مراجعة سريعة قبل ما تشوف Avengers: Age of Ultron

أسامة البرقوقي


- بقولك ايه هنروح Avengers: Age of Ultron إمتى؟
-إيه ده هو نزل خلاص؟
- آه يا معلم، بكرة ولا إيه؟
- بس أنا ملحقتش أراجع، محتاج أفتكر بقية الأفلام"


أكيد في اللي مستنين الفيلم بالسنين زي حالاتي كده (دول مش هيستفيدوا أوي بالكلام اللي جاي بس مرحب بيهم برضه طبعًا) … فيه بقى اللي محتاجين مراجعة على اللي فات وفيه االلي سمعوا بس عن الفيلم بس ما يعرفوش أي حاجة عن اللي فات وفيه اللي ممكن يبقوا شافوا نص الأفلام بس مش عارفين إنهم مرتبطين ببعض، دول يركّزوا في اللي جاي.


فيلم Avengers: Age of Ultron هو الفيلم رقم ١٠ في سلسلة أفلام Marvel ، الفيلم ده أنت ممكن تروحوا لو أنت بتحب أفلام الأكشن و الـسوبر هيروز و هتنبسط جدًا، بس إنبساطك ده هيزيد و
:هتبقي فاهم تسلسل الأحداث والأفيهات اللي أبطال بيرموها على بعض (أيوا بيرموا أفيهات) لو أتفرجت علي الـ9 أفلام دي

Iron Man

ده كان أول فيلم من إنتاج Marvel ، ساعتها لما كنت تقول لحد "سوبر هيرو" يقولك آه زي سبيدرمان و باتمان – اللي هما من إنتاج شركتين مختلفين أصلًا، بس عادي نفوتها. Marvel كانت بتراهن لما قررت أنها تعمل الفيلم ده علي حاجة واحدة قدرات الممثل Robert Dawny Jr في إنه يجسد شخصية "توني ستارك" و يخلي الناس تتفاعل معاها وتحبها، و ده اللي حصل فعلًا؛ الفيلم قدر يجمع 585 مليون دولار ويمهد لباقي الأفلام اللي جت بعده.

Iron-man.jpeg

Source : https://goo.gl/JaKVEm

The Incredible Hulk

طبعًا الناس كلها عارفة الرجل الأخضر وده اللي خلاهم ميجيبوش هو أزاي بقي الرجل الأخضر و يركزوا أكتر علي معاناة د. بروس بانر اللي أدوارد نورتون عمل دوره أكتر من رائع. الفيلم ده ماكنش من أنتاج Marvel بس هم قدروا يخلو الفيلم يمشي في الأتجاه اللي هم عايزينه.

the-incredible-hulk.jpeg

Source : https://goo.gl/ibYIoa

Iron Man 2

بعد النجاح الساحق لـIron Ma أعلنت Marvel إنها هتنتج 4 أفلام، أول واحد كان Iron Man 2 وبنعرف فيه تأثير اللي حصل في الفيلم الأولاني بيقدموا فيه 3 شخصيات مؤثرة في عالم Marvel السينمائي و هم Nick Fury وBlack Widow و War Machine و طبعًا منظمة S.H.I.E.L.D اللي كنا عرفنا عنهم حاجة مختصرة في الجزء الأول.

Iron-man-2.jpeg

Source : https://goo.gl/ni1y8N

Thor

في الفيلم ده بنروح بعد تاني في علام Marvel وبنكتشف إن فيه عوالم تانية غير الأرض و بنتعرف علي مكان أسمه Asgard و Odin و طبعا Thor الشخصية المحورية في الفيلم و اللي خلي نص بنات مصر يتابعوا أفلام Marvel ، بالنسبة لناس كتير الفيلم كان ممل شوية، بس هو مهم جدًا علشان تبقي فاهم كل شخصية في الأفلام اللي جاية بتعمل كده ليه فتقدر تعتبره Build up لحاجة كبيرة.

Thor.jpeg

Source : https://goo.gl/L9MD6J

Captain America: The First Avenger

الفيلم ده بيرجع بينا في الزمن للحرب العالمية الثانية و بنعرف قصة Captain America و معاركه ضد الجيش النازي و بنتعرف علي واحد من أشهر الأشرار أو الـVillains زي ما بيقولوا و هو Red Skull و منظمة HYDRA، طبعا الفيلم فيه شوية توجهات سياسية و وكلام كتير عن دور أمريكا "العظيم" في التاريخ والجو ده، بس مايجراش حاجة عادي.

Captain-America-the-first-avenger.jpeg

Source : https://goo.gl/2fXXFc

The Avengers

الفيلم ده تقدر تقول عليه حاجة أُستيك وشغل فنادق، من أول القصة، لأحداث الفيلم، للكوميديا الخفيفة، للتصوير و الأخراج، للمؤثرات البصرية، بالنسبالي الفيلم ده كان تحفة وأظن أن المليار و500 مليون اللي جمعهم بيقولوا أن ده مش رأي لوحدي. الفيلم ده كان نهاية المرحلة الأولي في عالم Marvel السينمائي و أكدلهم أنهم ماشيين علي الطريق الصح.


The-Avengers.jpeg

Source : https://goo.gl/ip6Fhh

Iron Man 3

زي ما Iron Man ابتدي المرحلة الأولي، Marvel اختارته أنه يبتدي المرحلة الثانية. في الفيلم ده بنعرف تأثير أحداث نيويورك اللي حصلت في The Avengers علي توني ستارك و بنتعرف علي The Mandrin اللي بيحاول يقضي علي Iron Man، الفيلم قدر أنه يكسر المليار دولار في الأيرادات و يبقي تاني أعلي فيلم في السلسلة بعد The Avengers.

iron-man-3.jpeg

Source : https://goo.gl/OKHSpS

Thor: The Dark World


في الجزء الثاني من Thor بنتعرف أكتر علي Asgard و تاريخها و بقية العوالم و طبعا ما دام الفيلم فيه Asgard يبقي لازم يكون فيه Loki اللي نقدر نعتبره أكتر Villain محبوب فيه أفلام Marvel، بس في الفيلم ده Thor بيحتاجه عشان يقدر يواجه خطر أكبر بكتير.

Thor-the-dark-world.jpeg

Source : https://goo.gl/KPgK2I

Captain America: The Winter Soldier

أحلي حاجة في الفيلم ده نك متقدرش تعتبره فيلم Superheroes علي قد ماهو زي أفلام الجاسوسية القديمة والمنظمات السرية، طبعا مش هيوصل لأدهم صبري و نور الشريف بس هو كويس، Black Widow دورها كبير و محوري في الفيلم و طبعا Nick Fury برضه.

Captain-Ameriaca-the-winter-solider.jpeg

Source : https://goo.gl/HtdM9x


أنتكدة تقدر تتفرج علي Avengers: Age of Ultron و أنت متأكد أنك هتبقي فاهم كل حاجة. لو أنت لقي خلصت كل دول و كنت مبسوط، أتفرج علي Guardians of The Galaxy الفيلم ده مختلف عن ال 9 أفلام اللي فاتوا و هو مش مرتبط قوي بيهم دلوقتي بس قدام هيبقي مهم.

Avengers-Age-of-Ultron-Poster.jpg

Source : https://goo.gl/xjvY0n

.معلومة مهمة: بعد ما كل فيلم من دول يخلص، أوعي تقفله، بيبقي في مشهد بيمهد للفيلم اللي بعده ما الكريدتس بتخلص


شارك هذا المقال: