" خليك دبلوماسي على طريقة Kevin Spacey"

شهاب الجمل
شارك هذا المقال:


من فترة حلوة نزل مسلسل House of cards بأجزاءه الخمسه من بطولة Kevin Spacey و اللي حقق نجاح ساحق و اللي من خلاله قدر يعلمنا شوية مبادئ أساسية نمشي عليها في حياتنا اليومية، و اللي من رأيي لازم ناخد بيها خد بالك
دا واحد بقا "رئيس أمريكا" ..

في الدراسة أو خاصة في الشغل ، بنواجه تحديات ، أعداء و خصوم حتى لو بشكل خفيف ، بس ساعات الناس دي ممكن تمثلك عائق...

هنوضح شوية مبادئ بقا هتخليك سياسي محنك و مخضرم في التحكم في مواقفك و ازاي تكسب التحديات دي..

unnamed-2-.jpg

أول قاعده هي :

" Don't start a war , you know you are gonna lose"
_"متدخلش معركة و انت عارف انك خسران "

لو انت قطه متقفش قدام الأسد و مش كده و بس في معارك كتير مع انك بتكون كسبانها هي تعتبر معارك خسرانه برضه .. إزاي؟

يعني مثلاً لو ربنا مديك قدره في جانب معين مترحش تنافس واحد مش أهل للمنافسة دي أو أقل منك في المستوى ، ساعتها هتبقا ضيعت وقتك و مأثبتش نفسك برضه و شكلك قدام الناس هيبقا طفولي جداً لأن من المتوقع انك تكسب المنافسه.

متحاولش دايماً انك تثبت انك أحسن من الشخص التاني ، دا مش بيدل على أنك جامد في مجالك دا بيدل علي نقص في الشخصية و قلة الثقة بالنفس..

2- " Shake with your right hand but hold a rock in your left”
_ سلم بإيد و في إيدك التانيه طوبة .

و انت بتتعاون مع حد في شغلك ، في دراسه و تكون لسه عارفه قريب ، متدلوش الثقة الكامله ، خلي بالك دايماً في تعاملاتك و تصرفاتك مع الناس ، مش كل الناس زي ما بيبان عليها ، زي ما فيه الكويس فيه الوحش ، لازم تخلي بالك كويس.. و تعرف تفرق بين اللي عايز منك مصلحة و بين

صاحبك اللي بجد و على رأيي المثل

" ساعة المصالح الكل بيتصالح"

2043105.jpg

3- “After all , we are nothing more or less than what we choose to reveal”
_ من الأخر متبينش من شخصيتك غير الجزء اللي انت عايز تبينه للشخص اللي قدامك.

النقطه دي بالذات تنطبق في الشغل و في حياتنا العملية ، حتى علاقتك مع الجنس الأخر.

انت اللي بتختار صورتك في نظر الشخص التاني ، فا لازم تعرف تفرق بين كل واحد بتشوفه في حياتك و تقرر هتوريله أنهي جانب من شخصيتك.. يعني مثلاً مينفعش توري مديرك نقط ضعف شخصيتك ، و مينفعش توري خطيبتك اللي بتحبها جزء العصبية اللي جواك قبل ما تتجوزوا بل لازم

انك تحاول تقضي على النقطه دي ، مينفعش تبقا بتاع ضحك و هزار قليل الأدب مع صحابك قدام الناس بس مع الناس نفسها تقلب شخص محترم !! هتفقد مصداقيتك مع نفسك و قدام الناس

متبينش كل تفاصيل شخصيتك مع إنسان أول مرة تشوفه و تحكيله كل تفاصيل حياتك ...

انك تبقا غامض مش في كل الأحوال بيبقا شئ وحش بل بالعكس في أحيان كتير بيكون شئ مثير للطرف الأخر خاصة لو الطرف دا متهم أو معجب بيك و هيبقا عنده حافز أكبر انه يحاول يعرف أكبر قدر عن المعلومات عن شخصيتك.

و افتكر ان الانطباع الأول عن الشخصية بيفضل للأخر
“The first impression lasts forever “


4- Hunt or be hunted

في حياتك خدها قاعده " يا إما هتبقا الفريسة يا إما هتبقا الأسد "

نرجع لنقطة التحدي شوية ، حاول دايماً و انت داخل أي تحدي متخدكش الجلالة قوي و العظمة او شحن اصحابك و حماستك و تنسى انك في الأصل داخل التحدي عشان ترفع من مستواك..

قبل ما تدخل التحدي فكر مرة و اتنين و تلاته ، ياترى انت على أرض صلبه و تقدر تدخل التحدي دا ؟ ولا مهزوز داخلياً ؟ أو لسه معندكش القدر الكافي من المعلومات او المهارة اللي يخليك كفء عشان تدخل التحدي دا.. مش عيب انك تعتذر عن تحدي معروض في حياتك ، العيب انك تكابر و تحرج نفسك....

الحياة هي عبارة عن تحديات ، يوم هتكسب و يوم هتنهزم ، بس متخليش يوم مكسبك يناسيك يوم خسارتك لأن هو دا الدافع الحقيقي للإنسان.

hoc_spacey1a.jpg


5- " الكرم قوة"
في أخر نقطها هناقشها و عشان مأحرقش عليكم المسلسل
مقولة بتقول " Generosity is its own form of power "

الكرم مش شئ مادي زي ما المعظم متخيل ، الكرم أسلوب حياة ، كريم في شغلك ؟ كريم في مشاعرك مع الناس ؟ كريم في خدمة الناس اللي حواليك؟

يا ترى الناس اللي حواليك شايفينك كريم و ممكن يلجئولك ولا لأ ؟
انك تبقا كريم مع الناس و انك تبقا نقطة فارقة في حياتهم حتى لو عن طريق مساعده بسيطه ليهم ، دا بيديك قوة في حياة الأشخاص التانية و بيديك مكانه و قيمه عاليه في حياتهم.. و كمان بيديك قوة داخليه انك تكمل في كونك كريم مع الناس اللي حواليك مش لأنك مستني تبقا صاحب فضل عليهم و تبقا "انتهازي " ، بس عشان انت شايف انك بتعمل الصح في حياتك ، بس خد بالك متنساش ان للكرم مواضع ، زي الأمانه و الثقة بظبط ، لكل شئ موضعه و اختار كويس الناس اللي أهل للحاجات دي ..