المتصفح الخفى .. مش محتاج تمسح بلاويك تانى !

أحمد صلاح

وانا قاعد على اللاب توب بالصدفه وبنضف زراير الكيبورد وكانت الشاشه مفتوحه على جوجل كروم والمعروف ان لونه ابيض .. وفجأه لقيت لونه قلب للون الاسود وطلعلى الرمز دا ومكتوب عليه " لقد انتقلت الى المتصفح المتخفى "

unnamed.png

انا قولت بس .. انا كده جبت ثغره وهدخل منها على عالم الديب ويب ..

المهم بحثت شويه عن الموضوع لقيت حاجه كنت بدور عليها من زماااااان اوى بس للاسف اتأخرت ..

مين فينا مكنشى بيدخل يقعد يمسح الهيستورى بتاعت الانترنت اكسبلور عشان محدش يعرف يوصل لاى حاجه دخل عليها .. وياريته كان بينفع لان مسح الهيستورى للاسف مكنش كفايه .. لان كان فيه حاجه اسمها الكوكيز ودى بتحفظ حاجات كتير برده زى الحاجات اللى انت بحثت عنها او اى حاجه كنت بتحملها وبتنساها وبتنزل على ملف الداونلودز ..

وهوه ده دور المتصفح الخفى فى الجوجل كروم اللى ناس كتير ماتعرفهوش .. دلوقتى تقدر تدخل على اى حاجه ( وياريت ماتفهمونيش غلط ) لان انت ممكن تكون فيه حاجات كتير نفسك تبحث عنها ومكسوف حد يشوف وراك انت كنت بتبحث عن ايه او بتقرى عن ايه .. ومش كدا وبس لا مثلا فيه ناس بتشترى اون لاين وبتكتب رقم الفيزا بتاعها فى المتصفح وممكن بسهوله يتسجل .. انما لو عملت المتصفح الخفى كدا اول ماتقفل المتصفح كل اللى انت عملته هيطير ومفيش حاجه تتسجل

طيب تجيبه ازاى ؟؟

الطريقه الاولى : افتح جوجل كروم وفوق على الشمال هتلاقى 3 نقط فوق بعض اضغط عليهم واختار " نافذه جديده للمتصفح المتخفى "
الطريقه التانيه : اضغط على الكيبورد وانت فاتح جوجل كروم على " shift+ ctrl+ n "

وهتلاقيه فتحلك صفحه بالشكل دا

his.png


شارك هذا المقال: