مشوار الچنتل مان يبدأ بحركة

فريق راجل. دوت كوم

فيه كلمات معينة المفروض إنه خلاص معروف جدًا إنه مفيش واحدة بتحب تسمعها زي: تخنتي شوية، وانتي عندك كام سنة؟ (خصوصًا للي قربوا من التلاتين أو عدوها) وإيه ده فيه عندك تجعيدتين بين حواجبك، صح؟ وفيه أفعال برضه خلاص أتعرف إنها عيب تطلع من راجل، زي إنك تزاحم وتعدي قبل واحدة، تقعد وفيه واحدة واقفة، تقفش على إيد اللي بتسلم عليها كإنها الشحات مبروك

فيه بقى شوية حاجات كده، لسّه مش متفق عليها خصوصًا وانت لسه بتتعرف على واحدة جديدة:

- لما تيجي تحط رجل على رجل، أو ترفع رجلك على الترابيزة اللي قدامك، خليك حريص إن الجزمة ما تبقاش في وشها.

- فيه نوع معين من النكت أو الڤيديوهات اللي بتضحك، لا تصلح إلا إنك تشاركها مع راجل أو واحدة صديقة من سنين، ما ينفعش واحدة لسه عارفها، تقول لها بصي تعالي شوفي معايا الڤيديو ده، واحدة صينية قالعة ملط وبتربط نفسها بجنزير. هتخاف.

- أيًا كان انت حققت إيه وأيًا كان قد إيه عظيم، انت مش محور الكون. كفاية كلام عن فيلمك أو مشروعك أو جوايزك. الإيجو يطفّش بلد.

‫-‬ بلاش تتحفها بآراء مجتمعية بتقولها كالبغبغان زي: الرقص الشرقي ده مُعتمد على العري والإثارة، أو زى: مزيكا المهرجانات دي خبط حلل. ما تحاولش تعمل عميق وانت أصلًا ماحاولتش تكوّن رأيي بتاعك وكل اللي بتقوله كليشيه. مش هتنبهر هي خالص.

‫-‬ ما تغصبهاش تحب حاجة ما بتحبهاش؛ مكان معين، أو الكورة، أو واحد صاحبك دمه يلطش، أو الآيفون بدل السامسونج.

- مش لازم تكسب النقاش، ومش لازم تبقى صح. خليك برنس، قول اللي عندك مرة، مش لازم تقوم تحلف إنك صح.

‫-‬ انت مش نازل مع التليفون، انت نازل معاها.


شارك هذا المقال: