راجل حول العالم.. #6 أمستردام ­ هولندا

عمرو موسى

دايما لما بسافر مكان جديد بفكر في حاجة مش كل الناس بتاخد بالها منها, بفكر لو أنا في يوم من الأيام قررت أعيش في البلد هبقي مبسوط فيها ولا لأ, ناس كتير لما بتسافر حتة من الحتت المشهورة دي بتركز علي الجانب السياحي بس, اللي هوا تيجي تقعد 3 أيام تتبسط وتمشي, بس أكيد لو قررت تعيش في المكان ده لفترة من الزمن الموضوع هيختلف, أكتر حاجة عجبتني في أمتسردام إنها تعتبر من أحسن الأماكن اللي ممكن تعيش فيها في العالم بناءا علي كذا إحصائية وفي نفس الوقت من أحسن الأماكن السياحية في أوروبا, واللي سافر عارف إن صعب تلاقي الحاجتين دول في مدينة واحدة

A photo posted by Amr | عمرو (@themouu) on



كل مدينة رحتها قبل كدة كنت بحس إنها حلوة عشان سبب معين, روما متحف كبير كله فن, براج كلها حياة وحركة, باريس تحس إن الجو مليان حب وسعادة, فينيسا كلها ألوان ومباني شكلها حلو, برلين فيها ناس من جنسيات مختلفة مدية للبلد نفسها جو جديد, أمستردام بقي غير كده, عشان فيها كل الحاجات دي, تقدر تقول إن أوروبا إتضربت في الخلاط وطلعت أمستردام, عشان كده بيسموها مدينة الألف وجه

A video posted by Amr | عمرو (@themouu) on


وإنت ماشي في الشارع هتبقي مبسوط, مفيش حاجة عينيك هتيجي عليها مش هتعجبك, مراكب في كل مكان عشان البلد كلها مليانة بحيرات صغيرة وجسور عشان بيعدي في وسط المدينة نهر الأمستل, متاحف, بإختصار أمستردام فيها حاجة من كل حاجة, بس زي ما بنقول الغالي تمنه فيه, تعتبر من أغلي المدن اللي رحتها هيا وباريس, يمكن أمستردام أغلي من باريس كمان

A photo posted by Amr | عمرو (@themouu) on


وإنت هناك أي حتة هتروحها فيها ورد, حرفيا أي حتة, الورد بيبقى مرمي في الشارع مش لاقي اللي ياخده, أشهر ميدان هناك هوا Dam Square وهوا مشهور عشان فيه القصر الملكي اللي في أغلب الأيام بيبقى مفتوح للجمهور عادي يخشوا يتفرجوا عليه, أمستردام كمان مشهورة بالمتاحف الكتير المختلفة, منها متاحف عن الحرب العالمية التانية, متاحف فنية زي متحف فان جوخ ورمبرانت أشهر الفنانين في العالم, متحف لأدوات التعزيب المختلفة, متحف للشنط والجزم! متحف للجنس!!! أيوه وإسمه Sex Museum


بما إننا فتحنا الموضوع أمستردام تعتبر من أكتر المدن المتحررة في العالم, عشان الحشيش والدعارة فيها قانوني ومسرح بيهم, يعني تخش كدة أي كافية تلاقي المنيو فيها أكل وشرب وحشيش, المنيو فيها حشيش بس الكافية مفيهوش مينيمم تشارج, تختار اللي إنت عايزه وتشربه وتقوم تمشي تروح أشهر حي دعارة في العالم, ال Red Light District, تلاقي لامؤخذة الحريم معروضة في الفتارين, تختار اللي تعجبك وتتفقوا علي المبلغ والباقي مش هينفع أكتبه هنا.

بس الحق يتقال, الحرية مش في الحاجات دي بس, يعني أنا مثلا رحت قعدت 3 أيام شفت فيهم حشيش في الكافيهات, حي كامل للدعارة, بارات للشواذ, بس في نفس الوقت مثال بسيط شفت ستات محجبة سايقين أتوبيسات نقل عام, وشغالين تقريبا في كل حاجات, الحرية موجودة, وإعمل بيها اللي إنت عايزه

A photo posted by Amr | عمرو (@themouu) on


لو متابعتش الحلقات اللى فاتت  تقدر تقراهم من هنا :

راجل حول العالم.. #1 برلين - ألمانيا 

راجل حول العالم.. 2# فينيسيا - إيطاليا 

راجل حول العالم.. #3 روما- إيطاليا   

راجل حول العالم.. #4 براج - التشيك 

راجل حول العالم .. #5 باريس - فرنسا


شارك هذا المقال: