفيش حد متحكم فى سعر العمله على عكس البورصه..وكل ده بيتم عن طريق الانترنت..بس نصيحه منى..ادرسها الاول قبل ماتشتغل فيها..ولو انت شخص مشاعره بتأثر فى قراراته..بلاش احسن

9- دوس ع الاعلانات
شايف الاعلانات والـPop up ads اللى بتطلعلك فى كل حته دى؟ ايه رأيك انك ممكن تكسب فلوس كل اما تدوس عليها؟ سهله مش كده؟ بس فاكر القاعده بتاعة الحاجات السهله مكسبها مش كتير..اهو انت ممكن تقعد 3 ساعات بتدوس على اعلانات و ف الاخر تاخد فلوس تجيبلك..ازازة حاجه ساقعه

10- اكتب وبيع الكتب على الانترنت
لو انت بتعرف تكتب..ممكن تألف كتاب وتبيعه على الانترنت..مش لازم دار نشر ولا توزيع..الموضوع ممكن يلعب معاك لو انت بتكتب كويس وعرفت تسوّق للى بتكتبه..من المواقع اللى هاتساعدك فى الموضوع ده موقع اسمه أسناد.


شارك هذا المقال: