10 نصايح لو معزوم على فرح صاحبك ..علشان متفضحناش

أحمد مجدي

احنا في موسم تزاوج ... والأفراح كتير، النصايح دي مفيدة لكل شاب عايز يحضر فرح صاحبه ويخرج منه بأقل خساير وأكبر مكسب ممكن :

1- البدلة أساسي وبتعكس تقديرك للناس وصورتك اللي بتعرضها إلا لو ناوي تسلم وتخلع ممكن تلبس حاجة Semi-Formal

2- ستو الحاجة اللي قاعدة تبصلك مش بتشبه عليك دي بتشوف انت تنفع عريس لبنتها ولا لأ، اوعى تقع في الفخ وتقولها عقبال عندكم عشان هتلاقيها بتقولك تعالى سلم على بنتي وتتدبس ويضيع عليك كل الفرص التانية اللي في الفرح

3- تاخد مكانك في ركن القاعة عشان تكشف الحاضرين كلهم وتشغل الكشافات والفلاتر وتشوف مين عليه العين

4- تحجز كرسيك بحاجة عشان هيتاخد منك أول ما تقوم ترقص وأوقات يتاخد لما تحجزه برضه، جاكت البدلة مفيد في الحالات دي عشان الناس صعب تشيله من غير ما تعرفك كويس

5- خلي معاك مناديل بزيادة عشان خاطر العريس هايبقي بيشر ميه، وانت كمان هاتشر لو هاترقص بذمة

6- وانت بتحيي العريس اوعى تحيتك تطلع في الفيديو (البنات مش هتفهم الموضوع دة غير بعد الجواز) 

7- اللي لابسة بدي كارينا على فستان سواريه ومبينة نص شعرها من الطرحة ودالقة 4 كيلو بوية على وشها اوعى تنخدع فيها، روح اغسل وشها وهتلاقيها شبه حنفي صاحبك، الناس الخبرة هاتقدر تعرف كتير قوي من الميك أب بتاعها عامل ازاي

8- البنوتة القمر اللي لابسة فستان سواريه غالبا مخطوبة وهتلاقيها بترقص سلو مع خطيبها اوعى تتسرع، وطبعاً تبص على ايديهم كويس عشان ماتروحش لواحدة متجوزة

9- اوعى حد يضحك عليك وياخد كرسيك ساعة البوفيه، من قبلها بربع ساعة تبقى أمنت مكانك وتقسم انت وصحابك مين هايقعد ومين هايقوم، اتعملت فيا كتير الحركة دي

10- حافظ على تقلك لغاية آخر الفرح وهاتعرف كل اللي انت عايزه عن المعازيم من صاحبك تاني يوم على القهوة وربنا يخليلنا السيلفي والتاج اللي بيطلع فيهم كل المعازيم مع الاسم والاكاونت، واخدلي بالك

وربنا يقدرنا على فعل الخير وعقبال عندكم


شارك هذا المقال: