بالورقه والقلم تكلفه زيارتك للإمارات لو هتدور على شغل هناك‎

أحمد صلاح

قررت تسيب البلد وتطلع بره تدور على شغل وسامع ان الامارات هيا من اكتر الدول العربيه دلوقتى بتدى مرتبات كويسه ؟! مفيش مشكله بس قبل ما تاخد الخطوه دى لازم تحسبها بالورقه والقلم وتعرف تكلفه زيارتك هتكون كام ؟!!

تعالو نشوف تكاليف الزياره هتكون عباره عن ايه

*الفيزا (التأشيرة )

ودى هتكون فى حدود من 1000-1300 درهم وبتختلف على حسب كل مكتب

*تذكره الطيران

اقل تذكره طيران ممكن تحجزها هتكون فى حدود 1000 درهم 

*السكن

لو هتسكن شيرنج اللى هو مع ناس فى اوضه معاك اقل سعر ممكن تلاقيه هيكون 400 درهم بس دا هيكون فى اماكن بعيده شويه لكن لو مكان كويس قريب من محطه الباص هيكون 600 درهم

*الأكل

لو انت بتعرف تطبخ والسكن فيه مطبخ وقررت تعتمد على نفسك ومتاكلشى من بره هنقول 600 درهم فى الشهر
ولو قررت تعتمد على اكل من بره يبقى هتكون التكلفه فى حدود 1000 درهم باعتبار ان الوجبه فى حدود من 15- 17 درهم وهتاكل وجبتين فى اليوم

*المواصلات

وانت بتدور على سكن حاول يكون قريب من محطه مترو لو انت هتنزل فى دبى او من محطه باص لو هتنزل فى اى اماره تانيه .. والتكلفه هنا هتختلف لو انت هتنزل كل يوم تدور على شغل او تنزل يومين تلاته فى الاسبوع .. اقل تقدير لو انت هتنزل فى حدود 3 ايام فى الاسبوع هتكون التكلفه تقريبا 450 درهم

*شحن الموبايل

اقل استخدام للمكالمات وده بدون انترنت لان معظم المجمعات السكنيه فيها واى فاى .. هيكون تقريبا 100 درهم فى الشهر

وبكده لو قررت تقعد طول فتره التأشيره اللى هيا 3 شهور يبقى تعالى نضرب التكلفه لكل بند من اللى فوق *3

الفيزا 1000 درهم
تذكره الطيران 1000 درهم
سكن 600*3 = 1800 درهم
الاكل 600*3 = 1800 درهم
المواصلات 450*3 = 1350 درهم
شحن الموبايل 100*3 = 300 درهم
يبقى الاجمالى كدا 7250 درهم

بالظبط كدا هو دا المبلغ اللى لازم يكون فى جيبك لما تيجى تطلع على الامارات وعلى اى حال السفر دلقوتى بقه اسهل من زمان ولكن الشغل هو اللى محتاج تعب وتدوير كتير وربنا يوفقك للى فيه الخير


شارك هذا المقال: