خان .. الذي خان أبناء جنسه ببراعة !

فريق راجل. دوت كوم

فقدت السينما العربية والعالمية المخرج الكبير محمد خان ، اللى توفى بعد مشوار حافل من الأعمال الممتعة والمهمة واللى هتفضل محفورة فى ذاكرة كل الجمهور ...
خان إتعرف بحبه الشديد لقضايا المرأة ، ومناصرتها دايماً ، وشايف إنها كائن جدير بالمحبة والإحترام فى المجتمعات الشرقية اللى مش دايماً بتوفرلها ده ، واللى اعتبره بعض الرجال أصحاب النظرة الذكورية البحتة خيانة ، زى ماقالوا عن نزار قبانى وقاسم أمين وكل من حاول مناصرة المرأة الشرقية ..
والمعروف عن خان إنه فضل لفترة كبيرة يحاول يحصل على الجنسية المصرية بسبب ولادته فى القاهرة وجنسية أمه اللى أنجبته من أب باكستانى .
mohammed-khan-78686585867.jpg

بطلات حواديت محمد خان كتير ولكن جمعنالكم أبرز 5

هند وكاميليا .. أحلام هند وكاميليا 1988

tumblr_inline_o1ickjbX9b1tuwnws_1280.jpg

مين فى البنات متخانقوش مين تبقا هند ومين تبقا كاميليا ؟ مين الأرملة ومين المطلقة ؟ مين المتمردة واللى نفسها تعيش حياة مختلفة بعيد عن خدمة البيوت ومين اللى نفسها فى كدة بس بتفضل متحلمش وتكون واقعية ..
شخصيتين هند وكاميليا هم اكبر دليل على إن الإنسان ممكن طول حياته يجرى ورا هدف معين والهدف ده يفضل منغص عليه حياته وموقعه فى مشاكل ، ويمكن ميتحققش ويمكن يتحقق بصورة أبسط بكتير من اللى كانت مرسومة فى الخيال .. هند وكاميليا بعد ما اشتغلوا فى البيوت وإتضحك عليهم من رجالة مش جدعان .. إنتهت بيهم أحلامهم لنومة على البحر فى إسكندرية .. من غير فلوس بعد ما اتسرقوا .. وكأن الحدوتة بتقولك .. مهما وصلت برضو...هتفضل منك للبحر..

منى .. زوجة رجل مهم 1988

2015_3_8_22_12_13_31.jpg
رغم إن الدور الأكبر كان للرجل المهم .. أو العقيد هشام أبو الوفا إلا إن الفيلم إتسمي ( زوجة رجل مهم ) وده بيوضح قد إيه إن الحدوتة عايزة توصلك إن ردود أفعالك ليست ملك لك وحدك ، دى كمان ممكن تدمر حياة كل اللى حواليك وإنت مش حاسس لو كانت غلط ... (منى) رغم رومانسيتها ونعومتها وجمالها ... نجحت شخصية زوجها المتعالية المغرورة المريضة إن توصلها فى الآخر لحياة أشبه بالجحيم .. رغم إن نفس شخصية جوزها فى البداية صورتلها إن الحياة هتكون جنة على الأرض .. الراجل المهم مش بيفضل طول عمره مهم ، ولازم اللى حواليه يوصلوله ده وميسيبوهوش يتمادى فى تصوراته المريضة .. لأن فى الآخر هم اللى هيكونوا أكبر المتضررين .. ماتت مني زيها زى أى زوجة رجل مهم مش لازم تكون ماتت برصاص مسدس زيها ، ولكن موت المشاعر أصعب بكتير ..

أبلة تهانى ... شقة مصر الجديدة 2007

tumblr_m6lyd64TWz1qmmk9jo1_500.gif

مع خان فقط يمكن أن تتعلق بشخصية دون أن تراها ... شخصية ( أبلة تهانى ) مدرسة الموسيقي الخاصة بالبطلة ، اللى اختفت فجأة وسابت المدرسة ، وقررت التلميذة تخوض رحلة طويلة للبحث عنها والإطمئنان عليها ... ( أبلة تهانى ) كانت الهدف من الحدوتة ... كانت البذرة اللى اتزرعت جوة التلميذة وطرحت حب وفن ورومانسية وأخلاق .. البذرة اللى أصبحت نادرة الوجود فى المدارس والبيوت كمان ... فيه كام ( أبلة تهانى ) دلوقتى ؟ دور حواليك كدة ؟

جومانا وياسمين .. بنات وسط البلد 2005

5f1eb85005710ba457a71e4f65a93680_123457162_102.jpg

إتنين إتنين .. إصحاب إصحاب يتخانقوا ساعات .. يتصالحوا ساعات ..
الجملة التى قيلت علي لسان ( ريكو ) فى أغنية الفيلم لخصت تقريباً حياة كل اتنين اصحاب فى الدنيا بمنتهي البساطة .. أو حتى العلاقات بشكل عام ... عمرها مابتكون زى القطر .. لازم شوية أعطال فى النص ويا المشوار بيكمل ، يا الحدوتة بتنتهي عند المحطة دى .. جومانا وياسيمن كانوا إمتداد لهند وكاميليا .. إتنين إتنين .. مغلباهم عيشتهم وظروفهم وكل واحدة فيهم بتدور على اللى ينجدها وينتشلها من حياة الصعلكة .. والسنكحة فى وسط البلد اللى تقريباً كل حياتهم فيها .. كوافيرة وبياعة ملابس .. أقصي طموحهم واد حليوة وعيشته كويسة .. ممكن الأحلام تمشي فى خط متوازى وممكن تتقابل وتتعارض .. يتخانقوا ساعات .. لكن العلاقة القوية بتفضل زى مقلنا .. وزى ماحصل مع بنات وسط البلد ..

هيام .. فتاة المصنع 2014

vmm.jpg

الحلم .. والتمرد على الحياة الواقفة الروتينية الجامدة .. البحث عن قصة حب تنسف كل ده وتجرى الدم فى العروق ..
" هيام " البنت اللى من ضمن بنات كتير مصنع الحياة شاغلهم ومشغلهم وساحلهم فى دايرة ملهاش أول من آخر .. فتحت قلبها لأول حد شاغلها ... إندفاع الطفل الصغير اللي مش فاهم وعايز يعيش ويجرب ... بس بيقع على بوزه دايماً ..
الصراع الطبقي حتى بين الطبقات اللي مفيش بينها فرق كبير .. بيفضل برضو صراع طبقي .. والراجل اللى بيغلط أهو بيتعلم .. والبنت اللى بتغلط أهى بتتألم .. والكل بيحط عليها ..
لكن " هيام " مفضلتش واقعة كتير ... وقررت إن الضربة اللى متموتكش ... ترقصك !

free-2694086087880662230.jpg


شارك هذا المقال: