بدايل البرنس لما يتقفل

أكيلة نص الليل
شارك هذا المقال:

كل مرة بيتقفل فيها مطعم البرنس، بنتعب جداً في محاولات البحث عن بدايل ، وده يرجع لسببين‫:‬ الأول، إن أكلات وطواجن البرنس والتشكيلة دي صعب تلاقيها في منيو واحد في أي مكان‫.‬ والتاني، إن جودة الأكل تستحق الإحترام بصراحة واللي راح هناك ولو لمرة واحدة بس، أكيد عارف الكلام ده كويس‫.‬
بس لأننا بنحب الأكل ومفيش حد فينا يقدر يستغنى عن الأكلات الحلوة دي، ما بينفعش نستنى كتير عودة البرنس ولازم نلاقي بدايل، ودي أكتر مطاعم قدر تعوضنا شوية عنه‫:‬

كابر صبحي

يحتل كابر صبحي (أو المعروف عند بعض الناس بكبابجي الإخلاص والأمانة) اللي موجود في 4 شارع فراج حميدة ورا مركز ثقافة روض الفرج المركز الأول في قلوبنا بصراحة
الملوخية بالطشة الشهيرة، والسجق الجريل، وورقة اللحمة، والكبد، والكلاوي، والقلوب والمخاصي. كل الحاجات دي فوق الممتازة هناك 
ده غير إنه بيقدم حاجات ماكنتش موجودة عند البرنس .. يعني مثلاً الكفتة والطرب هناك حاجة فوق الخيال.
.من مميزات المكان برضة إنه شغال لحد الفجر ودي حاجة مناسبة أوي لينا كأكيلة نص الليل

أم حسن

مطعم أم حسن له أكتر من فرع بس بصراحة أكتر فرع عجبنا كان فرع شارع النصر في المعادي، وفي أقوال متضاربة عن فرع عباس العقاد ناس بتقول كويس وناس بتقول وحش
.أم حسن بيقدم تشكيلة متنوعة برضو من الطواجن والمشويات إلا إن أكتر ما يميز فرع المعادي اللي أكلنا فيه الملوخية، والفتة الهوبر، ورز الكبد والكلاوي. أما الحواوشي هناك، فهو تحفة فنية

البرنس ‫- ‬عباس العقاد

أيوه هو الفرع التقليد من برنس إمبابة وده موجود في 41 عباس العقاد في مدينة نصر
المنيو هناك تقريبًا نسخة من منيو البرنس بس مش زي البرنس الأصلي كطعم طبعًا. 
.أكتر حاجة عجبتنا هناك كانت الممبار وطاجن اللحمة بالبصل