الإستفتاء فى بريطانيا و مصر..الشعبين طلعوا فى مية البطيخ !

عمرو موسى


صحينا علي خبر من كام يوم من الواضح إنه مهم لإن العالم كله كان بيتكلم عنه وبالتحديد علي هاشتاج #Brexit ومكنش حد فينا فاهم إيه ده في الأول

بإختصار وبدون الدخول في تفاصيل #Brexit هو إختصار ل Britain Exit ومعناها خروج بريطانيا من كيان الإتحاد الأوروبي, القرار كان عليه كلام بقاله أكتر من سنتين لحد أما قرروا الإستفتاء وحوالي 52% من الشعب قالوا نعم ووافقوا علي الإنفصال

أجواء الإستفتاء والاراء والمشاكل اللي كانت بتطرح رجعتني لأيام بعد الثورة لما كان بيبقى عندنا إستفتاء وإنتخابات كل كام شهر وحسيت إن بغض النظر عن الفرق في المكانة بين مصر وبريطانيا ودرجة التعليم بس فيه شوية حاجات سلبية مختلفتش كتيرفي البلدين, كل بلد فيهم فيها شوية ناس عايشين في مية البطيخ وموديين الباقيين في داهية

20-03-2015-Infographic-What-hurdles-does-the-UK-have-to-overcome-to-prosper-outside-the-EU-Feature_image.png

فرق السن

كان واضح بشكل كبير من الإحصائيات إن الناس الكبار صوتوا بخروج بريطانيا من الإتحاد الأوروبي علي عكس الشباب اللي إعمارهم أقل اللي صوتوا ببقاء بريطانيا في الإتحاد الأوروبي, النقاد شايفين دي مشكلة لإن ببساطة شديدة الشباب هيعيشوا مع القرار ده فترة أكبر بكتير من اللي هيعشها الناس الكبار خصوصا اللي فوق ال65 سنة, علي الجانب الاخر فيه ناس ضد الرأي ده لإنهم شايفين إن زي ما هيا بلد الشباب هيا برده بلد الناس الكبار وكل واحد ليه الحق إنه يقرر مصير بلده حتي لو هيموت بكرة, نفس المشكلة بالمللي كانت موجودة ولسة موجودة عندنا

88363a84-fbdb-4615-9d0f-6c256b9def1f.jpg

في الطراوة

كنا بنشوف ناس أيام الإنتخابات عندنا في مصر داخلة اللجنة تدور علي رمز الشمس والعجلة والحصان لإنهم مش بيعرفوا يقروا, أو ناس داخلة إنتخابات مجلس الشعب مثلا تكتب نعم وفاكرها إستفاء علي الدستور, لإنهم ببساطة مش فاهمين حاجة وعايزين يشاركوا وخلاص لإنهم سمعوا في التلفزيون إنهم لازم يشاركوا, مشكلة زي دي طبيعي تحصل في بلد مشكلتها الرئيسية هيا التعليم وفيها نسبة أمية مش صغيرة, بس في بريطانيا! اللي بيتنططوا علي العالم كله بإن عندهم أحسن تعليم في العالم! حاجة صعب تتصدق.. بس زي ما القطنة مابتكدبش جوجل كمان مابيكدبش

f3f81f2e-fab7-41a4-a113-407a3b2b0d3b.jpg

جوجل أعلن عن أكتر 5 حاجات الإنجليز سألوها بعد ما نتايج الإستفتاء طلعت, أسئلة زي "إيه معني إن بريطانيا تخرج برا الإتحاد الأوروبي؟" "فيه كام دولة في الإتحاد الأوروبي؟" أو "إيه البلاد اللي في الإتحاد الأوروبي؟" كل دي أسئلة عادية إلي حدا ما, بس السؤال المفاجأة اللي يجيب شلل ويوضح إن فيه ناس فعلا في الطراوة كان "يعني إيه الإتحاد الأوروبي؟" يعني فيه نسبة مش قليلة نزلت من بيتهم راحت تصوت علي حاجة معندهمش أدني فكرة هيا إيه وبعد لما النتيجة طلعت ولقوا الناس بتتكلم عن حاجة إسمها EU وهيا اختصار ل European Union إبتدوا يدوروا ويشوفوا يعني إيه EU أصلا.. حاجة جيت أعينك يا عبد المعين لقيتك يا عبد المعين عايز تتعان خالص يعني.

top-8-brexit-risks-for-life-science-companies.gif


شارك هذا المقال: