أيكونات الأكل الشعبي في القاهرة

عايز أكل
شارك هذا المقال:

البرنس
.رغم إن البرنس اللي في إمبابة مشهور بإنه ملك الكبدة إلا إنه بيعمل طواجن جامدة بالذات طاجن الفتة باللحمة، وده لأنه بيعمل اللحمة على الجريل مع شوية بصل وفلفل حراق، ده غير إنه بيحط شعرية مع الرز والعيش. سيبك من كل الكلام ده، الطاجن معمول أساسًا من السمن البلدي، يعني غالبًا مش هتقدر تكمل الطاجن  رغم حلاوته لأنه تقيل جدًا وللأسف بيقفل كتير 

أبو طارق 

.من ساعة ما كان مجرد عربية في الشارع وهو مالوش حل. دلوقتي مفيش أشهر منه في عالم الكشري. لو كلت عنده مرة هتحن لنفس الطبق وتحاول ترجع له تاني. في ناس بتقول السر في "الصلصة" بس لغاية دلوقتي ماحدش متأكد من السر

أبو رامي
.غير إنه من أحسن الكبابجية في مصر، المكان نفسه بيشتغل بالليل وبس وفيه مكان حواليه كافي تركن براحتك ومساحة المطعم نفسها كبيرة. الطبق اللي ننصح بيه هو السجق المخصوص، وده طبق محشي باللحمة الضاني المفرومة، عايز تجرب خد معاك صحبة حلوة، وصدقني هتكون عشوة مش هتنساها ابدًا

كبابجي فرحات

فرعه الأساسي في الحسين بس ليه فروع كتير في المهندسين ومصر الجديدة ومدينة نصر وكمان بره مصر، ومن الحاجات اللي لازم تتاكل من عند فرحات هي الحمام المشوي اللي بيعتبر علامة المكان المميزة، بيبقى مشوي على الفحم والتتبيلة رائعة. لو روحت مش هتلاقي ترابيزة مش عليها جوز حمام وده يخليك تتحمس .إنك تدوقه. الجدير بالذكر، إن المكان دايمًا نضيف والخدمة دايمًا ممتازة