بالفيديو .. جمل و إفيهات أفلام " للرجال فقط "

فريق راجل. دوت كوم

بالفيديو .. جمل و إفيهات أفلام " للرجال فقط "

كلنا بنحب الأفلام وبنتفرج عليها وفيه " إيفيهات " كتيييير جداً محفوظة عن ظهر قلب سواء أفلام قديمة او جديدة ، بس دايماً تلاقي فيه كلام وجمل معينة بتخص فئة لوحدها ، وزى مافيه إفيهات وكلام " بناتى " جداً بيجي على لسان البنات كتير فى قعداتهم ونمهم زي مثلاً حوار بطلات فيلم أحلى الأوقات :
- بذمتك فيه فى الدنيا زي ضحكة رشدى أباظة دى ؟ طب بوسة عمر الشريف .. بيبوسها لمراته فى البيت ؟!
- هو فيه حد بيبوس مراته فى الزمن المهبب ده ؟
وكمان الجملة الأشهر " انا عايزة ورد يا إبراهيم " اللى برضو فى فيلم أحلى الاوقات ، ونقدر نعتبر الفيلم ده كله حاله انثوية على بعضها .
أما الإفيهات الرجالى الأشهر فمعظمها تقريباً بتدور حوالين موضوع الستات والجنس وبيتكلم بيها الولاد فى قعداتهم وتعتبر زى " سيم " خاص بينهم كان منها على سبيل المثال :



1- أنا مفيش مَرَّة مبتحبنيش < سلام ياصاحبي >

يعتبر فيلم " سلام ياصاحبي " مادة خام للإيفهات سواء ليها علاقة بعالم الرجالة بس او بشكل عام ، عادل إمام عموماً هو اكتر فنان ليه حصيلة إفيهات رجالية جداً و" أنا مفيش مَرَّة مبتحبنيش " من أشهرهم على الإطلاق واللى قاله على لسان " مرزوق " بطل الفيلم لما صارحه تابعه " خوليو " إن " بطة مش ليك يامرزوق " زإنها بتحب واحد تانى ، وأصبح الإفيه الخالد بين الولاد كلهم سواء لوحده او بعد "بطة مش ليك يامرزوق " .



2- مقدرش أعيش مع واحدة مبتحبش فيلم كزابلانكا < السلم والتعبان >

هانى سلامة كمان نقدر نقول عليه من الفنانين اللى ليهم إفيهات وجمل بيحب يرددها معظم الرجالة ولكن اللى مستوى علاقتهم مختلف شوية ، وفيلم " السلم والتعبان " مليان حجات شبه دى ، وحلم الشاب الفلاتي اللى معاه فلوس وبيعرف كل يوم واحدة وبيشتغل فى الإعلانات ده حلم مفضل عند رجالة كتير خصوصاٍ فى بداية عمرهم ، وتحديداً جملة " مقدرش أعيش مع واحدة مبتحبش فيلم كزابلانكا " بقت ملخص لحواديت كتير المفروض الراجل يحكيها بعد الطلاق أو " الفركشة " يشرح فيها قد إيه مكنوش متفاهمين ولا فيه كيميا بينهم وبدل مايقول كل ده بقا بيكتفي بإبتسامة صفراء ويقول بثقة : مقدرش أعيش مع واحدة مبتحبش فيلم كزابلانكا !



3- إنت إنسان صميم ياعربي .. < الساحر >
جملة وردت في فيلم " الساحر " على لسان احد الأبطال " العربي " فى مشهد كان بيجمعه بالفنان محمود عبد العزيز " منصور " وكان الحوار بيدور على فشل " الطريقة البلدى " اللى سبق وشرحها منصور لــ " عربي " لعلاجه من الضعف الجنسي علشان يتخلص من صورته السيئة قدام مراته واللى دفعته اكتر من مرة للإنتحار ، وأظهر الحوار هنا مراحل بائسة من علاقة " عربي " مع مراته اللى خلتها فى الآخر تسيبله البيت وهي بتقوله " أنت إنسان صميم ياعربي " دليل على ضعف فحولته وتقصيره فى واجبات الزوجية ليواسيه " منصور " بكلمات لا تغير فى الواقع شئ ، ويصبح " إفيه " متداول بين الرجال ..



4- أنا ميمي آه بس راجل اوى < مطب صناعي >

من أهم الجمل " الرجالى " اللى قالها أحمد حلمى فى افلامه ، واللى بقت بعد كدة بتتقال على لسان كل واحد بيظهر للناس وش طيب وهادي وبيستغلوه أسوأ إستغلال فبيلاقي نفسه تلقائياً بيقولهم بنفس أداء أحمد حلمي " ميمي " فى فيلم " مطب صناعي " ... أنا ميمي آه بس راجل أوي ..
واحمد حلمي كمان جملة " رجالى " جداً قالها فى فيلم " السلم والتعبان " برضو لما كان صاحبه بيشتكيله صعوبة السيطرة على عقل البنت الجديدة اللى عايز يصاحبها وغنها تعبته وغير كل اللى عرفهم فقاله الجملة الشهيرة : كل ست ليها مدخل حتى لو كانت ملكة إنجلترا ..



5- كور بيضا وحمرا ونسوان < سهر الليالي >

سهر الليالي من الأفلام العظيمة اللى مليانة مشاعر مختلفة ومتداخلة بين الراجل والست ، وعلى الرغم من المعاني والجمل والمشاعر ادى كلها معلقش مع " الرجالة " فى الفيلم كله غير جملة قالها فتحي عبد الوهاب " خالد " ردأ على نصيحة صاحبه أحمد حلمى " عمرو " بإنه يتقي ربنا فى مراته وبنته ويبعد عن العَّط ويمشي فى طريق مستقيم فرد عليه بمنتهي التفاخر وهو بيشير إلى وريده : دمي ده فيه كور بيضا وحمرا ..ونسوان ، عليها يامعلم وكل راجل عاوز يعمل نفسه مقطع السمكة وديلها بقا يردد الجملة دى وبقت فى بقه زى اللبانة ..



6- تلاجة تلاجة < الرهينة >

أحمد عز فى الفيلم ده كان ليه ديالوج طويل بينه وبين ياسمين عبد العزيز وشاركهم فيه محمد شرف يعتبر من المشاهد اللى فيها جمل وإيفيهات " رجالي " كتير ولكن الإفيه الأبرز واللى بقا يردده معظم الرجالة لما تعجبهم بنت معينة او يشوفوها فى وضع مثير إلى حد ما كان إفيه " تلاجة تلاجة " اللى قاله عز لياسمين فى المشهد كنوع من التغزل فيها ولسوء نيته في سلوكها طول الحوار ، وكمان من الإفيهات المشهورة " مش نظمي سالت إيده ؟ " وده بيستخدمه الشباب وساعات بيبدلو " نظمي " بــ " بابا " كناية عن البنت اللى مفيش عليها اى كنترول ...


شارك هذا المقال: