سبب الهوس بـGame of Thrones

عمرو موسى

إيه فعلا حكاية المسلسل ده وكل الدوشة اللي حواليه؟ مش مسلسل زي أي مسلسل يعني؟ طيب إيه حكاية كل الحاجات اللي بنشوفها عليه كل كام يوم علي فيسبوك وتويتر، وكمية الناس اللي بتناقش اللي بيحصل في الحلقات، وإيه اللي متوقع يحصل بعد كده، وكل الكوميكس اللي بتطلع عليه، ومين الراجل اللي بقالهم كام شهر محدش عارف هوا عايش ولا ميت اللي اسمه Jon Snow ده اللي قالبين عليه الدنيا؟ وإيه موضوع Winter is Coming ده كمان؟ 

jon-snow.jpg

Game of Thrones هو مسلسل فانتازيا مقتبس من سلسلة روايات A Song of Ice and Fire ومؤلفها إسمه 'جورج آر. آر مارتن' وده راجل دماغ جدًا قاعد في مزرعة في حتة مقطوعة مش بيعمل حاجة في حياته غير إنه بيكتب باقي أجزاء الرواية، المسلسل اتعرض منه 5 مواسم ولسه باقي اتنين، يعتبر من أكتر المسلسلات اللي كوّن قاعدة جماهيرية يمكن تكون الأكبر في التاريخ، والناس في العالم كله بتتسحل معاه بشكل مش طبيعي، بدأ تحضير الجزء الأول منه سنة 2006 لكن أول حلقة بدأ عرضها سنة 2011 على HBO ودي من أكبر قنوات الدراما الأمريكية.

من غير ما أحرق عليكم؛ أحداث المسلسل بتدور في قارتين خياليين إسمهم 'وستروس' و 'ايسوس' بيتصارع فيهم سبع عائلات على حكم سبع ممالك وفي نفس الوقت بتتعرض الممالك دي للخطر من جهة الشمال المتجمد اللي عايش فيه مخلوقات أسطورية، المسلسل فيه شخصيات غامضة كتير وبيناقش قضاية كتيرة منها الدين ،الحروب الأهلية، الجنس، الجريمة، العدالة وحاجات تانية كتير.

لو ماجربتش تتفرج على ولا حلقة وقريت الأحداث بتدور حوالين إيه مش هتفهم برضه ليه الناس مشدودة له للدرجة، علشان هو كقصة تبان عادية وحاجة أتعمل كتير حاجات شبهه قبل كده كمان، بس طريقة التنفيذ مع التأليف والإخراج والتمثيل مع الإنتاج الضخم جدًا هو اللي عمل منه عمل ضخم أوي كده، دي كام نقطة بتوضح قد إيه المسلسل ضخم:

- أول حلقة أتكلفت 5 مليون دولار، والموسم الأول أتكلف 60 مليون دولار، بعد كده بقية المواسم الحلقة الواحدة فيهم بتتكلف من 6 ل 8 مليون دولار!

- بيتم التصوير في سبع دول، أيرلندا الشمالية ومالطا وإسكتلندا وكرواتيا وآيسلندا والولايات المتحدة والمغرب.

- عدد الممثلين الرئيسيين اللي مثلوا لحد دلوقتي في الخمس مواسم 257 ممثل، أشهر حاجة في Game of Thrones إنك مبتبقاش عارف مين هوا البطل الرئيسي، وكل لما تتعلق بواحد وتعتقد إن ده البطل أو ممثل رئيسي تلاقيه تاني حلقة بيموت.

- بيتم عرض الحلقات علي 60 قناة حول العالم، ده غير الناس اللي بتتفرج علي الإنترنت، وآخر موسم كان بيتعرض مدبلج للعربي علي MBC 4 

- لحد دلوقتي قام 7 كتاب بكتابة تأليف الحلقات، 'جورج آر. آر مارتنمؤلف الرواية بيكتب حلقة واحدة بس في كل موسم.

- آخر حلقتين في الموسم الخامس اتعرضوا في 205 سينما IMAX في أمريكا وحققوا 1.5 مليون دولار في أول أسبوع واحد بس!

- الموسم السادس هيبدأ شهر أبريل 2016، يعني لو تحمست لسه قدامك فترة كويسة تتفرج على الخمس مواسم اللي فاتوك وتجهز نفسك للموسم السادس.


شارك هذا المقال: