بالميزانية .. أفضل سفريات العيد

شيماء عادل
شارك هذا المقال:

علشان طلعة العيد دى من أهم السفريات على مدار السنة ولأنك لازم تختارها بكل دقة على حسب مودك وحسب الماديات والصحبة إللى معاك، فلازم تشوف كل الإختيارات وتتعرف على أفضلهم ليك.

MOUSA.jpg

موسى كوست
دا على إفتراض إنك كنت محظوظ ولقيت حجز، موسى كوست بقت واحدة من أهم الأماكن إللى بتعملك جو حلو وبتهتم بكل التفاصيل وبتعرف إزاى تبسطك. والسنة دى جيبالك هيفاء وهبى بمناسبة إفتتاح كريستال لاجون والحفلة دى هتكون يوم 8 يوليو "تالت أيام العيد"

-_752x501.jpg

شرم الشيخ والغردقة
لو واخد إجازة طويلة شوية وحابب تروح مكان بعيد وفى نفس الوقت تتبسط، فشرم الشيخ وبالتحديد منتجع كليوباترا هيكون مناسب ليك لأنه عامل أنشطة كتير وحفلة كبيرة للفنانة ميريام فارس فى أول أيام العيد. كمان فندق ريكسوس شرم الشبخ من الأماكن إللى بتقدم رفاهية عالية وبتعرف إزاى تخليك تستمتع بإجازتك. ولو الماديات مش فى أحسن حال يبقى ممكن تشوف عرض من عروض الشركات السياحية لشرم والغردقة وإللى بتقدملك باكديج حلو بسعر مناسب بيوصل ل1300: 1500 للفرد لمدة 4 ايام و 3 ليالى

Marina_egypt_haddara.jpg

الساحل
أما الساحل فاعملك حسلبك كده على مبلغ مش أقل من 1000 جنيه للفرد فى الغرفة المزدوجة. او ممكن 600 أو 700 جنيه تتشارك بيهم أنت وصحابك فى شاليه كده عل الماشى. ومن أهم أماكن الساحل جولف بورتو مارينا وإللى على طوول بتظبط عروض ترفيهية جامدة مع بابا بورتو وخصوصا فى المناسبات، وممكن كمان ديبلو ومارينا ومراسى وأمواج.

2015-635837915098241751-824.jpg

جزء سيناء
الجزء بتاع سيناء دا زى راس سدر ودهب ونوبيع وراس شيطان والكامب إللى بتكون هناك بقت من الأماكن إللى بتشد ناس كتير، وأنت أكيد هتتبسط هناك لو كنت بتدور على شوية إسترخاء كده و ميديتيشن بقى وحركات. والرحلات دى بتكون حاجة ببلاش كده بتبدأ من 650 لحد 1000 جنيه لمدة 4 أيام و 3 ليالى بالانتقالات، وبيختلف على حسب المكان فهتلاقى مثلا فندق زى تروبيتال وايكوتيل عاملين حاجة فى حدود من 700 ل 900 أما سفير ولوميرديان عاملين 1100.

free-731288748826527000.jpg

السخنة
لو بقى بتدور على حاجة فى القريب كده يادوب ساعة ونص وتوصل تقضيلك يوم وترجع أو لو حابب تطول مثلا، يبقى الإختيار الأمثل ليك هو السخنة. الأماكن فى السخنة كتير والعروض أكتر بداية من بورتو السخنة وستيلا وبالميرا ومعاك سويس إن وتيدا سويس إن. أما بالنسبة لأسعار السخنة فهتلاقى إختيارات كتير، من أول 750 لحد 1300 للرحلة إللى مدتها ليلتين أو تلاتة. أما الشاليهات فتعمل مثلا فى حدود 500 فى الليلة.