النساء أيضاً يتحرشون بالرجال !

فريق راجل. دوت كوم


غريب العنوان شوية ، ويمكن عينك تكون قرأته بالعكس وبعتت إشارات لمخك وفهمت إننا هنتكلم عن التحرش بمفهومه المنتشر .. ولد بيتحرش ببنت ..

بس الحقيقة إننا هنتكلم عن حاجة بتحصل – أينعم مش بنفس النسبة – بس بتحصل ، وولاد كتير جداً بيتعرضولها بس الفرق بيكون فى رد الفعل ..

59095081qx9ov4jx5.jpg

بنات كتير بتعجب بشكل ولاد وده طبيعي ومفيهوش عيب ، وبنات كتير بتعبر عن إعجابها ده للولد وده برضو عادى وطبيعي ، ولكن فى أحيان كتيرة البنت بتعاكس الولد ! آه والله ... أينعم مبتوصلش لمد الإيد والتحرش بيفضل تحرش لفظي وخلاص بس برضو .. إسمه تحرش !

أول ماتسمع الكلام ده من ولد مش هتصدقه وهتتهمه إنه بيألف أو بيرسم نفسه وقال يعنى البنات هتموت عليه ، خلينا بس متفقين إن التحرش مش بس التحرش الجنسي ... فيه تحرش لفظي وتحرش بالإدعاء وأنواع كتير ..

زى مقلنا إن رد الفعل والنظرة المجتمعية للحكاية دي هى اللى مش مخلياها تطفو على السطح ويمكن كمان علشان نسبتها قصاد التحرش العكسي أقل بكتير ... الولد دايماً لما بتحصله حالة تحرش مبيعتبرهاش أبداً كده ولا بيبصلها إنها حاجة وحشة بالعكس .. بيعتبر نفسه مرغوب فيه وعمره مابيقع عليه أى ضرر نفسي .. وده فى مجتمعاتنا الشرقية ولكن مثلاً فى المجتمعات الأوروبية قضايا تحرش النساء بالرجال كتير جداً وده لأن الراجل هناك بيحس بإمتهان كبير عكس الراجل الشرقي..

80610079.jpg

ومن المواقف الشهيرة تحرش المديرات خاصة كبار السن بموظفينهم واللى برضو الموظف والمجتمع مبيبصولهاش على إنه حاجة عيب ... عكس لو مدير تحرش بموظفة عنده ... والسنة اللى فاتت كان فيه قضية مشهورة فى السعودية لما إدارة أحد المولات إكتشفت من خلال الكاميرات تحرش أكتر من 15 سيدة بالرجال بطرق مختلفة جوة المول وتحولوا إلى التحقيق .

ممكن تقولنا كراجل بيعيش فى مجتمع شرقي إتعرضت لمواقف مشابهة أو سمعت عنها من حد ؟ وهل أصلاً بتعتبر ده تحرش ؟

ولا ده مجرد حاجة لا تذكر ومتنفعش غير فى الخيال أول الأفلام زى اللقطة دى ؟


شارك هذا المقال: